29. oktobra so lětni čas skónči a stajimy časnik wot ranja w ...
pjatk, 27. oktobera 2017
spisane wot: Měrćin Weclich
29. oktobra so lětni čas skónči a stajimy časnik wot ranja w třoch na dwěmaj wo hodźinu wróćo. Po woprašowanju forsa je přestajenje za swójby z dźěćimi wužadanje. Foto: SN/Maćij Bulank
Škody tež kónc tydźenja přizjewić
štwórtk, 26. oktobera 2017
spisane wot: Serbske Nowiny
Budyšin (SN). Tež kónc tydźenja a swjate dny chce Budyski krajnoradny zarjad wotnětka zaručić, zo sej sobudźěłaćerjo na městnje škody wobhladaja, hdyž su wjelki wowcy abo druhi skót zakusali. Škody přizjewić móža wobydlerjo wotydźenja w krajnoradnym zarjedźe pod telefonowym čisłom 03591/ 5251 68 001, kónc tydźenja a swjate dny pak we Wojerowskej integrowanej regionalnej dispatcherni pod tel. čo. 03571/ 192 96, kaž krajnoradny zarjad zdźěla.
Mjez wjacorymi prózdninskimi poskitkami Budyskeho Serbskeho muzeja ...
pjatk, 20. oktobera 2017
spisane wot: Dr. Cordula Ratajczakowa
Mjez wjacorymi prózdninskimi poskitkami Budyskeho Serbskeho muzeja bě tež wosebita dźěłarnička „Rjekojo z filca“. Pod nawodom Reginy Herrmannoweje zhotowichu młodźi wobdźělnicy sami pyšne ručne klanki. Regina Herrmannowa je diplomowa designerka, kotraž so wosebje rady figurinam a bajowym postawam wěnuje. Foto: SN/Maćij Bulank
Za filmowy projekt trjebaja šulerjo pomoc
pjatk, 20. oktobera 2017
spisane wot: Marian Wjeńka
Worklecy. 10. lětnik Worklečanskeje wyšeje šule přewjedźe tuchwilu filmowy projekt wo młodźinje za čas NDR. Za to wjedźechu hižo rozmołwy z časowymi swědkami a su jich z pomocu Sakskeho wukubłanskeho a wupruwowanskeho kanala (SAEK) filmowali. Nětko pytaja nuznje priwatne filmowe wurězki na přikład wo rejach, mejemjetanjach, swójbnych swjedźenjach, šulskich zachodach a wuchodach, wo firmowanju, młodźinskej swjećbje abo kwasach. Runočasnje proša wo dowolnosć, filmowy material w swojej dokumentaciji wužiwać směć. Štóž móhł pomhać, njech přizjewi so pod telefonowym čisłom 035796/96 831.
Gmejnscy radźićeljo so zetkaja
srjeda, 18. oktobera 2017
spisane wot: Marian Wjeńka
Róžant/Chrósćicy/Njebjelčicy. We wobłuku gmejnow zarjadniskeho zwjazka Při Klóšterskej wodźe wotměja so jutře, štwórtk, tři posedźenja gmejnskich parlamentow. Tak zetkaja so čłonojo gmejnskeje rady Ralbicy-Róžant we 18.30 hodź. w Róžeńčanskej sydarni. Na jich dnjowym porjedźe mjez druhim steji, zo chce wjesnjanosta wopodstatnić nuzowy rozsud nastupajo Ralbičansku kormjernju swini. Dale chcedźa radźićeljo wjesnjanostu społnomócnić, zo smě přepodać nadawk za instalaciju elektroniskeho zwonjenja při Konječanskej kapałce.
W 19.30 hodź. zetkaja so jutře čłonojo Chróšćanskeje gmejnskeje rady, a to w sydarni „Łužica“. Tam chcedźa na přikład diskutować wo přetwarje a znowawužiwanju Chróšćanskeje stareje šule na gmejnski a kulturny centrum. Nimo toho wobjednawaja wustawki wo čisłowanju domow. Zjawnemu dźělej přizamknje so njezjawny.
