Hižo druhu plajtu w nowym lěće dožiwili
FSV Luckenwalde –
FC Energija Choćebuz 1:0 (1:0)
Zestawa Energije: Bethke – Hasse, Slamar, Böhmert (61. Hildebrandt), Borgmann, Kujović (46. Oesterhelweg), Hofmann (46. Badu), Eisenhuth, Shcherbakovski (71. Abu-Alfa), Hottmann, Wähling (46. Thiele)
Po poražce 0:2 tydźenja při domjacej hrě přećiwo Altglienicke njemóžeše FC Energija tež při druhej hrě w druhej połseriji dypkować. Spěšne wrota domjacych přez Borowskeho (2.) zawostajichu pola faworita ćežki šok, tak zo w prěnim połčasu scyła ničo njeběžeše. A njeby wrotar Bethke tajku wulkotnu formu prezentował, bu wyše přěhraće móžno było.
Trochu lěpje běžeše za hosći w druhej połojcy hry, jako zaměnichu Oesterhelwega a Thiele. Tola zniči bywši wrotar Energije Thoms šansy Thiele (55., 84.) a Badu (65.). Dwělomna scena nasta w 45. min. Nowopřichad FCE Sherbakowski bu wočiwidnje w šěsnatce foulowany, hwižk pak wuwosta. Nic pak žołta karta za mócnje so hóršaceho trenarja Energije Clausa Dietera Wollitza. „Hladajo na našu wuchadźišćowu poziciju njesměš tajku hru přěhrać. Dwě přěhratej hrě k startej do noweho lěta stej jěrej poražce.“ tak Wollitz. Georg Zielonkowski
Energiji požčonku přepodali
Krótko do zawrjena transferoweho woknješka, je Energija Choćebuz z druhim transferom překwapiła. Dalši zymski nowopřichad rěka Jan Shcherbakovski. Jeho wupožča sej FCE wot třećeho ligista Dynama Drježdźany hač do kónca sezony.
Šeftrenar Claus-Dieter Wollitz rjekny: „Smy zbožowni z Janom Shcherbakovskim. Krótko do kónca ofensiwneho hrajerja k tomu dóstać, z tym budźe naš konkurenčny bój w nadběhu hišće kusk intensiwniši.“
Wuslědki (08.02.23)
Kopańca, regionalna liga muži
Carl Zeiss Jena – T. B. Berlin 3:0 (1:0)
Lok Lipsk – FC Viktoria Berlin 1:2 (0:0)
VSG Altglienicke – Chemija Lipsk 4:0 (3:0)
Berlinski AK – BFC Dynamo 0:2 (0:0)
SV Babelsberg – Hertha BSC II 1:0 (0:0)
Luckenwalde – E. Choćebuz 1:0 (1:0)
SV Lichtenberg – Čer.-běli Erfurt 3:4 (1:2)
Kamjenič. FC – Greifswaldski KK 2:0 (1:0)
Meuselwitz – Germ. Halberstadt 4:0 (0:0)
1. FC Čerwjeno-běli Erfurt 17 41 : 17 35
2. Kamjeničanski FC 18 33 : 16 35
3. FC Energija Choćebuz 18 37 : 18 33
4. Berlinski AK 18 27 : 18 32
5. BFC Dynamo 19 30 : 24 32
6. FC Carl Zeiss Jena 19 26 : 13 31
7. VSG Altglienicke 18 40 : 23 30
8. Lok Lipsk 18 32 : 25 30
9. SV Babelsberg 18 27 : 21 29
10. BSG Chemija Lipsk 17 28 : 25 29
11. Greifswaldski KK 18 24 : 22 21
12. FC Viktoria Berlin 18 19 : 25 21
13. ZFC Meuselwitz 18 26 : 35 21
14. Hertha BSC II 18 25 : 34 21
15. FSV Luckenwalde 17 18 : 25 17
16. SV Lichtenberg 19 20 : 39 15
17. Tennis Borussia Berlin 19 13 : 58 8
18. Germania Halberstadt 17 12 : 40 5
Pokal w Delanach zdźerželi
Po dwulětnej přestawce wuhotowachu stari knježa Sokoła Ralbicy/Hórki zaso swójski halowy koparski turněr. Zwjeselace bě, zo so wšitke přeprošene mustwa wobdźělichu. Tak nastupichu cyłki SJ Njebjelčicy, ST Marijina Hwězda, Zeleno-běli Hórki a zakitowar pokala SJ Chrósćicy. Sokoljo stajichu dwaj cyłkaj. Hraješe so po modusu kóždy přećiwo kóždemu, a to stajnje dźesać mjeńšinow. Wšitke hry sudźi nazhonity sudnik Jan Hrjehor.
