Zdźěłaja hospodarski plan za lěće 2020 a 2021

srjeda, 13. meje 2020
artikl hódnoćić
(0 )

Wulka Dubrawa (CS/SN). Po nimale dwu­měsačnej přestawce su so minjeny štwórtk zapósłancy Wulkodubrawskeje gmejnskeje rady zaso schadźowali. Zo bychu wukazy w zwisku z koronapandemiju na wuradźowanju dodźerželi, přewjedźechu posedźenje we wjacezaměrowej rumnosći tamnišeje šule. Tam maja wjac městna a móža trěbny wotstawk połdra metra dodźeržeć.

Wjesnjanosta Lutz Mörbe (njestronjan) chwaleše staršich gmejny, zo su swoje „dźěći woprawdźe jenož we woprawdźitych nuzowych padach w pě­sto­warni a horće zastarać dali. Wšitkim bě to­ wulke wužadanje, kotrež pak smy njekomplikowanje a ze strowym čło­wje­skim rozumom rozrisali.“

We wobłuku informacijow Wulko­dubrawski wjesnjanosta zdźěli, zo lětuši hospodarski plan hišće njepředleži. Wjaco­rych schorjenych sobudźěłaćerjow a zastaranja dźěći dla su wšitcy sobu­dźěłaćerjo komuny na hranicy poće­žom­nosće. Tohodla wón namjetowaše, „hnydom dwójny etat za lěće 2020/2021 zdźěłać. Wšako mnohe róžkowe daty hižo předleža, a bychmy etat za lětsa a klětu jenož tydźenjej pozdźišo předpołožili. Naležnosć je tak wosebje efektiwna.“ Něko­tři gmejnscy radźićeljo wšak běchu trochu zamyleni, a tak dóńdźe k dlěšej debaće wo zmysle a wužitku postupowanja. Skónčnje so wšitcy za namjet wjesnjanosty rozsudźichu. Hižo na přichodnym wuradźowanju za tři tydźenje ma namjet za dwójny etat k wothłosowanju předležeć. Wjacori zapósłancy na to znapřećiwichu, zo maja wobydlerjo prawo, prašenja stajeć. Tuž so na to dojednachu, zo smědźa w małej ličbje přitomni wobydlerjo swoje naležnosće přednjesć. Při tym dźěše mjez druhim wo to, čehodla su 30. apryla najebać koronu a suchotu hromady chodojtow wotpalili. Kaž Lutz Mörbe znapřećiwi, bě dowolene hromady wodnjo wotpalić, zo bychu „swjedźenjej chodojtypalenja zadźěwali“. Nimo toho běchu hromady hižo nawožene, a tak dyrbjachu je tež někak wotbyć.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND