Smjertnje njezbožił
Budyšin. Pjatk wokoło 23.30 hodź. bě šofer motorskeho po zwjazkowej dróze B 156 do směra na zajězd awtodróhi Budyšin-wuchod po puću. W dołhej křiwicy zjědźe wón z jězdnjenje, zrazy do nabóčneje planki a na to do štoma. Jako prěni wuchowarjo městno njezboža docpěchu, běše muž hižo bjez wědomja. Woni drje jeho reaniměrowachu, ale bjez wuspěcha, wón hišće na městnje wudycha. B 156 běše dlěje hač dwě hodźinje zawrjena.
Kedźbliwa sobudźěłaćerka
Pančicy-Kukow. Sobudźěłaćerka nakupowanišća w Pančicach-Kukowje je srjedu wobšudnistwu zadźěwała. Cuzy muž bě rentnarjej telefonisce dobyće 38 000 eurow přilubił, kupi-li wón tři Google-Play-kartki po sto eurach a hdyž jemu wotpowědne čisła posrědkuje. Předawarka pak wuměnkarja na zbožo wot toho wotdźerža. Kriminalna policija přepytuje.
Polo w płomjenjach stało
Wojerecy. Wčera popołdnju wokoło dwěmaj dyrbješe wohnjowa wobora z Wojerec woheń na polu při Kamjenskim wobłuku hašeć. Tam je něhdźe 400 kwadratnych metrow role w płomjenjach stało. Spěšne zapřimnjenje wobornikow jich rozpřestrěću na zbožo zadźěwa. Kak bě k wohenjej dóšło, njeje dotal jasne. Policija přepytuje zapalerstwa dla.
Awto so paliło
Póckowy. Tež w Póckowach je so wčera paliło. Hižo rano napoł dwěmaj dyrbjachu dobrowólni wohnjowi wobornicy z Póckowow, Smělnje a Wjazońcy kaž tež z Biskopic pod carportom palace so wosobowe awto marki Seat hašeć. Kameradojo zamóchu woheń spěšnje zhašeć. Awto njehodźi so hižo wužiwać, tež carport dyrbja zwottorhać. Policisća wuchadźeja z toho, zo bu woheń wotpohladnje zamiškrjeny.
Kedźbliwi swědcy pomhali
Wojerecy. Na Edisonowej we Wojerecach su předwčerawšim wječor wokoło wosmich třo swědcy zadobyće do lawby wobkedźbowali. 34lětny muž bě so tam namócnje zadobył a wšelake kamory přerył. Susodźa-zahrodkarjo słyšachu haru, chwatachu k potrjechenemu objektej a su zadobywarja narěčeli. Tón skoči z woknom a chcyše z kolesom ćeknyć, padny pak do bliskeje hrjebje. Swědcy móžachu jeho zadźeržeć a wołachu policiju, kotraž so dale wo naležnosć staraše. Při přepytowanju drje njejsu zastojnicy pola muža žanu rubiznu namakali, wón pak měješe nóž při sebi. Hač je to za chłostanje relewantne, statne rěčnistwo pruwuje.
Z městna njezboža ćeknyłoj
Wojerecy. We Wojerecach je njedźelu popołdnju na Teschenskej a samsny dźeń wječor na Halštrowskej k njezbožu dóšło. Mějićel na Teschenskej wotstajaneho Fiata bě zwěsćił, zo je wone wobškodźene. Dotal njeznate jězdźidło bě je tušěrowało a wěcnu škodu 1 500 eurow načiniło. 34lětny šofer awta marki Audi měješe na Halštrowskej tohorunja z dotal njeznatym skućićelom činić. Motorski bě na Audi zjěł, kotryž dyrbješe wobchada dla zastać. Škodowany poda so po zražce na bliske tankowanišćo, zo njeby městnosć njezboža blokował a zo by rozměr škody zwěsćił. Wón bě z toho wuchadźał, zo wodźer módreje MZ za nim jědźe. Tón pak bě so zminył. Na Audiju nastata škoda wučinja něhdźe 200 eurow. Policija přepytuje we woběmaj padomaj ćeknjenja z městna njezboža dla.
