Gmejna ma inkluziski nadawk

pjatk, 15. meje 2020
artikl hódnoćić
(0 )
Něšto njewšědne wšak napohlad na posedźenju Worklečanskich gmejnskich radźićelow wčera wječor bě, jako so w šulskej jědźerni schadźowachu. Foto: Jan Kral Něšto njewšědne wšak napohlad na posedźenju Worklečanskich gmejnskich radźićelow wčera wječor bě, jako so w šulskej jědźerni schadźowachu. Foto: Jan Kral

W tučasnej koronapandemiji prawu městnosć za posedźenja gmejnskeje rady namakać njeje lochko, tež za Worklečanskeho wjesnjanostu Franca Bruska (CDU) nic.

Worklecy (JK/SN). Jědźernja Worklečanskeje šule je jenička móžnosć, kotraž žadanjam wotpowěduje. Tam wšak wjesnjanosta poprawom mikrofon z wótře­rěčakom trjeba, zo bychu jeho wšitcy słyšeli. Najebać to su posedźenja wunošne.

Poprawom su wobzamknjenja wo twarskich próstwach wobydlerjow rutina a spěšnje schwalene. Wčera pak su radźićeljo wo twarskej próstwje w Smječkecach trochu dlěje wuradźowali. Wobydler chce něhdyše znate a woblubowane zetkawanišćo „Schil so“ na bydlenski dom přetwarić. Najprjedy pak chce je zwottorhać. ­Někotři radźićeljo mějachu wobmyslenja, zo so potom twarjenje zhubi, kotrež je z mnohimi stawiznami a anekdotami zwjazane. To pak je wjesny chronist wobkedźbował, a zhromadnje z twarskim knjezom budźetaj wšitko dokumentować.

Dalša, chutna naležnosć pokaza, zo w našim kraju wšo tak njeběži, kaž bychu to wobydlerjo rady měli. Měrka Bulankec z Prawoćic, kotraž ćerpi pod genetiskej chorosću, zawinowacej ekstremnu čućiwosć na UV-pruhi, budźe wot noweho šulskeho lěta do 5. lětnika Worklečanskeje wyšeje šule chodźić. Zo móhła wotpowědnje swojej chorosći wuknyć, maja tam rumnosće wotpowědnje wuhotować, mjez druhim wokna z wosebitej škitnej foliju zalěpić. Naprawy płaća gmejnu dobre 66 000 eurow. Wčera předčita wjesnjanosta radźićelam próstwu wo spěchowanske srědki sakskemu kultusowemu ministerstwu. Njemóže a njesmě być, zo gmejna sama w prekernej situaciji za tajki inkluziski nadawk financne brěmjo njese. Nan Měrki bě přitomny a rozłoži trěbnosć twarskich změnow w šuli. Sam je zwólniwy z pomocnikami wěste dźěła přewzać.

Radźićeljo mějachu trochu brjušebolenja, hač budu naprawy sčasom k nowemu šulskemu lětu hotowe. Na kóždy pad je po słowach Franca Bruska jasne, njedóstanu-li spěchowanje, gmejna wudawki sama zaruna. Tež spěchowanske towarstwo wyšeje šule je podpěru přilubiło.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND