Policija (10.11.21)
Z wobchoda do jastwa
Kamjenc. 46lětny muž je předwčerawšim wječor w Kamjencu z předawanišća direktnje do jastwa zaćahnył, dokelž bě we wobchodźe žiwidła w hódnoće 50 eurow kradnył. Přistajeni drje to pytnychu, jim napřećo pak so paduch agresiwnje zadźerža. Wołachu tuž policiju wo pomoc. Při přepruwowanju zastojnicy zwěsćichu, zo přećiwo mužej dwaj wukazaj zajeća předležeštej. Dokelž 46lětny žadanu třicyfrowu sumu pjenjez zwjesć njemóžeše, dowjezechu jeho po runym puću do jastwa.
Policija (09.11.21)
Njezboža z dźiwinu
Rakecy. Wjacore wobchadne njezboža z dźiwinu su so wot njedźele wječora do wčerawšeho ranja na teritoriju Wojerowskeho policajskeho rewěra stali. W Rakecach je 20lětnej žonje sorna do awta skočiła. We Wětnicy je 62lětnemu wodźerjej Lkw-ja dźiwje swinjo před kolesa zaběžało. A na zwjazkowej dróze B 97 pola Čorneho Chołmca chcyše so sorna z transporterom měrić, štož pak njepřežiwi.
Policija (08.11.21)
Přepytuja přičinu wohenja
Budyšin. Dale njejasna je přičina wohenja, kotryž bě w nocy na njedźelu pod třěchu wjaceswójbneho domu na Budyskej Šulerskej hasy wudyrił. Płomjenja hašało je nimale 70 wobornikow z jědnaće jězdźidłami. Z potrjecheneho domu ewakuowachu dźesać wosobow. Woni tam najprjedy raz dale bydlić njemóža. Tež 13 ludźi ze susodneho domu dyrbješe won. Woni pak móžachu po hašenju zaso do swojich bydlenjow.
Policija (05.11.21)
Kukuricu na puću zhubił
Halštrow. K njewšědnemu zasadźenju wołachu dobrowólnych wohnjowych wobornikow předwčerawšim wječor na statnu dróhu S 94 mjez Halštrowom a wotbočku do Pančic-Kukowa. Tam bě traktorist něhdźe tonu kukuricy zhubił. Ta so po cyłej šěrokosći puća rozpřestrě, tak zo statnu dróhu nachwilnje dospołnje zawrěchu. Wobornicy dyrbjachu kukuricu na kromu zesuwać. Zranił so nichtó njeje. Po prěnim přepytowanu wuchadźeja z toho, zo traktorist kukuricu prawje zawěsćił njebě.
Policija (04.11.21)
Z alkoholom njezbožo zawinował
Kamjenej. Zaso raz bě čert alkohol sobu wina na wobchadnym njezbožu, kotrež je so předwčerawšim blisko Kamjeneje pola Radworja stało. 61lětny wodźer Opela bě na wokrjesnej dróze do směra na Wulku Dubrawu po puću, jako na prawy bok jězdnje zajědźe a hakle po 500 metrach zasta. Na awće a na wobchadnym znamjenju nasta 5 500 eurow škody. Při wobdźěłanju njezboža policisća pytnychu, zo bě muž alkohol pił a naměrichu pola njeho 1,56 promilow. Jězbna dowolnosć muža bě tuž fuk.
Policija (03.11.21)
Tobołku pokradnyli
Kamjenc. Z njewšědnym padustwom zaběra so policija w Kamjencu. We wobchodźe na Cyrkwinskej hasy je so předwčerawšim připołdnju tobołka z rumnosće za sobudźěłaćerjow zhubiła. Po informacijach policije bě w tobołce móšeń z wupokazami, kartami a něhdźe 800 eurami. We wobchodźe běštej w tym času dwě žonje. Něhdźe dwě hodźinje pozdźišo wuhladachu samsnu tobołku w druhim wobchodźe. Pjenjezy pak w njej hižo njeběchu. Nětko pyta policija swědkow, kotřiž su předwčerawšim na Kamjenskej Cyrkwinskej hasy snano něšto podhladneho wobkedźbowali.
