Wjele wopytowarjow na Dnju wotewrjeneho pomnika po puću byli

Radwor/Minakał (SN/lmc/BŠe). W cyłym wokrjesu Budyšin móžachu sej historisce zajimowani dohromady 44 pomnikow wobhladać, mjez druhim tež hród w Minakale. Wobsedźer Hermann Fuchs je na Dnju wotewrjeneho pomnika wopytowarjow dohromady tři króć po hrodźe wjedł a jim nazorny dohlad do stawiznow kaž tež do tuchwilneho wužiwanja hroda dał. „Tajke twarjenje z tajkimi stawiznami dyrbiš wuchować“ běše wosobinske moto, pod kotrymž je rodźeny Franka w lěće 1998 započinał hród ponowić a „zaso k žiwjenju zbudźić“. Nimo wo stawiznach hrodu je na swojich wodźenjach tež wo procesu ponowjenja a wo komplikacijach při tym rozprawjał. Twarski ansambl hrodu je wokoło lěta 1302 Friedrich von Metzradt natwarił. Wot 1595 do 1945 mějachu wšelake zemjanske swójby w Minakale swoju rezidencu. Po druhej swětowej wójnje běchu w hrodźe wójnscy ćěkańcy zaměstnjeni. Wot lěta 1953 do 1993 je tu Serbska rěčna šula swój domicil měła.