Wobćežne rozmołwy z Chinu
Berlin (dpa/SN). Knježerstwje Němskeje a Chiny su dźensa w Berlinje wo dalšim zhromadnym dźěle wobeju krajow w ćežkich časach wuradźowałoj. Dźesać chinskich a dźewjeć němskich zastupnikow knježerstwa su so pod nawodom zwjazkoweho kanclera Olafa Scholza (SPD) a chinskeho ministerskeho prezidenta Li Qianga w kanclerskim zarjedźe zešli. Zaběrali su so předewšěm z bojom přećiwo změnje klimy a z tym zwjazanym přetwarom hospodarstwa. Rěčeć chcychu pak tež wo wikowanskich poćahach mjez krajomaj a wo wójnje Ruskeje přećiwo Ukrainje. China chce w tutym konflikće posrědkować a zasadźuje so za měrowe jednanja.
Zwjazkowe knježerstwo organizuje knježerstwowe konsultacije prawidłownje z krajemi a partnerami, kotrež su jemu hospodarsce a strategisce wosebje wažne. Chinu wobhladuja w Berlinje jako „partnera, hospodarskeho konkurenta a systemoweho riwala“, w posudku knježerstwa rěka. W Chinje je tutón posudk hněw a njezrozumjenje zbudźił.
We wobchodach wjace kradnu
Ličba padustwow pola wikowarjow niwow z časa do pandemije docpěła
Köln (dpa/SN). Wšojedne hač palenc, sneakery abo smartphony: Ličba padustwow we wobchodach je w Němskej loni zaso jasnje přiběrała. Cyłkownje wobličichu straty drobnowikowarjow přez paduchow po dźensa wozjewjenym přepytowanju Kölnskeho wikowanskeho slědźenskeho instituta EHI 2022 na něhdźe 3,7 miliardow eurow. To je rozrost 15 procentow porno lońšemu lětu.
K tomu přińdźe přiběracy strach mjez wikowarjemi, tak přepytowanje zwěsća, zo móhli stupace płaćizny minjenych měsacow toho abo tamneho pohnuć, wěcy prosće sobu wzać. „Wosebje přiběrace płaćizny riziko padustwow we wobchodach zwyša. Kradnyć je drohich produktow dla atraktiwniše“, fachowc instituta Frank Horst tuchwilnu naladu zjima. Mnozy wikowarjo wočakuja tež wjace padustwow přez sobudźěłaćerjow. Někotre předewzaća běchu tónle zjaw hižo loni wobkedźbowali.
Kolesować dale dowolene
Swědka přijěła
To a tamne (20.06.23)
Wjace hač 25 000 wopytowarjow ewakuować dyrbjeli su wčera z wólnočasneho parka w badensko-württembergskim Rusće. Akcija traješe něšto wjace hač dwě hodźinje, po tym zo běchu ludźi wohenja dla alarmowali. Ewakuowanje wotběža bjez problemow, park zdźěla. Woheń bě w rumnosći techniki jedneje z atrakcijow parka wudyrił. Wohnjowi wobornicy płomjenja podusychu.
K namócnemu rozestajenju z wjace hač 40 wobdźělenymi je njedźelu popołdnju w lěsnej kupjeli w badensko-württembergskim Mannheimje dóšło. Při tym so 24lětny po kałanju z nožom zrani. Dalši wobdźěleni so snadnje zranichu. Njeznataj běštaj 12lětneho do wody storčiłoj a podnuriłoj. Jako hólc bratromaj wo podawku rozprawješe, so wonaj do njeznateju daštaj. Druzy so do zwady měšachu. Na kóncu so 40 ludźi biješe.
