Při twarskich dźěłach na ležownosći skelety našli

Bukecy (jš/SN). Njewšědna namakanka je Lothara a Gabrielu Kurtzec z Bukec minjene dny zaběrała. Mandźelskaj běštaj sej pódla domskeho dalšu ležownosć kupiłoj, hdźež chcetaj sej za starobu dalši mjeńši dom natwarić. Srjedu tydźenja su tam dźěłaćerjo z bagrom ryć započeli a storčichu při tym na skelety. „Najprjedy widźachmy jeničce jednotliwe kosće. Nadobo pak běchu to tež nop a dalše dźěle skeleta“, powěda wobsedźerka ležownosće Gabriele Kurtze, „tak smy hnydom policiju zazwonili.“ Zastojnicy su sej namakanku dokładnje wobhladali a pruwowali, hač ma kriminalistiski pozadk. To pak spěšnje negowachu a přepodachu naležnosć forensikarjam za dalše slědźenje. Hač do póndźele tohole tydźenja je tam nětko team technikarjow za čłowječimi powostankami a dalšimi namakankami rył. Jeničce we hłubokosći poł metra nańdźechu dohromady 34 skeletow. Přepytowarjo krajneho zarjada za archeologiju Sakskeje wužiwachu za wurywanje wosebite graty.