Zhorjelc/Berlin (SN). Strowotniski wotrjad Zhorjelskeho krajnoradneho zarjada namołwja wšitkich ludźi, kiž su so z rizikowych kónčin Italskeje nastupajo nowy corona-wirus nawróćili a kotřiž maja symptomy, so pola domjaceho lěkarja telefonisce přizjewić. Lěkar so potom ze strowotniskim zarjadom skontaktuje. Je pak tež móžno so hnydom na strowotniskim zarjedźe přizjewić, kaž krajnoradny zarjad w nowinskej zdźělence informuje.
Mjeztym je ličba z wirusom natyknjenych dale rozrostła. Mjez druhim je so sobudźěłaćer wotrjada za dźěćacu a młodźinsku medicinu Hamburgskeje uniwersitneje kliniki natyknył. Wokoło sewjerorynsko-westfalskeho Heinsberga su sta ludźi w domjacej karantenje.
Zwjazkowy nutřkowny minister Horst Seehofer (CSU) je wčera krizowy stab zwjazkoweho knježerstwa zarjadował. Tón chcyše so hišće dźensa schadźować.
Dorost swini maja nětko w Hannoverskim dožiwjenskim zwěrjencu. Tam je so hnydom dźesać čorno-běłych dypkatych prosatow mjeztym jara wohroženeje družiny pisanych Bentheimskich swini narodźiło. Tónle robustny skót wot srjedź minjeneho lětstotka wjace njeplahuja, dokelž bě tehdy skerje libojte mjaso prašane. Hakle we 80tych lětach su z poměrnje małym wobstatkom započeli tutu družinu swini zaso plahować.
Pozdatny pósłanc bamža je sej w cyrkwinskej wosadźe w sewjernej Hessenskej přenocowanje a zastaranje wulišćił. 71lětny bě so na farje w Eschwege jako wysokorjadny wopyt z Roma předstajił. Zamołwići su jeho tuž jako hosća w pensiji zakwartěrowali. Poněčim pak dwělowachu a informowachu policiju. Zastojnicy zwěsćichu, zo jedna so wo jebaka, kiž bě so hižo časćišo jako Romski pósłanc wudawał.
Budyšin (CS/SN). To bě něšto cyle nowe: Nimo CDU, kotraž swoju politisku popjelnu srjedu w Budyšinje tradicionelnje wotměwa, běše lětsa tež wokrjesny zwjazk Lěwicy prěni raz na tajku přeprosył. Zdobom zamołwići chcedźa, zo stanje so to z tradiciju.
W Röhrscheidtowej bašće Serbskeho ludoweho ansambla wustupištaj wčera tuž před něhdźe 50 zajimcami wokrjesny předsyda Lěwicy Silvio Lang a sakska krajna předsydka Susanne Schaper. Je z wašnjom, zo politikarjo popjelnu srjedu ze swojimi politiskimi přećiwnikami „wotličeja“ – rady tež na satiriske wašnje a trochu přehnate. To ma předewšěm motiwaciji w swójskich rjadach słužić.
Budyšin (SN/MkWj). Derje pjelnjena bě Budyska wjacezaměrowa hala na tamnišim Třělnišću tež wčera, byrnjež – hinak hač loni – tu a tam městna swobodne wostali. Budyski zapósłanc CDU w Sakskim krajnym sejmje Marko Šiman bě na mjeztym 28. politisku popjelnu srjedu sakskeje CDU přeprosył. Jako hosćej a rěčnikaj připrajiłoj běštaj tónkróć wiceprezident Zwjazka ratarjow Němskeje Wolfgang Vogel a zapósłanc Němskeho zwjazkoweho sejma, bywši wobswětowy minister a wojowar za čłowjeske prawa w NDR Arnold Vaatz. Mjez přitomnymi w hali na Třělnišću běchu tež Budyski krajny rada Michael Harig, Šimanowy kolega w krajnym sejmje Alojs Mikławšk a předsyda Domowiny Dawid Statnik.
New York (dpa/SN). Zwjazkowy wonkowny minister Heiko Maas (SPD) je w Bjezstrašnostnej radźe UNO namołwjał, zaměr swěta bjez jadrowych bróni z wočow njezhubić. Je načasu přetorhnjene jednanja wo wotbrónjenju zaso wožiwić, rjekny politikar SPD wčera w najwažnišim gremiju UNO. Wšitke pjeć čłonow rady – USA, Ruska, China, Francoska a Wulka Britaniska – maja atomowe brónje.
