Nowa Wjeska (MZ/SN). Kóžde lěto mjez hodami a nowym lětom wotměje so w Nowej Wjesce tradicionalny škotowy turněr. Nic jenož Nowowješćenjo, ale tež znaći a přećeljo z wokolnych wsow slědowachu mjeztym hižo 25. raz přeprošenje, zo bychu najlěpšeho škotowarja wječora zwěsćili. Cyłkownje wobdźěli so dwanaće muži. Po prěnim kole běchu znaći faworića wječora hižo wěsći: Alfons Handrik z 1 044 dypkami, Michał Zahon (1 327) a Herman Woko (1 561). W přestawce popřachu sej kartyplacarjo ćopły přikusk při lóštnej rozmołwje a z wulkej nadźiju, zo druhe koło (hišće) lěpje poběži.