Wolfsburg/Kaluga (dpa/SN). Koncern VW swoju najwažnišu fabriku w Ruskej předawa. Tohorunja chce so předewzaće dospołnje z kraja wróćo sćahnyć. Zawod w ruskim Kaluga so wikowanskej skupinje Avilon předa, koncern minjeny pjatk zdźěli. Hladajo na dotalne postupowanje VW je z rozsudom jasne, zo so ruskeho wobchodnistwa wzda. Po rozprawach medijow zańdźeny tydźeń bě VW do toho w Moskwje dowolnosć za předań swojich zamóženskich hódnotow w Ruskej za 125 milionow eurow na přede­wzaće Avilon dóstał. Wotpowědnu próstwu je knježerstwowa komisija wotžoh­nowała, bě powěsćernja Interfax roz­prawjała.

Wulce moderna fabrika w Kaluga něhdźe 150 kilometrow juhozapadnje Moskwy z něhdźe 4 000 dźěławymi płaći jako najwažniša zamóženska hódnota VW w Ruskej. Po informacijach ruskeho wicešefa knježerstwa Denisa Manturowa pytaja hižo za zrěčenskim partnerom z juhowuchodneje Azije, zo móhła twornja zaso dźěłać započeć.

Wěm so hišće derje na čas w Ralbičanskej šuli dopominać, hdźež bě wulka šulska ­zahroda. We wobłuku wučby smy so z družinami rostlinow rozestajeli a je na ­hrjadkach plahowali. Tole dźensniši dźeń paruju, wšako njeje hižo tajkeho prakti­skeho wukubłanja na šulach. Zwjetša wšak kubłanišća žane zahrodki wjace nimaja. W šulskej zahrodźe zeznachmy ­přirodne kołoběhi a wotwisnosće. Wězo móhli starši swoje dźěći kubłać. Na wjeskach je tole zawěsće móžno. Tola dźěći w městach so z přirodu lědma rozestajeja.

Zahroda je ekosystem, w kotrymž hodźa so biologiska wšelakorosć, ale tež sćěhi čłowjeskich činitosćow na přirodu dožiwić. Dokelž zaběraja so šulerjo z rostlinami, zwěrjatami a insektami, nastawa empatija. A to je často zakład toho, zo so dźěći za škit přirody a wobswěta zasadźeja. Na dźensnišim mjezynarodnym dnju mnohotnosće družin wuprajam so za to, wobstejace zakłady žiwjenja dźěćom zaso bóle spřistupnić. Bianka Šeferowa

Hiroshima/Kijew (dpa/SN). Ukrainski prezident Wolodymyr Zelenskyj ma wjerškowe zetkanje sydom najsylnišich industrijnych krajow swěta w japanskej Hiroshimje za wulki wuspěch za swój kraj. „Ukraina steješe w srjedźišću a respekt napřećo wšěm Ukrainjanam bě wosebje wulki“, rjekny Zelenskyj wčera wječor we wšědnym widejowym posel­stwje. Wón rozprawješe wo zetkanjach ze statnymi a knježerstwowymi šefami.

USA běchu tam mjez druhim přilubili, Ukrainje bojowe lětadła přewostajić a zapadnym krajam to tohorunja dowolić. Prezident Joe Biden je nimo toho dalši pomocny wojerski paket wjacorych miliardow dolarow připowědźił. Moskwa je wobzamknjenja wjerška G7 mjeztym jako „přećiwo Ruskej so měrjace“ kritizowała. Dźensa chcychu so wonkowni ministrojo EU w Brüsselu zetkać a wo dalšej pomocy Ukrainje w boju přećiwo ruskim nadpadnikam wuradźować. Mjeztym je dale njejasne, hač su ruske jednotki město Bachmut zdobyli abo nic. Informacije z Moskwy a Kijewa wo tym so spřećiwjeja.

Přirodu škitace organizacije pokazuja na dramatiske połoženje

Drježdźany (dpa/SN). Składnostnje dźensnišeho mjezynarodneho dnja mnohotnosće družin žadaja sej iniciatiwy a politika wjace prócowanjow za škit přirody. Pola organizacije Parents for ­Future je zasadźenje za přirodu takrjec hižo w mjenje zapołožene. Starši starosća so hladajo na dramatiske klimowe wuhlady wo přichod swojich dźěći.

Parents for future w Drježdźanach je so tuž z namołwu na politiku, medije a towaršnosć wobroćiło: „Ludźo wědźa hišće přemało wo mnohotnosći družin a zhubjenych družinach. Skónčnje dźe wo to, młodym a přichodnym genera­cijam hišće wobstejace zakłady žiwjenja přewostajić, kotrež k žiwjenju a přežiwjenju trjebaja.“

Tež sakski minister za wobswět Wolf­ram Günther žada sej wjace próco­wanjow. „Wotemrěće družin a ničenje žiwjenskeho ruma stej strašny rozměr docpěłoj, po wšěm swěće runje tak kaž w Sakskej. Połoženje družin a žiwjenskich wobstejnosćow je wohrožace. Dyrbimy rozsudnišo jednać“, politikar Zelenych w Drježdźanach rozłoži.