Jednohłósnje za pomocny paket

štwórtk, 28. meje 2020
artikl hódnoćić
(0 )

Koronakriza a jeje wuskutki tworjachu ćežišćo wčerawšeho posedźenja Budyskeje měšćanskeje rady. K dalšim diskutowanym dypkam słušachu přichod turizma a ćeže na Bohatej hasy.

Budyšin (SN/bn). Jednohłósnje schwali rada wčera zhromadny namjet kataloga naprawow „Budyšin dožiwić“ wšitkich frakcijow a měšćanskeho zarjadnistwa. Tak mjenowany pomocny paket za wot krizy potrjechene předewzaća mjez druhim wopřijima, přemysłowy dawk bjez danje nachwilnje wusadźić. Nimo toho płaća hač do kónca lěta najniše móžne popłatki za wabjenje w zjawnym rumje. Wikowarjo a gastronomojo móža přichodnje darmotnje na internetnej stronje www.bautzen.de wo swojich poskitkach informować, za reklamu na njej njetrjebaja hač do 20. junija ničo płaćić.

Wodźerjam po měsće chce rada z tym pod pažu přimnyć, zo móža turistam tež dotal njepřistupne městna pokazać. Mjez dalšimi dypkami kataloga su nimo toho na přikład wupłaćenje něhdźe 35 000 ­eurow spěchowanskemu towarstwu „Króny“, podpěra wuwiwanja koncepta busoweho shuttle-serwisa na měšćanskich swjedźenjach a pruwowanje ideje wobydlerskeje medalje města Budyšina.

Z wjetšinu hłosow wobzamknychu Budyscy radźićeljo wčera namjet frakcije FDP, něhdźe 35 000 eurow ze zakonja wo přizwolenju pawšalow rozdźělić a za měšćanske dźěle Delnja Kina, Sćijecy, Mały Wjelkow a Słona Boršć-Bolborcy rezerwować. Tamniši wjesni předstejićeljo móža ze srědkami – je-li trjeba – přidatne wudawki korony dla zarunać.

Namjet SPD, komunalna wobdźělenska a wobhospodarjenska towaršnosć BBB měła so přichodnje wo měšćanski marketing starać, bu runje tak do za turizm zamołwiteho wuběrka přepokazany kaž namjet AfD, wutworić „turistisku šćežku“, kotraž ma wot parkowanišća na Schliebenowej do stareho města wjesć.

Najemocionalnišu diskusiju wšak zbudźi tema, kotraž scyła na dnjowym po­rjedźe njesteješe. W mjenje wikowarjow a gastronomow na Bohatej prošeše Bodo Thiemann radu, planowane wobnowjenje milinowoda pod hasu přestorčić: „Kriza je nas wšěch trjechiła. Hdyž mamy runje nowu, něžnu rostlinku, by nas twarnišćo přidatnje wobćežowało.“ Wyši měšćanosta Alexander Ahrens (SPD) jemu přilubi naležnosć w twarskim wuběrku dalši raz rozjimać.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND