Biskopja so schadźuja
Drježdźany (dpa/SN). W brizantnej cyrkwinskopolitiskej situaciji schadźuja so katolscy biskopja wot dźensnišeho w Drježdźanach k swojej nalětnjej plenarnej zhromadźiznje. Štyridnjowske zetkanje steji předewšěm w znamjenju reformoweho procesa Synodalneho puća, kotryž Němska biskopska konferenca wot lěta 2019 zhromadnje z Centralnym komitejom katolikow Němskeje (ZdK) organizuje.
Chaos na lětanišćomaj
Köln/Düsseldorf (dpa/SN). Warnowanske stawki su na lětanišćomaj Köln/Bonn a Düsseldorfje haćenja zawinowali. Sta lětow su wupadnyli. Zamołwići su pasažěrow prosyli, so do swojeho přijězda pola swojeje lětanskeje towaršnosće abo pućowanskeho zarjadowarja wo aktualnym stawje swojeho lěta informować. Pozadk stawkow su jednanja za přistajenych zjawneje słužby pola Zwjazka a komunow kaž tež cyłozwjazkowe jednanja za přistajenych powětroweje wěstoty.
Wólbny wuslědk wozjewili
Wjele ludźi na „zběžku za měr“
Wšelake zarjadowanja róčnicy ruskeho nadpada na Ukrainu dla
Kijew/Berlin (dpa/SN). K róčnicy ruskeho nadpada na Ukrainu je mjezynarodna zhromadnosć ćišć na ruske knježerstwo zwyšiła. Ruska dale na swojich pozicijach wobsteji, mjeztym zo Kijew kóždu rozmołwu ze šefom Krjemla Wladimirom Putinom kategorisce wotpokazuje. Tež chinska měrowa iniciatiwa je do dalokeje měry bjez wuspěcha.
Po USA su pjatk wječor tež staty EU dalši paket ze sankcijemi přećiwo Ruskej wobzamknyli. To su mjez druhim přidatne wikowanske wobmjezowanja za industrijne wudźěłki, kotrež njemóže ruska industrija přez třeće staty kaž Chinu dóstawać.
We wot atakow charakterizowanej debaće Bjezstrašnostneje rady UN namołwi zwjazkowa wonkowna ministerka Annalena Baerbock (Zeleni) k tomu, so ruskemu prezidentej Putinej napřećo stajić. „Tuta wójna njeje wójna ruskeho ludu. Tuta wójna je Putinowa wójna“, wona pjatk na wosebitym posedźenju w New Yorku k prěnjej róčnicy nadpada na Ukrainu wuzběhny. „Ruski prezident riskěruje přichod swójskeho kraja.“ Měr měł tež zajim ruskich wobydlerjow być.
Přećiwo cynizmej
To a tamne (27.02.23)
Na tropiskim sewjeru Awstralskeje je hoberski krokodil muža při rěce nadběhował a na to jeho psa morił. Ataka bě minjenu srjedu w Bloomfieldźe w zwjazkowym staće Queensland, hdyž je 37lětny při rampje za čołmy ze swojej psycu „Magic Molly“ šoł, kaž powěsćernja AAP rozprawješe. Rangerojo su 4,2 metraj dołhi reptil štwórtk wječor 200 metrow wot městna nadpada namakali a zatřělili, dokelž běše „inakceptabelne riziko“.
Dźiwadźelnica Heike Makatsch podawa nětko tež yoga-hodźiny w Berlin-Charlottenburgu. Tydźensce jónu wona wuwučuje wotměnjejo so z dalšej wučerku, kaž yoga-studij minjeny pjatk na Instagramje piše. Po tym je Makatsch tam w lěće 2021 zakładne wukubłanje absolwowała. Tuchwilu wona swoju wědu w natwarnym wukubłanju pohłubša. Z yoga je kluč do wjace hač jenož ćělneje strowoty namakała, dźiwadźelnica měni.
Žarowaca z Bergen-Belsena
Někotre mysle k 24. februarej
W přihotach na Druhu swětowu wójnu zarjadowa němska wehrmacht 1935 pola wsy Bergen na juhu Limborskeje hole wojerske zwučowanišćo. Na jeho kromje přidruži so 1940 lěhwo za wójnskich jatych, kotrež wužiwaše so wot 1941 jako lěhwo za sowjetskich wójnskich jatych. Wot wehrmachty přewza 1943 SS dźěl lěhwa a zarjadowa w nim koncentraciske lěhwo Bergen-Belsen. Jeničce w lěhwje sowjetskich wójnskich jatych zahiny wot 1941 hač k jeho rozpušćenju w januaru 1945 něhdźe 20 000 wojakow. Ćěła pochowachu na bliskim pohrjebnišću, najprjedy w rowach porynku a pozdźišo w masowych rowach.
Po wójnje přetwori so pohrjebnišćo w lětomaj 1945/1946 na nastork sowjetskeje wojerskeje administracije na wopomnišćo. Jako pomnik postajichu srjedź ležownosće marmorowu skulpturu žarowaceje. Jeje stworićel bě znaty ukrainski rězbar a profesor Mykola Muchin-Koloda (1916–1962) z Kijewa. Jako model słužeštej wuměłcej jeho mandźelska Sofija a dźowka Maša.
