Zhorjelski krajny rada Bernd Lange widźi wuspěchi w koronapandemiji

Zhorjelc (AK/SN). W Zhorjelskim wokrjesu su prěnje wuspěchi w boju přećiwo koronapandemiji widźomne. „To je woprawdźite pruwowanje. Smy pak tónle stresowy test wobstali“, rjekny krajny rada Bernd Lange (CDU) spočatk tydźenja nowinarjam. Hač do njedźele mějachu we wokrjesu 266 wobkrućenych padow korony, z nich je 93 schorjenych, třoch lěkuja w chorowni. 165 potrjechenych je w karantenje, 153 je wustrowjenych. Dwacećo su na koronawirus zemrěli.

„Prěni pad zwěsćichu 10. měrca pola muža, kiž bě so z dowola w Južnym Ti­rolu nawróćił. Kónc měrca so pady ko­pjachu. Na to dóńdźe k infekcijam w hladarnjach, fyzioterapijach a w gymnaziju“, rozłoži Annegret Schynol, nawodnica strowotniskeho zarjada a hamtska lě­karka wuwiće minjenych tydźenjow. „Smjertne pady jewjachu so předewšěm mjez wosobami, staršimi hač 60 lět – stajnje w zwisku z ćežkimi předscho­rjenjemi.“ Potrjecheni su pak tež sobudźěłaćerjo hladarnjow w starobje 35 do 59 lět.