Radwor (SN/MkWj). Z małej swjatočnosću pod hołym njebjom su w Radworju wčera popołdnju zasłužbneho serbskeho prócowarja a wótčinca wopominali, kotremuž maja so Radworčenjo wjele dźakować. Runje wčera před 150 lětami, 4. septembra 1873, bě so Jurij Słodeńk narodźił. Wosebje dźakowni su jemu spěwarki a spěwarjo Radworskeho chóra Meja. Słodeńk bě spěwne ćěleso w lěće 1895 załožił. Z teje přičiny pyši wot wčerawšeho wopomnjenska tafla za Jurja Słodeńka dom bywšeje nalutowarnje napřećo Radworskej cyrkwi, w kotrymž ma chór Meja mjeztym wjace hač dwaceći lět swój domicil.
Dirigentka chóra Lipy w Pančicach-Kukowje Jadwiga Kaulfürstowa, kiž je so wobšěrnje ze stawiznami serbskeho spěwarskeho hibanja zaběrała, něhdźe 20 přitomnym wuznam Jurja Słodeńka a jeho spomóžne skutkowanje na dobro Serbow předstaji, kotrež sahaše daloko za mjezy Radworskeje wosady. Po represalijach nacionalsocialistow smědźeše Słodeńk kónc wójny drje hišće dožiwić, bórze po tym, w juniju 1945, pak wón zemrě. Wosadny farar Beno Jabubaš wopomnjensku taflu poswjeći, přejo chórej dalše spomóžne skutkowanje.