Bjez dowolnosće a zawěsćenja
Wojerecy. Hnydom wjacore delikty skućił je šofer Volvowa, kotrehož policisća předwčerawšim we Wojerecach kontrolowachu. 46lětny sprěnja scyła žanu jězbnu dowolnosć njeměješe. Zdruha jeho jězdźidło přizjewjene a střeća tež zawěsćene njebě. Dale jěć Wojerowčan wězo njesmědźeše.
Policija (02.11.21)
Z rewěra do jastwa
Wojerecy. To drje sej 25lětny Wojerowčan předwčerawšim rano myslił njeje, zo budźe hišće samsny dźeń w jastwje přenocować dyrbjeć. Wón zjewi so na Wojerowskim policajskim rewěrje, zo by ramikowe čisło kolesa přepruwować dał. Pječa chcyše tele koleso pola eBay kupić. Policisća zwěsćichu, zo bě groćany konik pokradnjeny a zo za nim pytaja. Ale tež młody muž sam bu z přikazom zajeća pytany, tak zo dowjezechu jeho do jastwa. Pokradnjene koleso namakachu pozdźišo pola njeho doma a nic pola eBay. Nětko móža koleso prawemu wobsedźerjej zaso wróćić.
Policija (01.11.21)
Wulka škoda lisća dla
Manjow. Zasadźenje dobrowólnych wohnjowych wobornikow a wulka wěcna škoda běštej wuslědk ideje, kotruž měješe sobotu popołdnju muž w Manjowje (Mönau) pola Delnjeho Wujězda. Wón chcyše na swojej ležownosći lisćo spalić. Jako so krótki čas wot wohenja wotsali, přeskočichu płomjenja wětřika dla na fasadu pódlanskeho twarjenja. Ta bu na to sylnje wobškodźena. K hašenju přijědźe nimale 60 kameradow wokolnych wohnjowych woborow. Kelko škody je dokładnje nastało, njejsu fachowcy hišće wobličili, trochuja pak ju na wjacore 10 000 eurow.
Wopity z awtom jěł
Lejno. Dobry čuch mějachu sobotu popołdnju policisća w Lejnje, jako tam nimojěducych šoferow zadźeržachu a kontrolowachu. Mjez druhim dyrbješe 57lětny wodźer Peugeota zastać. Jako jeho zastojnicy narěčachu, jim napadny, zo muž chětro za alkoholom wonješe. Při alkoholowym tesće naměrichu pola njeho 1,14 promilow alkohola w kreji. Na to policisća přikazachu, zo ma muž krej wotedać, zo móhli dokładnje zwěsćić, kelko bě wón pił. Jeho jězbnu dowolnosć zastojnicy wězo sćazachu.
Policija (29.10.21)
Něchtó na bus třělił
Wulke Ždźary. Njemało stróžił je so předwčerawšim wječor něhdźe w 20 hodź. wodźer busa na Kobličanskej dróze we Wulkich Ždźarach. Wosrjedź jězby zasłyša 59lětny wutřěl pistole a samsny wokomik so jedne z woknow jeho busa rozbi. Přiwołana policija namaka w škleńcy wokna zatřělowu dźěru, kotruž kriminalni technikarjo bliže přepytowachu. Hač su tež projektil namakali, z policajskeje rozprawy njewuchadźa. Wěcna škoda wučinja něhdźe 2 000 eurow. Tónle pad přepytuje policija nětko přećiwo njeznatej wosobje pospytneho strašneho zranjenja ćěła dla.
Policija (28.10.21)
Awtomat rozbuchnyli
Budyšin. Cigaretowy awtomat na Budyskej Weinertowej su njeznaći we wčerawšich rańšich hodźinach rozbuchnyli. Pjenjezy a cigarety woni sobu wzachu a so do njeznateho směra zminychu. Hódnota rubizny njeje hišće doskónčnje zwěsćena. Wot swědka informowani wzachu policisća zbywace cigarety a skóncowany awtomat sobu.