Při hatach ptački wobkedźbować
srjeda, 18. oktobera 2017
spisane wot: Marian Wjeńka
Njeswačidło. Na ekskursiju cyle w znamjenju najwšelakorišich družin ptačkow přeprošuje Kamjenski Muzej zapadneje Łužicy njedźelu, 22. oktobra, we 8 hodź. Marko Zischewski z Njeswačanskeje ptačernje powjedźe wobdźělnikow podłu tamnišich hatow. Te su nětko rybjacych žnjow dla wotpušćene a přiwabjeja ptački po stach a tysacach, dokelž nadeńdu wone tam wulke mnóstwo insektow, jich larwow a małych rybičkow jako picu. Wobdźělenje płaći štyri eura, potuńšene 2,50 eurow. Při přizjewjenju pod telefonowym čisłom 03578/ 788 30 zajimcy zhonja, hdźe so ekskursija započnje.
Swjeća jubilej
wutora, 17. oktobera 2017
spisane wot: Marian Wjeńka
Haslow. Swoje 110lětne wobstaće swjeći chór Lipa sobotu, 28. oktobra, w 19.30 hodź. na Haslowskej žurli. Tam chcedźa spěwarki a spěwarjo swój šěroki repertoire na wotměnjace wašnje předstajić. Na publikum čakaja znate štučki runje tak kaž nowe zynki. Zhromadnje z instrumentalistami je chór lóštny a pisany wječor spřihotował. Po tym budu reje ze skupinu Con-takt. Kartki dóstanu zajimcy pola Chróšćanskeho časnikarja Jürgena Njeka za dźesać eurow abo při wječornej kasy za dwanaće eurow. Komuž so termin jubilejneho koncerta njehodźi, dožiwi Lipjanow njedźelu, 5. nowembra, w 15.30 hodź. na nazymskim koncerće we Wojerowskim wobydlerskim centrumje Piwarska hasa 1.
Andrea Hartkopf (zady) je dźensa dopołdnja we Wojerecach prěni ...
pjatk, 13. oktobera 2017
spisane wot: Janek Wowčer
Andrea Hartkopf (zady) je dźensa dopołdnja we Wojerecach prěni trampolinowy park cyłeje Hornjeje Łužicy wotewriła. „Jump up“ nowy sportowy areal rěka a je na Otta Nagelowej zaměstnjeny. Z trampolinowym parkom je sej Wojerowčanka dalši són spjelniła. Hižo před lětomaj bě předewzaćelka we Wojerecach prěnje indoor-hrajkanišćo z mjenom Tobix wotewrěła. Za swój nowy projekt je cyłkownje 600 000 eurow nałožiła. Andrea Fliegner (prědku) je nowostku hižo raz wuspytała. Foto: Silke Richter
Na Dnju němskeje jednoty měješe nowa inscenacija Budyskeho ...
pjatk, 06. oktobera 2017
spisane wot: Janek Wowčer
Na Dnju němskeje jednoty měješe nowa inscenacija Budyskeho Němsko-Serbskeho ludoweho dźiwadła „Muzej Němcow“ premjeru. Jenož hodźiny pozdźišo je zarjadowanje hižo prěnju wjetšu diskusiju zbudźiło. Štóž chce wědźeć, wo čo w kruchu dźe, a chcył tež sobu rěčeć, njech přichodne předstajenje dźensa w 19.30 hodź. w Dźiwadle na hrodźe njeskomdźi. Dalši króć pokazaja inscenaciju potom 15. oktobra w 17 hodź. na samsnym městnje. Foto: SN/Maćij Bulank
Ćišćernja zašła
pjatk, 06. oktobera 2017
spisane wot: Měrćin Weclich
Budyšin (SN). „Dźěławosć Łužiskeje ćišćernje je wot 31. awgusta 2017 zastajena.“ Z tymile słowami wozjewi insolwencny zarjadnik, Drježdźanski prawiznik dr. Martin Dietrich, zbywacym sobudźěłaćerjam kónc Budyskeje Łužiskeje ćišćernje. Tak skónčichu so runočasnje stawizny zawoda, kotryž steješe kaž lědma druha institucija za serbske kulturne a politiske stawizny po lěće 1945. Wuhladko poda so na historiske slědy nastaća ćišćernje a slědźi za pozadkami bankrota. Dalša tema magacina je 25lětne skutkowanje Marje Michałkoweje w zwjazkowym sejmje. To a wjace zhoniće jutře, 7. oktobra, wot 11.45 hodź. w telewiziji MDR.
