Policija (06.01.22)
Rentnarce tobołku pokradnyli
Łaz. 78lětna žona je so předwčerawšim z woporom paduchow stała. Wona bě w kupnicy nakupować a je swoju tobołku w nakupowanskim wozyčku po wšěm zdaću wokomik z wočow zhubiła. Tón wšak skućićeljo wužichu a tobołku spakosćichu. W njej běchu nimo wosobinskich wěcow móšeń ze sto eurami a dokumenty rentnarki. Sobudźěłaćerka kupnicy informowaše policiju, kotraž je so wo wšo dalše starała.
Kołp znjezbožił
Běła Woda. Z njewšědnym padom je so wobydler předwčerawšim pola Běłowodźanskeje policije přizjewił. Wón rozprawješe wo znjezboženym kołpju při bywšej cyhelerni. Wulki ptak bě tam někak njezbožownje přizemił a so w płoće zapopadnył. Zastojnicy jeho wuhladachu a informowachu Běłowodźanski zwěrjenc. Tamniši sobudźěłaćerjo so wo kołpja starachu a jeho samsny dźeń zaso na swobodu pušćichu.
Policija (05.01.22)
Tři delikty naraz
Budyšin. Dobry čuch mějachu policisća předwčerawšim popołdnju, jako na Budyskej Curiejowej wosobowe awto typa Škoda zadźeržachu. Při kontroli 26lětneho šofera so wukopa, zo wón scyła žanu jězbnu dowolnosć njewobsedźi. Dale reagowaše přewjedźeny drogowy test pozitiwnje na amfetaminy. A nimo toho měješe młody muž snadne mnóstwo crystala při sebi. Na to zastojnicy přikazachu, zo ma wón krej wotedać, su awtowy klučik kaž tež drogi sćazali a wupisachu wjacore přizjewjenja.
Dźiwje swinjo do awta policije dyriło
Sprjewiny Doł. We wčerawšich rańšich hodźinach je dźiwje swinjo wobsadku policajskeho awta překwapiło. Zastojnicy běchu hižo rano zahe w Sprjewinym Dole po puću, jako ranca nadobo přez puć běžeše a do duri wodźerja jězdźidła dyri. Na zbožo nasta jenož něhdźe 300 eurow wěcneje škody, policisća w awće so njezranichu.
Policija (04.01.22)
Kružny wobchad přewidźał
Słona Boršć. Nowy kružny wobchad pola Słoneje Boršće je předwčerawšim wječor šofer VW Phaetona po wšěm zdaću přewidźał a z wotmachom na připrawjenu hórku zajěł. Wodźerja a sobu jěducu dyrbjachu wobornicy z jězdźidła wućahnyć. Jeju dowjezechu do chorownje.
Policija (03.01.22)
Wandalizm na torhošću
Biskopicy. Njewšědnje sylny praskotak drje běchu silwester krótko do połnocy w Biskopicach wužiwali. Jako tón na torhošću rozbuchny, buštej swětłomjetak kaž tež dźesać metrow zdalena wěstotna škleńca skóncowanej. Škoda wučinja 1 500 eurow.
Telefonowy rozdźělak powalili
Žičeń. Jeničce na kóncowanje wusměrjeni běchu njeznaći w prěnich hodźinach noweho lěta w Žičenju (Seitschen) w Hodźijskej gmejnje. Tam powalichu woni rozdźělowanski kašćik telekomunikaciskeho předewzaća a wutorhnychu tež hišće kable z njeho. Nimo toho rozbichu wokna busoweje čakarnje. Cyłkownje načinichu 1 200 eurow škody.
Listowy kašćik rozbuchnjeny
Budyšin. Po wšěm zdaću z pyrotechniku su njeznaći w silwesterskej nocy listowy kašćik na Budyskej Schäfferowej rozbuchnyli. Wěko kašćika bu wutłóčene a prasny do blisko stejaceho Forda. Dźěle listoweho kašćika wobškodźichu dalše wosobowe awto. Cyłkownu škodu trochuja na něhdźe 1 850 eurow.
Policija (30.12.21)
Drohu techniku pokradnyli
Wulke Ždźary. Na twarnišću we Wulkich Ždźarach dyrbjachu předwčerawšim dopołdnja zwěsćić, zo běchu tam w nocy do toho paduši pobyli. Woni běchu so do wjacorych twarskich kontejnerow zadobyli a 2 000 eurow wěcneje škody načinili. Pokradnyli su po informacijach Zhorjelskeje policajskeje direkcije měrjensku techniki w hódnoće 35 000 eurow.
Policija (29.12.21)
Powětrowki pokradnyli
Židźino. Z třělnišća při zwjazkowej dróze B 97 pola Židźinoho su njeznaći wjacore powětrowki pokradnyli. W času wot njedźele do póndźele dopołdnja so woni do kompleksa namócnje zadobychu a wzachu tři dołhe a jednu krótku třělbu sobu.
Policija (28.12.21)
Přepytuja zapalerstwa dla
Kamjenc. Wšo druhe hač měrny wukónc hodownych swjatych dnjow mějachu wohnjowi wobornicy předwčerawšim wječor w Kamjencu. Wobydler bě kameradow alarmował, dokelž so z pincy wjaceswójbneho domu na Schillerowej mócnje kurješe. Po tuchwilnych dopóznaćach bě něchtó spytał, styroporowu izolaciju w pincy bydlenskeho domu zapalić. Kur so po wšej pincy rozpřestrě, woheń pak so žadyn zapalił njeje, tak zo přichwatanych 30 wobornikow hadźicy zasadźić njetrjebaše. Woni jeničce pincu a prěni poschod twarjenja porjadnje přewětrichu. Wobydlerjo móžachu na to zaso do swojich bydlenjow. Byrnjež jenož něhdźe 50 eurow wěcneje škody nastało, kaž policija zdźěli, přepytuja tónle pad dla pospytneho ćežkeho zapalerstwa.
Policija (27.12.21)
Do hosćenca so zadobyli
Budyšin. Ani na hodownych swjatych dnjach njemějachu policisća žanu přestawku, ale dyrbjachu so kaž hewak w běhu lěta ze zadobywanjemi zaběrać. Tak su so njeznaći w nocy na sobotu do hosćenca na Budyskim Schreberowym puću łamali. W lokalu wšitke rumnosće přepytachu. Nastata wěcna škoda wučinja něhdźe 1 500 eurow. Hač su zadobywarjo něšto pokradnyli, policija hišće přepytuje.
Awće do so prasnyłoj
Wochozy. Ćežke wobchadne njezbožo sta so patoržicu wječor na zwjazkowej dróze B 156 při wotbóčce do Wochoz. Krótko po 22 hodź. zrazyštej tam wosobowej awće nimale frontalnje do so. Wjacore wosoby so zranichu. Jich dowjezechu do wokolnych chorownjow.
Zbožo w njezbožu měli
Policija (22.12.21)
Drohi Hyundai pokradnyli
Budyšin. Wobsedźer wosoboweho awta marki Hyundai so póndźelu njemało dźiwaše. Awto, kotrež běše wón w měšćanskim dźělu Nadźanecach (Nadelwitz) na Delnjokinjanskej wotstajił, tam hižo njebě, jako chcyše z nim wotjěć. Paduši běchu je po wšěm zdaću tón dźeń w času wot 5 do 14.15 hodź. pokradnyli. Aktualna hódnota jězdźidła wučinja 21 000 eurow. SUV bě něhdźe lěto stary. Wosebita komisija z mjenom „Kfz“ nětko mjezynarodnje za Hyundaijom pyta.
