Berlin (dpa/SN). Kanclerski zarjad měješe so poprawom rozšěrić, tola zwjazkowy financny minister Christian Lindner (FDP) je tomu nětko zadźěwał. Planowany twar so tuchwilu přepruwuje, rěkaše wčera z financneho ministerstwa. „Nam pobrachuja zapłaćomne bydlenja. Tohodla njeje zmysłapołne k dispoziciji stejace přestrjenje za nowe ministerstwa wužiwać. Město toho pruwujemy, hdźe móhli bydlenja nastać“, Lindner zwurazni.

Zwjazkowy financny minister je hižo minjeny tydźeń přikazał projekty přepruwować. Pozadk toho je tež rozkora wo etaće zwjazkoweho knježerstwa. „Dyrbimy dołh pomjeńšić. Tohodla je trěbne wo tym wotwažować, što je trěbne a kotre naprawy móhli na zwoprawdźenje čakać. Nimo rozšěrjenja kanclerskeho zarjada słuša k tomu tež nowo­twar financneho ministerstwa.

New York (dpa/SN). Tři dny trajacu konferencu UNO po wšěm swěće pobrachowaceje pitneje wody dla su dźensa w New Yorku zahajili. Na zetkanju wočakowachu něhdźe 6 500 wobdźělnikow, mjez nimi knježerstwowych šefow, ministrow a zastupnikow hospodarstwa a ciwilneje towaršnosće. Wjeršk ma po woli swětoweje organizacije směrnicy a program dalšeho skutkowanja zdźěłać. Dotal žadyn mjezynarodny program nastupajo pitnu wodu njeeksistuje. Tež UNO žanu organizaciju nima, kiž by so wo to starała.

Problem swět wopřijaceje pobrachowaceje pitneje wody so po přeswědčenju UNO přichodny čas dale přiwótři. Je to sćěh přiběracych wobswětowych a hospodarskich problemow w zwisku z přiběracym zanjerodźenjom wody, rěka w rozprawje UNO. Hižo nětko bydli dźesać procentow swětoweho wobydlerstwa w krajach z wulkim abo jara wulkim strachom zastaranja z pitnej wodu. Dotalne wuspěchi na dobro zachowanja pitneje wody ma UNO za njedosahace, wšako problemy přichodnje dale přiběraja.

Wukrajni fachowcy z „módrej kartu“ měrja so na zapadne zwjazkowe kraje

Podstupim (dpa/SN). Z tak mjenowanej „módrej kartu“ chcedźa derje kwalifikowanych fachowcow zwonka krajow Europskeje unije jednorišo do Němskeje nawabić. Naprašowanje za tutym srědkom je pak w zwjazkowych krajach rozdźělne.

Wot awgusta 2012 ma módra karta připućowanje fachowcow z wukraja wolóžić – dobre dźesać lět pozdźišo je nawal fachowcow do Braniborskeje skerje přewidny. Prěnje połlěto 2022 su 193 fachowcam z krajow zwonka EU w Braniborskej časowje wobmjezowanu dźěłowu dowolnosć přizwolili. To bě 76 wjace hač samsny čas 2021, zwjazkowy zarjad za migraciju a ćěkancow zdźěli.

Přikład módreje karty bě tak mjenowana greencard za wukrajnych fachowcow w USA. Wuměnjenja tajkeho přizwolenja móžneho dźěła w Němskej su wysokošulski studij, dźěłowe zrěčenje abo kruty dźěłowy poskitk z jasnymi wuhladami na měsačnu zasłužbu.

„Dobre towarstwa za Serbow, te su naša nadźija“, rěka w spěwje „Kiž so swěrnje ­lubo maja“, kotryž zasłužbnym Serbam na jubilejach rady zaspěwaja. Zwjazana z tym je nadźija, zo towarstwa tež přichodnje dale na dobro našeho ludu skutkuja a předewšěm – zo namakaja dorost! Na wčerawšej hłownej zhromadźiznje Towarstwa Cyrila a Metoda mějach zaćišć, zo so tam tež w tymle prašenju něšto hiba. Wulka ličba swěrnych a zasłužbnych čłonow na jednej, a młodźi čłonojo wokoło noweho předsydy Cyrila Hančika na druhej stronje běchu widźomny wuraz generaciskeje změny. Hdyž so w druhich serbskich towarstwach wobhladujemy, widźimy, zo maja tam samsne problemy, zo pak so tež tam dale a bóle młodźi ludźo gratu přimaja. Z nazhonjenjow staršich čłonow wuknyć, dźěło z młodźinskim elanom dale wjesć a po tutym puću nowych ludźi za čestnohamtske dźěło zahorić, to drje je najlěpši puć, zo bychu „dobre towarstwa“ dale wobstali. Marko Wjeńka