Tójšto derje zmištrowali
Berlin (dpa/SN). Zwjazkowy kancler Olaf Scholz (SPD) widźi Němsku najebać krizy, kotrež z nadpada Ruskeje na Ukrainu wuchadźeja, na dobrym puću. „Smy tójšto dosć derje zmištrowali“, rjekny Scholz dźensa w swojim widejowym poselstwje „KanzlerKompakt“. „Mamy dosć płuna a wolija. Hospodarstwo w hłubokej recesiji njetči. A smy wjace hač milion ukrainskich ćěkancow přijimali, dźakowano wulkej pomocliwosći wšudźe w kraju.“
Mjedwedew znowa hrozy
Moskwa (dpa/SN). Na róčnicy ruskeje inwazije do Ukrainy je bywši šef Krjemla Dmitri Mjedwedew z dospołnym podwolenjom susodneho kraja hrozył. Wón je wumjetowanje wospjetował, zo je Ukraina wot nacijow wobknježena a tohodla strašna za Rusku. W socialnej syći Telegram Mjedwedew dźensa piše: „Tohodla je tak wažne, zo wojerska specialna operacija swój zaměr docpěje“. Strach za Rusku wotwobarać rěka za njeho zdobom, samo hač k mjezy k Pólskej hić.
Akcija „wuchowanskeje łódźe“
Woprašowanje: Dwě třećinje za měrowe jednanja
Berlin/Peking/New York (dpa/SN). Reprezentanća němskeho stata solidarizuja so składnostnje prěnjeje róčnicy z wot Ruskeje nadpadnjenej Ukrainu ze zarjadowanjom dźensa na hródźe Bellevue w Berlinje. Přeprosyłoj staj a porěčeć chcetaj zwjazkowy prezident Frank-Walter Steinmeier a ukrainski wulkopósłanc w Němskej Oleksii Makeiev. Nimo toho je nahrawana narěč ukrainskeho prezidenta Wlodymyra Zelenskeho předwidźana.
China je k přiměrej we wójnje w Ukrainje namołwjała. Wonkowne ministerstwo w Pekingu je dźensa dokument z dwanaće dypkami wozjewiło, w kotrymž žadaja sej hnydomne znowazahajenje jednanjow mjez Ukrainu a Ruskej. „Dialog a jednanja stej jeničke praktikabelne rozrisanje za krizu Ukrainy“, rěka w dokumenće. Prócowanja Chiny pak su ze skepsu přewodźene, dokelž njeje kraj nadběhowu wójnu Ruskeje dotal zasudźiła.
Habeck: Sankcije wobeńć poćežić
Tankowe zawěry
Waršawa (dpa/SN). K róčnicy wudyrjenja wójny w Ukrainje je Pólska z tym započała, swoju mjezu k Ruskej a Běłoruskej z tankowymi zawěrami zawěsćić. „To je dźěl našeje strategije zakitowanja a wottrašenja“, piše zakitowanski minister Mariusz Blaszczak wčera na Twitter. Prěnje blokady su hižo na 200 kilometrow dołhej mjezy k ruskej eksklawje Kaliningrad natwarili.
Runje tak chce Pólska na dohromady 418 kilometrow dołhej hranicy k Běłoruskej tankowe zawěry připrawić. Mócnar Aleksander Lukašenko je swój kraj Ruskej jako bazu we wójnje přećiwo Ukrainje k dispoziciju stajił. Běłoruska twori tež zhromadne jednoty z Ruskej. Do wójny aktiwnje zapřimnyła pak dotal njeje.
To a tamne (24.02.23)
Swoje dźěćo je mać na socialnym zarjedźe w Berlin-Neuköllnje porodźiła. Dokelž hižo dwě dźěsći ma a jej hrozy bydlenje zhubić, dóstanje nětko wosebitu pomoc wot zarjada. Žona bě wutoru w prawidłownej rěčnej hodźinje wo strowotniskich problemach skoržiła. Krótko na to su hrona započeli. Hdyž nuzowy lěkar přichwata, je hłójčka hižo widźeć była. Kaž sćelak RBB rozprawješe, traješe porod 15 minutow. Mać a ćěšenk do chorownje dowjezechu, jimaj so derje dźe.
Zmylk druheho šofera při přesćěhowanju je so zahubnje za muža w Schwerinje wuskutkował. Tón bě wjace hač 30 lět bjez jězbneje dowolnosće jězdźił. 57lětny bě 6. februara blisko hrodu z awtom po puću. Hdyž druhi šofer jeho přesćěhaše, sta so njezbožo z pječa snadnej sobuwinu Schwerinjana. Při zwěsćenju njezboža rjekny zastojnikam, zo papjery sobu nima. Policija na to zwěsći, zo bu jemu 1992 jězbna dowolnosć na přeco sćazana.