Hordy podawk stawiznow
Zwjazkowy kancler Olaf Scholz ludowy zběžk 17. junija 1953 wuzběhnył
Berlin (dpa/SN). Po zapisach w aktach bě 35lětny Willi Göttling prěni, kotrehož su po ludowym zběžku 17. junija 1953 zatřělili. Minjenu sobotu bě swójbny nan z Berlina tuž prěni, kotrehož su we wobłuku zarjadowanja za wopory poraženeho zběžka wopominali. Cyłkownje štyri dóńty tehdyšeho časa su šulerjo na pohrjebnišću Seestraße w bywšim zapadnym Berlinje w tym zwisku předstajili, doniž njeje zwjazkowy kancler Olaf Scholz podawki tehdyšeho časa wuzběhnył.
„Ludowy zběžk 17. junija 1953 w NDR bě jedyn z najwažnišich a tež najhordźišich podawkow stawiznow boja wo swobodu našeho kraja“, rjekny politikar SPD před zhromadźenymi wodźacymi politikarjemi stata. Mjez nimi běchu zwjazkowy prezident Frank-Walter Steinmeier, prezidentka zwjazkoweho sejma Bärbel Bas, prezident Zwjazkoweje rady Peter Tschentscher a prezident Zwjazkoweho wustawoweho sudnistwa Stephan Harbarth.
Faeser w Tuneziskej
Tunis (dpa/SN). Druhi dźeń jeje wopyta w Tuneziskej wočakowaštaj němsku nutřkownu ministerku Nancy Faeser (SPD) dźensa prezident Kais Saied a jeje kolega w zastojnstwje Kamel Fekih k rozmołwam wo prašenjach migracije a boju přećiwo terorizmej. Při tym chcychu wo tym rěčeć, kak móhli migrantow spěšnišo zaso do arabskeho kraja wotsunyć. Na druhim boku chcyše Faeser tuneziskim dźěłowym mocam přistup k němskim dźěłowym wikam wolóžić, kaž zdźělichu.
Pechstein zakituje narěč
Berlin (dpa/SN). Claudia Pechstein je kritiku nastupajo swój wustup na zarjadowanju CDU w policajskej uniformje wotpokazała. Spěšnosmykarka rjekny nowinarjam, zo njeje z čłonom CDU, ale zo bě hósć na zarjadowanju strony – „jako sportowča, zastojniča a zwjazkowa policistka“. Wotpowědujo policajskim słužbnym předpisam je tež zwonka słužby dowolene, uniformu nosyć, wona rjekny. Wustup Pechstein bě diskusije zbudźił. Zwjazkowa policija pad pruwuje.
Radnicu přećiwo AfD zakitował
Němsko-chinske konsultacije
Nawalny znowa před sudnistwom
Habeck: Kapka přewjele była
Berlin (dpa/SN). Zwjazkowy minister za hospodarstwo Robert Habeck (Zeleni) je zmylki w zwisku z přesadźenjom noweho zakonja wo tepjenju přiznał. We wusyłanju „Anne Will“ wón rjekny, zo drje su sej mnozy we wokomiku wozjewjenja zakonja hižo myslili, zo je kriza zemskeho płuna dla přewinjena. Rjemjeslniske zmylki w zwisku ze zdźěłanjom zakonja pak wón wotpokaza.
Habeck we wusyłanju na to skedźbni, zo bě časowy ćišć na zamołwitych hoberski. „Nochcu so tule sam wuwinyć.“ Přiwšěm je zakoń po jeho měnjenju w porjadku. Najwjetša starosć Habecka bě, „zo njezmějemy w zymje dosć płuna“. Po tym zo bě Němska zymu dosć derje zmištrowała, běchu ludźo měnjenja, zo dalši zakoń nětko woprawdźe njetrjebaja. Tute nastajenje pak njebě Habeck spóznał, wón rjekny. Z tutoho zmylka su dalše zmylki nastali. „Bě to kapka noweho zakonja přewjele“, Habeck rjekny. Wón so nadźija, zo so połoženje zaso změruje. Zwjazkowy sejm chce so štwórtk z nowym zakonjom tepjenja dla zaběrać.