Škody wjetše, hač myslene
Berlin (dpa/SN). W lěsach Němskeje su suchota, wichory a bruki wjetše škody zawostajili, hač dotal myslene. Po nowych zwěsćenjach dyrbja 245 000 hektarow – płonina je tak wulka kaž Posaarska – město dotal zwěsćenych 180 000 hektarow znowa zwosadźeć, zwjazkowe ratarske ministerstwo zdźěla. Ličić mamy lětsa ze 160 milionami kubiknych metrow škodowaneho drjewa. Wosebje potrjechene su Sewjerorynsko-Westfalska, Saksko-Anhaltska, Hessenska a Durinska.
Wuradźuja wo nadpadźe
Karlsruhe (dpa/SN). Katolska a ewangelska cyrkej stej starosćiwje na rozsud Zwjazkoweho wustawoweho sudnistwa nastupajo pomoc k wumrěću reagowałoj. „Wusud zasahuje hłuboko do našeje kultury, kotraž je na pěstowanje a podpěru žiwjenja wusměrjena“, zdźělatej předsydaj Němskeje biskopskeje konferency, kardinal Reinhard Marx a předsyda rady Ewangelskeje cyrkwje w Němskej, krajny biskop Heinrich Bedford-Strohm, w zhromadnej deklaraciji. „Wobsteji strach, zo přizwolenje organizowanych poskitkow sebjemorjenja starych a chorych ludźi na subtilne wašnje pod ćišć sadźeja, tute poskitki tež wužiwać.“
Mönchengladbach (dpa/SN). Po pjeć wobkrućenych padach schorjenjow na corona-wirus w Sewjerorynsko-Westfalskej pytaja zamołwići z wjetšimi akcijemi za dalšimi móžnymi natyknjenymi. W městačku Gangelt je 300 wopytowarjow póstniskeho zarjadowanja namołwjenych, so přizjewić. Wšitcy wopytowarjo a jich swójby dyrbja za 14 dnjow do domjaceje karanteny, zdźěli sewjerorynsko-westfalske strowotniske ministerstwo. W Mönchengladbachu pytaja za ludźimi, kotřiž mějachu kontakt k lěkarjej, kiž bě so z corona-wirusom natyknył. Z naprawami chcedźa tomu zadźěwać, zo so nowy wirus dale rozšěrja. Strowotniski minister Sewjerorynsko-Westfalskeje Karl-Josef Lauermann (CDU) bě pak hižo wčera wujasnił, zo njemóža zamołwići infekciske rjećazy wěsće zadźeržeć.
Zwjazkowy minister za strowotnistwo Jens Spahn z tym liči, zo so chorosć rozšěri. „Stejimy na spočatku epidemije corona-wirusa dla“, rjekny politikar CDU wčera w Berlinje. „Puć infekcije njemóžemy – a to je nowa kwalita – zdźěla wjace sćěhować. Dotalne strategije přećiwo wirusej měli pruwować.“
Po puću k sterilizaciji ćeknył je muski pawian w awstralskim Sydneyju. Wón móžeše zhromadnje ze žónskimaj wopicomaj ćeknyć, po tym zo bě so jemu poradźiło zamk duri wočinić. Hakle po dwěmaj hodźinomaj jeho pomocnicy popadnychu. Mjeztym je pawian operowany a so wočerstwja. Žónce běštej jako emocionalna pomoc sobu. Wopicy su dźěl slědźenskeho projekta.
Zo jeho zakaz jězdźenja njestara, je 84lětny muž Augsburgskej policiji nazornje pokazał. Po tym zo bě sudnistwo jemu jězbnu dowolnosć sćazało, sydny so wón do awta a jědźeše na policajsku stražu. Tam žadaše sej swoju jězbnu dowolnosć. Zastojnicy drje jemu tam tež klučik awta wotewzachu, štož pak njepomhaše: Starc jědźeše z taksijom po rezerwowy klučik a z awtom skradźu wotjědźe, kotrež pola policije steješe. Zastojnicy tuž 84lětneho wopytachu a jemu tež druhi klučik wotewzachu.