Chrósćicy (JBo/SN). Cyłkownje štyrnaće porow wobdźěli so minjenu sobotu na mejemjetanju w Chrósćicach. Při najrjeńšim słónčnym wjedrje so wulka syła wjesnjanow zetka a běhej wo mejski wjeršk přihladowaše. Jako najspěšniši wopokaza so lětsa Jonas Nowak, kotryž sej z wulkim wotstawkom k druhim pachołam meju hrabny. Chróšćan wuzwoli sej Hanu Nukec z Nuknicy za swoju mejsku kralownu. Na to podachu so wšitke pory zhromadnje z wjesnjanami na nawjes. Kaž je po tradiciji z wašnjom, tam młodostni pod hudźbnym přewodom Chróšćanskich muzikantow k serbskim spěwam zarejwachu. Po rejach přeprosy mejski kral wjesnjanow na bjesadu při kofeju a tykancu do stana, kotryž bě kaž hižo loni při młodźinskim klubje natwarjeny. Wo dobru naladu postarachu so tam znowa Chróšćanscy muzikanća. Chróšćanski młodźinski klub zaruči ćělne derjeměće a poskićowaše mjez druhim steaki, kołbaski a rybičkowe całty. Tohorunja běchu młodostni kóždolětnu tombolu spřihotowali. Dźěći móžachu so nimo toho nad skakanskim hrodom a plackowymaj mužomaj wjeselić.