Prěnjej dwě hrě rozsudźichu Ralbicy I, Hórki a Chróšćenjo za sebje a stejachu ze šěsć dypkami na čole tabulki. Wotnětka bu turněr jara zajimawy. W třećej hrě nastupi domjacy prěni cyłk přećiwo Hórkam. Hra skónči so njerozsudnje bjez wrotow. Prěnju poražku pak poćerpichu Chróšćenjo w bojowniskej hrě přećiwo Ralbičan druhemu mustwu. Wuslědk běše na kóncu 2:0. Marijina hwězda doby tydźenja bulowu nóc, to pak njeměješe z wukóncom turněra wjele činić, dokelž někotři stajni hrajerjo pobrachowachu.
Snadna poražka Liškow
Łužiske lodohokejowe liški –
EV Landshut 2:3 p.p.
(0:1; 2:0, 0:1 - 0:1)
Započała bě so partija z wida Liškow derje. Domjacy přewzachu ceptar a Landshut kasěrowaše hižo zahe dwě chłostani. To měještaj Lane Scheidl a Clarke Breitkreuz dwě dobrej składnosći. Vogl we wrotach hosći pak je wotwobara. Jako domjacy potom bjez nuzy tarč zhubichu a hosćom telko časa a městna dachu, to přetwori Samir Kharboutli swobodnje a bjez prócy k 1:0.
Tež na spočatku srjedźneho wotrězka mějachu Liški najprjedy někotre lěpšiny. Po Scheidlowym předdźěle dósta kapitan Breitkreuz dwě dobrej móžnosći, tute pak njepřetwori. Potom dźěchu Liški prěni raz do podličby. Bosćij Zauner dyrbješe na chłostansku ławku. Hunter Garlent pósła Lane Scheidla na jězbu, kiž so wo wurunanje postara. Bórze pak dyrbješe Garlent na chłostansku ławku. A nimale by so stawizna wospjetowała. Jan Nijenhuis nastupi, wot kapitana posłužowany, k soloběhej a wuhra tež wrotarja Vogla. Wrota k 2:1 padnychu pak hakle, hdyž bě Garlent tři sekundow wróćo na lodźe. Potajkim njeběchu to druhe wrota z hrajerjom mjenje na hrajnišću.
Wažne dypki ležo wostajili
EC Bad Nauheim –
Łužiske lodohokejowe liški 3:1
(1:0, 0:0, 2:1)
Hosćićeljo z Bad Nauheima hnydom wot spočatka ćišć wukonjachu. Bě to spěšna hra, ale bjez smjerćstrašnych akcijow. Hakle wotfalšowana třělwa Huby Sekesija postara so wo strach před wrotami Liškow. Nadběhi Běłeje Wody běchu skerje rědke, tola druhdy bu tež za Feliksa Bika strašne. Jako njemóžachu hosćo puk ze zakitowanskeho pasma wuhnać, wotćahny Patrick Seifert z módreje linije. Kevin Schmidt do směra wrotow wotfalšowa a Christoph Körner suny tačel k 1:0 přez wrotowu liniju. Dokelž so na lodźe hewak ničo dale njestawaše, dźěše tež ze snadnym rezultatom do prěnjeje přestawki.
Domjaca hra bjez efektiwnosće
ST Radwor –
ST Horni kraj Sprjewja 1:4 (0:2)
Zestawa domjacych: Grenzemann – Reinecke, Pěčak, M. Grubert, Paška, Castejon (83. Mička), Schöne (70. Wjeńka), Wjacławk, Schulze, Hetaš (46. Nuk), Šnajder
Prěnja wot dweju nachwatanskeju dypkoweju hrow bě so hnydom přećiwo jara sylnemu přećiwnikej přewjedła. Radworčenjo a swoji trenarjo spytachu najlěpše docpěć.
W prěnim połčasu móžeše Radworske mustwo derje sobu dźeržeć. Tak prawje pak na započatku do dwubojow njepřińdźechu a tak wjele bulow zhubichu. Hnydom w dźesatej mjeńšinje móžeše Mecir z jara dobrym wólnym kopom ze zdalenosće 20 metrow nawjedowanje k 1:0 docpěć. Defensiwa domjacych dyrbješe so nětko hišće raz rjadować. Tak běchu tež někotre situacije pódla, w kotrychž sudnik na zbožo na jědnatku njepokaza. Po zbožu pak sćěhowaše potom tola hišće pokutny kop, kotryž zaso Mecir k 0:2 (26.) přetwori. Wulku šansu na skrótšenje wuslědka měješe Johannes Wjacławk, jako běžeše sam na wrotarja. Wón pak njemóžeše dypkować, dokelž jim čuwy zaprajichu.
