Lětsa tež bjez družkow?

štwórtk, 14. meje 2020
artikl hódnoćić
(0 )
Tajkile napohlad na dołhi rynk serbskich družkow kaž loni we Wotrowje. drje lětsa w serbskich a dwurěčnych wosadach na Božim ćěle njezmějemy. Wšitke procesiony na tymle cyrkwinskim swjatym dnju su wotprajene.  Foto: Archiw SN/Maćij Bulank Tajkile napohlad na dołhi rynk serbskich družkow kaž loni we Wotrowje. drje lětsa w serbskich a dwurěčnych wosadach na Božim ćěle njezmějemy. Wšitke procesiony na tymle cyrkwinskim swjatym dnju su wotprajene. Foto: Archiw SN/Maćij Bulank

Putnikowanje swjatki póndźelu a procesiony na Bože ćěło wotprajene

Budyšin/Róžant/Bluń (SN/JaW). Kóždolětne putnikowanje serbskich a dwurěčnych katolskich wosadow swjatkownu póndźelu do Róžanta njebudźe. To wobkrući našemu wječornikej tachantski farar a dekan Wito Sćapan. Přičina su tuchwilne wobmjezowanja koronawirusa dla, štož tež Drježdźansko-Mišnjanski biskop Heinrich Timmerevers wobkrući. „Kemše swjeća wěriwi we wosadnych cyrkwjach. W Róžeńće Boža mša tohorunja budźe. Tam pak je ličba městnow kaž w kóždej druhej cyrkwi wobmjezowana. Tuchwilu pruwujemy, hač kemše wottam z pomocu Serbskeho rozhłosa wusyłamy“, zdźěli dekan Wito Sćapan na naprašowanje našeho wječornika.

Tohorunja hinaši budźe koronapandemije dla lětuši swjedźeń Božeho ćěła. Kaž farar Sćapan dale zdźěli, swjeća jón wěriwi w jednotliwych wosadach „po njedźelskim porjedźe. Procesiony njejsu móžne – tež modlenje před wonkownymi wołtarkami nic. To płaći za štwórtk a njedźelu.“ Hač wuhladamy tón dźeń we wosadach družki, njeje jasne. Wšako dyrbja so hotowarniče, přewozmu-li nadawk družki zhotować, na wulke wobmjezowanja a škitne naprawy dźeržeć. Tak dyrbja družki a hotowarniče, drasća-li cuze holcy, při přihotach runja frizeram sej hubu a nós zakryć a dalše naprawy wobkedźbować. Njesłuša dźě k tomu jenož hotowanje drasty, ale tež zaplećenje włosow dźeń do toho. „Čini-li to mać abo dalša wosoba ze swójby, je to něšto druhe. Tak družki budu abo njebudu“, rjekny tachantski farar našej nowinje. Dale wón wěriwym radźi na Bože ćěło „so na wosadnych kemšach we wulkej ličbje wobdźělić“.

Kaž je Drježdźansko-Mišnjanske biskopstwo minjenu njedźelu na wšitkich Božich mšach wozjewić dało, lětsa tež žane procesiony na próstwowych dnjach, tři dny do Božeho spěća, njebudu. „Litaniju spěwamy w cyrkwi“, rěka we wozjewjenjach. Hižo wot minjeneho kónca tydźenja smědźa w cyrkwjach zaso kemše we wjetšich skupinach swjećić, při čimž maja wěriwi škitne naprawy dodźeržeć. Kaž Drježdźansko-Mišnjanske biskopstwo na ručnych łopjenach a na swojej internetnej stronje informuje a je to tohorunja w Božich domach wozjewić dał, dyrbja wěriwi tež w cyrkwjach połdra metra wotstawka do wšěch stron dźeržeć. Zdobom měli mjenje kěrlušow spěwać. Kóžda druha ławka je wotnětka zašlahana. Tak maja mjez druhim w Chróšćanskej cyrkwi po informacijach wosadneho fararja Měrćina Deleńka cyłkownje 164 městnow, za Ralbicy zliči farar Šćěpan Delan 70 městnow, a w Róžeńčanskej swjatnicy je něšto wjac hač 100 městnow za kemšerjow za kóždu bohosłužbu spřihotowane. Městna su z łopjenom woznamjenjene, kotrež je přidatnje z próstwu wo trěbny wotstawk k dalšim wěriwym poćišćane, ale jenož w němskej rěči. Při zachodach do cyrkwjow su desinfekciske srědki za ruce spřihotowane. Kolektu na kemšach njezběraja, ju měli wěriwi při wopušćenju Božeho domu do spřihotowanych korbikow při durjach dać. „K swjatemu woprawjenju přistupić měł kóždy po swojim rozsudźe. Najprjedy wěriwi z ławkow na lěwej strony swjatnicy, potom z ławkow na praweje strony“, da biskop Timmerevers minjenu njedźelu na wšěch kemšach wozjewić. Njedźelu je na přikład farar Michał ­Anders w Róžeńće kemšerjow po zwučenym wašnju, přiwšěm z dosć wulkim wotstawkom, woprawjał. Tež w Chró­sćicach je farar Deleńk woblatka wudźělał a měješe škitnu škleńcu před sobu stejo.

Tež w ewangelskich wosadach płaća wot Swobodneho stata Sakskeje wukazane naprawy. Tam smě so tuž tohorunja wjac hač 15 wěriwych na kemšach wobdźěleć, dodźerža-li postajeny wotstawk. Njedźelu su to wjacori wěriwi Blunjanskeje wosady wužili a kemše w tamnišej tykowanej cyrkwi wopytali. Farar Stefan Reichelt pak njeje ke­mšerjam jednotliwe městna wupokazał abo ławki zašlahał, ale jich namołwił trěbny wotstawk mjez sobu ­dodźeržeć.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND