Berlin (dpa/SN). W boju přećiwo rozšěrjenju koronawirusa žada sej Dźěłarnistwo za kubłanje a wědomosć generelnu winowatosć, w šulach škitny nahubnik wužiwać. „Najwjace wučerjow by winowatosć nahubnika tež we wučbje witało. Tónle škit dyrbimy jim zaručić“, zwura­zni předsydka Marlis Tepe w rozmołwje z Passauskimi nowinarjemi. Pedagogisce njeby tajka naprawa zmysłapołna była, „wona pak škita wučerjow, šulerjow a jich staršich“.

Tuchwilu wobsteji w najwjace zwjazkowych krajach winowatosć nahubnika w šulskim twarjenju, nic pak we wučbje. Konferenca kultusowych ministrow bě spočatk septembra zwěsćiła, zo hodźi so wužiwanje nahubnika w jednotliwych zwjazkowych krajach wotpowědnje ličbje infekcijow tež we wučbje po dorěči ze zamołwitym strowotniskim zarjadom wukazać. Tepe žada sej w tym zwisku tež po wšej Němskej jednotny koncept za přewětrjenje rjadowniskich rumnosćow.

Bad Saarow (dpa/SN). Drježdźanski hospodarski slědźer Joachim Ragnitz je nowym zwjazkowym krajam wumjetował, zo maja při planowanju struk­turneje změny „strašnje mało idejow“. Runje při wužiwanju z dobrym prawom wužadanych wurunanskich srědkow za brunicowe kónčiny pobrachuja skerje dobre a konkretne předstawy a nic pjenjezy, rjekny Ragnitz, zastupowacy nawoda Drježdźanskeje wotnožki slě­dźenskeho instituta Ifo, wčera w Bad Saarowje na wuchodoněmskim hospodarskim forumje. Regionalnje zamoł­wići sej ze srědkami mjenje bóle swoje wosobinske přeća spjelnjeja. „Ani nowe kolesowarske šćežki ani šikwanje po­nowjene muzeje k tomu njepřinošuja, nowe předewzaća do wuchodnych regionow nawabić.“

Přewostajić spěchowanske srědki je w najlěpšim padźe trjeba, za hospodarski wuspěch pak to w žanym padźe njedo­saha“, Ragnitz podšmórny. Nowoza­sydlene předewzaća a branše do přichoda sahacych technologiskich wuwićow móhli strukturnu změnu podpěrać, njeměli pak je tež nadhódnoćić.

Lissabon (dpa/SN). Twjerde drogi kaž kokain a heroin so w Europje strašnje dale rozšěrjeja. Strowota a wěstota Europjanow stej přez stabilne drogowe wiki, ale tež přez wobmjezowanja koranowirusa dla wohroženej, informuje wobkedźbowarnja za drogi a wotwisnosć wot drogow Europskeje unije (EMCDDA) w swojej wčera wozjewjenej kóždolětnej rozprawje. Strowotniske zastaranje a chłostanske naprawy su korony dla wobmjezowane, rěka z institucije Europskeje unije, kotraž je w Lissabonje zaměstnjena.

Dyrbimy z tym ličić, zo so „někotre potrjechene skupiny w zwisku z hospodarskimi sćěhami koronakrizy dla drogam přiwobroća a zo su potom dźěl drogowych wikow“, rjekny direktor EMCDDA Alexis Goosdeel, jako wón rozprawu wčera přednjese. To staja nětko hižo wućežene zarjadnišća pod hišće wjetši ćišć. Dyrbjeli tuž „spěšnje jednać, zo móhli na nowe wohroženje reagować“. Dźeń a časćišo w Europje wosebje wulke mnóstwa drogow namakaja. Lěta 2018 běchu rekordne 181 tonow kokaina sćazali. Sćazane mnóstwo heroina je wot 5,2 (2017) na 9,7 tonow (2018) rozrostło.

Stary telewizor je so ze swojimi elektroniskimi pruhami wo to postarał, zo je we wsy Aberhosan we Walesu wšědnje rano w sedmich internet wupadnył – 18 měsacow dołho. Zamołwići telekomunikaciskeje posłužby běchu zadwělowani za přičinami pytali, doniž njezwěsćichu, zo jedyn z wobydlerjow wšědnje w 7 hodź. telewizor zaswěći. Stary nastroj je internet tak masiwnje wobwliwował, zo so system we wsy dospołnje sypny.

Cuzy pjeršćeń namakałoj staj mandźelskaj w swojim bydlenju w delnjosakskim Neu Wulmsdorfje, po tym zo bě paduch tam pobył. Njeje wšak wuzamknjene, zo je paduch złoćany pjeršćeń z grawuru „Jürgen“ a datumom druhdźe pokradnył a na to w domje porika zhubił. Dotal pak su wšitke pospyty, wobsedźerja pjeršćenja z pomocu mjena a datuma zwěsćić, bjez wuspěcha wostali.