38. sokołski turněr wo pokal Domowiny
Wulkotne wolejbullowe wurisanje z nowačkom-dobyćerjom
Předsyda Domowiny Dawid Statnik so při mytowanju wjeseleše, zo je w rjadach dwanaće nastupjenych cyłkow tójšto nowych, ale tež tójšto znatych mjezwočow widźeše. Po třilětnej přestawce trjebaše wolejbulowe wurisanje tajke něšto kaž nowy start, wšako w lětach 2020, 2021 a 2022 wo Pokal Domowiny hrali njejsu. Tuž njezadźiwa, zo bě so jenož jědnaće cyłkow přizjewiło. Hakle pozdźišo, na próstwu Serbskich Sokołow, nastajichu serbscy studenća dwanaty cyłk. Mała ličba mustwow pak wotběhej turněra chětro tyješe, wšako bě kóžde mustwo hač do kónca wužadane a nastajnosći hraješe. W cyłkownje dwanaće přechodach na třoch hrajnišćach nastupi kóždy cyłk šěsć razow. Kóžda hra měješe stajnje dwě sadźbje hač do 15 dypkow. Tu wuslědki předkoła:
Stafla A – předkoło
1. Škit Budyšin 80:68 10:2
2. SGB 11./12. lětnik 88:57 8:4
3. Rapaki 66:80 4:8
4. SGB 12./11. lětnik 60:89 2:10
Stafla B – předkoło
1. Serbscy studenća 89:66 10:2
2. ST Radwor 87:74 8:4
3. Wučerjo Ralb./Work. 73:82 6:6
4. Mustwo 1296 63:90 0:12
Stafla C – předkoło
1. Tachantstwo Budyšin 90:53 12:0
2. Bratrowstwo Róžant 79:53 8:4
3. SGB 10. lětnik 60:86 2:10
4. Ataktikarjo 12-94 49:86 2:10
Widźała,słyšała, napisała (06.02.23)
Awtor dźensa
Tereza Wićazowa
Zwjetša je z tradiciju, zo sej hrajerjo po aktiwnej karjerje rólu trenarja přiwzaja. Tuž nastanje prašenje, hač móže jenož dobry hrajer so z dobrym trenarjom stać? Wšako maja móžnosć, jich wědu a nazhonjenja dale sposrědkować. Paradowy přikład za to je Franz Beckenbauer, kotryž je jako hrajer kaž tež nazwučowar swětowe mišterstwa dobył. Napřećiwny přikład je Lothar Matthäus, kotryž bě drje wuspěšny hrajer, ale jako trenar njeje móhł pře wulke wuspěchi docpěć. Je pak tež dosć nazwučowarjow, kotřiž drje kedźbyhódnu hrajersku karjeru njepokazachu, ale přiwšěm w profijowym businessu wuspěšni běchu. Na přikład Thomas Tuchel, kotryž drje jako hrajer pře wusahowacy njebě, ale jako trenar je na přikład z mustwom Paris Saint-Germain dočasnje mišterstwo a z FC Chelsea champions-league dobył. Wuspěšniši bě José Mourinho, kotryž smědźeše so jako hrajer jenož w druhej portugalskej lize na někotrych partijach wobdźělić. Jako trenar zamó wón z FC Porto a Inter Mailand champions-league dobyć.
Sport (03.02.23)
Stara garda w Delanach
Dźensa wječor wot 18 hodź. hraje w Ralbicach stara serbska koparska garda. Zarjadowar a wuhotowar budźe cyłk starych knjezow Sokoła Ralbicy/Hórki. Woni su sej mustwa Zeleno-běłych Hórki, ST Marijineje hwězdy, SJ Njebjelčicy a SJ Chrósćicy přeprosyli. Sami chcedźa Sokoljo dwaj cyłkaj stajić.
Wo pokal Domowiny
Serbscy Sokoljo třěšneho zwjazka serbskich sportowčow a sportowcow, přewjedu jutře, wot 9 hodź. 38. sokołski wolejbulowy turněr wo pokal Domowiny. Na wurisanju wobdźěli so dwanaće wolejbulowych cyłkow, zakitowar pokala, Serbski dom, njeje so přizjewił.
Winowatostne koparske hry
Prěnje koparske mustwo ST Radwor ma njedźelu dypkowu hru nachwatać. Hrać budźe so w Budyšinje na kumštnym trawniku na Thrombergowej.
04.02. 13:30 SV Módro-běli Zorbau –
Budissa Budyšin
05.02. 13:00 ST Radwor –
ST Horni kraj-Sprjewja
Přihotowanske koparske hry
04.02. 09:30 FSV Budissa Budyšin –
SJ Chrósćicy (młodź. A)
04.02. 14:00 Sokoł Ralbicy/Hórki –
HZ Wóslink/Skaskow
Dowolnosće w Jěžowje dóstać
