Paduši we wobchodźe
Budyšin. Mějićel wobchoda na Budyskej Sukelnskej dyrbješe předwčerawšim rano zwěsćić, zo běchu so w nocy do toho pola njeho njeznaći zadobyli. Dokładnje běchu to štyrjo, kotřiž so namócnje do wobchoda łamachu. Wobstražowanska kamera je wšitko natočiła. Paduši pokradnychu po informacijach policije 25 mobilnych telefonow, dwaj telewizoraj, dwě hrajnej konsoli kaž tež dwaj laptopaj. Rubizna ma cyłkownu hódnotu něhdźe 10 000 eurow. Načinjenu wěcnu škodu trochuja na něhdźe 300 eurow. Kriminalny technikar móžeše zawostajene slědy zawěsćić.
Bróń a municiju namakali
Wětrow. Hižo minjeny štwórtk je policija ležownosć we Wětrowje přepytała. Pola 53lětneho wobsedźerja namakachu wjetše mnóstwo sušenych konopowych rostlin, kaž policija hakle nětko zdźěli. Na to sej cyły objekt bliže wobhladachu, při čimž zasadźichu nimo policajskeho psa tež skupinu USBV. Ta zaběra so z njekonwencionelnymi rozbuchadłami. Mjez druhim namakachu ilegalne praskotaki, municiju a bróń. Při njej jedna so wo karabiner typa 98K. Wětrowčan změje so nětko wjacorych deliktow dla zamołwić.
Ze 4 promilemi z kolesom jěł
Wojerecy. Trochu jara hłuboko do piwoweje škleńcy hladał je muž, kotrehož policisća njedźelu wječor we Wojerecach zadźeržachu. Napadnył wón bě, dokelž z kolesom na lěwym boku dróhi do napřećiwneho směra jědźeše, a to dosć njewěsće. Test wunjese pola njeho 4,06 promilow alkohola w kreji.
W sportowni kóncowali
Budyšin. We wčerawšich rańšich hodźinach wołachu policiju na Budysku Ebertowu. Po wuprajenju swědkow bě z tamnišeje sportownje wótře wołanje słyšeć a kak něchtó škleńcu rozbiła. Zastojnicy zwěsćichu při swojej kontroli w twarjenju dohromady sydom skóncowanych woknow. Byrnjež policisća we wokolinje hale intensiwnje pytali, njemóžachu skućićelow namakać. Wěcnu škodu trochuja na něhdźe 7 000 eurow.
Zadobywanje zwrěšćiło
Wojerecy. W nocy na sobotu chcychu so njeznaći do Wojerowskeho mebloweho domu zadobyć. To pak so jim njeporadźi. Přiwšěm nasta tysac eurow škody.
Při wohenju zemrěł
Rěčicy. Z dotal njeznateje přičiny je w nocy na štwórtk w Rěčicach woheń w bydlenskim domje wudyrił. Płomjenja wuchadźachu ze stwy w přizemju. 72 wobornikow bě při hašenju zasadźenych. Při tym namakachu w bydlenju mortweho muža.
Paducha wuhnał
Kulow. Wobsedźer jednoswójbneho domu w Kulowje je wutoru paducha wuhnał. Kaž policija zdźěli, je njeznaty krótko po 9 hodź. wokno namócnje wočinił a so tak do domu dóstał. Tole słyšeše wobsedźer na hornim poschodźe, dźěše dele za prawym hladać a tak paducha překwapi. Tón hnydom zaso z woknom won zalěze a ćekny. Wot njeho načinjena wěcna škoda wučinja něhdźe 500 eurow. Skućićel je po wopisanju Kulowčana něhdźe 1,60 metrow wulki a šwižneje postawy. Wón bě ćmowe joggingowe cholowy z běłymi smuhami woblěkany. Swědkojo njech přizjewja so pod 03571/ 46 50.
Spinadło přićahnyć zabył
Ćichońca. 52lětny parkowaše swój Toyota předwčerawšim na Wojerowskej dróze w Ćichońcy, zaby pak spinadło přićahnyć. Wosobowe awto kuleše so přez dróhu a zrazy na priwatnu ležownosć. Při tym skóncowa wone wjacore rostliny, listowy kašćik a fasadu dwójneho domu. Škodu trochuja na něhdźe 7 000 eurow.
Awtomat rozbuchnyli
Biskopicy. Njeměrnu nóc drje mějachu wobydlerjo Biskopičanskeje Cyrkwinskeje hasy w nocy na njedźelu. Krótko do 4 hodź. jich mócny wrjeskot ze spara wutorhny. Njeznaći běchu w tym wokomiku cigaretowy awtomat rozbuchnyli. Kaž policija zdźěli, je detonacija awtomat dospołnje skóncowała. Tohodla tež njeje jasne, hač móžachu skućićeljo cigarety spakosćić abo nic. Tohorunja znate njeje, hač móžachu njeznaći pjenjezy z awtomata sobu wzać. Dźěle awtomata su terasu a kwětkace sudobja bliskeho hosćenca wobškodźili. Dohromady nasta něhdźe 8 000 eurow wěcneje škody.
Trezor kradnyć zwrěšćiło
Budyšin. Sprjewinu kupjel w Budyšinje su sej njeznaći předwčerawšim rano za padustwo wupytali. Po wšěm zdaću pak su alarma dla ćeknyli. Kaž policija pozdźišo zwěsći, běchu so skućićeljo na předawanišćo zakuskow měrili. W nim drje chcychu trezor pokradnyć, štož pak so jim njeporadźi. Přiwšěm nasta nimale 3 500 eurow wěcneje škody.
Solarne platy pokradnyli
Wojerecy. Njeznaći paduši běchu w nocy na wutoru na Wojerowskej Semmelweisowej po puću. Z wjacorych ležownosćow pokradnychu woni solarne platy, wobstražowanske kamery a elektriske nastroje, z kotrymiž hodźi so lisćo na hromady duć. Po wšěm zdaću běchu skućićeljo lačni, přetož woni wzachu tež wjacore bleše cola sobu. Kelko škody su cyłkownje načinili, z policajskeje rozprawy bohužel njewuchadźa.