Choćebuz/Budyšin (SN/došo/JaW). Dešć minjenych dnjow a tydźenjow je situaciju nastupajo staw wody we łužiskich rěkach a jězorach polěpšił. To zdźěli Łužiska a srjedźoněmska towaršnosć hórnistwoweho zarjadnistwa (LMBV) w nowinskej zdźělence.
„Wulkeje suchoty w lěću dla bě situacija we łužiskich rěkach kaž w Sprjewi a Čornym Halštrowje w juhu Braniborskeje a zdźěla tež Sakskeje měsacy dołho napjata. Dešć je połoženje chětro polěpšił“, hódnoći tohorunja kraje přesahowaca dźěłowa skupina „Ekstremne situacije“, kotraž w naležnosći dwutydźensce wuradźuje. Minjene dny a tydźenje su předewšěm w Budyskim wokrjesu stupace mnóstwa spadkow zregistrowali. Mjeztym poručeja eksperća hižo braniborskim wokrjesam, „powšitkowny zakaz z powjerchowych wodźiznow wodu brać a klumpać zběhnyć“. Wokrjes Sprjewja-Nysa je poručenje hižo zwoprawdźił a minjeny tydźeń zakaz klumpanja wody z rěkow zběhnył. W Budyskim a Zhorjelskim wukaz dale płaći, rešerše Serbskich Nowin wunjesechu.