Z pokradnjenym awtom po puću
Při dźěle znjezbožił
Róžant. W Róžeńće je minjeny pjatk dopołdnja, krótko do napoł dwanaćich, 70lětny muž dźěłowe njezbožo poćerpjeł. Pomocnicy a policija chwatachu na městno njezboža. Šofer sedłoweho wlečaka bě na nakładowansku płoninu zalězć chcył, stajiwši sej za to rěbl k awtu. Rěbl pak so wotsuny, muž padny z wysokosće něhdźe něhdźe połdra metra na zemju a zrazy z hłowu wo nju. Při tym so wón ćežko zrani. Wuchowarjo dowjezechu jeho z helikopterom do kliniki w Drježdźanach.
Na hrajkanišću stejo wostał
Wojerecy. Njewšědne wobchadne njezbožo je so předwčerawšim na Collinowej we Wojerecach stało. Po informacijach swědkow bě 79lětny wodźer VWja najprjedy rjećaz k wobhrodźenju parkowanišća přełamał. Na to jědźeše wón dale přez kerčinu a je skónčnje při stołpje čumpjele na susodnym hrajkanišću stejo wostał. Při alkoholowym tesće zwěsćichu, zo měješe rentnar 0,36 promilow alkohola w kreji. Škoda wučinja 3 600 eurow.
Mazda pokradnyli
Kamjenc. Na swětłym dnju je so srjedu wosobowe awto typa Mazda w Kamjencu zhubiło. Čerwjene jězdźidło w hódnoće 25 000 eurow steješe při Garnizonskim naměsće. W 17 hodź. bě je mějićel wopušćił, dobre połdra hodźiny pozdźišo bě awto fuk. Wosebita komisija za jězdźidła pad přepytuje a je CX-5 mjezynarodnje za pytanje wupisała.
Wopita znjezbožiła
Poršicy. Pře wšu měru alkoholej přirěčała bě žona, kotraž předwčerawšim wodźidło swojeho awta hižo pod kontrolu njeměješe. 32lětna wodźerka Peugeota je na awtodróhowym mosće w Poršicach w Kubšiskej gmejnje najprjedy do praweho a na to do lěweho wobhrodźenja zrazyła. Wona pak dale jědźeše a w Poršicach do wjacorych nakromnych kamjenjow zajědźe. Wobškodźenjow awta dla wšak skónčnje hižo dale jěć njemóžeše. Policisća naměrichu pola njeje 2,3 promile alkohola.
Trik na zbožo njefungował
Wojerecy. Kedźbliwa rentnarka z Wojerec je předwčerawšim tomu zadźěwała, zo při telefoniskim wobšudnistwje wjele pjenjez přisadźi. Pozdatna přećelka bě ju zazwoniła a wo 25 000 eurow prosyła, kotrež pječa trjeba, zo móhła sej swójske bydlenje kupić. Rentnarka jej sumu najprjedy připraji a pjenjezy samo pola swojeje banki skaza. Dokelž pak sej přiwšěm wěsta njebě, hač je wšitko w porjadku, pola swojeje woprawdźiteje přećelki zazwoni a tak so wšitko wujasni, dokelž wona wo ničim njewědźeše.
6 000 eurow w spódnich cholowach
Wóspork. Bjez dowolnosće w Němskej dźěłał bě muž z Ukrainy, kotrehož je zwjazkowa policija předwčerawšim dopołdnja w busu na awtodróze A 4 pola Wósporka lepiła. Wuprajenja 43lětneho, što je w Němskej činił a dokal chce, so spřećiwjachu. Při kontroli namakachu na to 6 000 eurow, kotrež měješe Ukrainjan w spódnich cholowach schowane. Wot toho policisća 400 eurow sćazachu a kazachu mužej domoj jěć. Přiwšěm hišće chłostanske jednanje na njeho čaka.
Wobšudnicy 70 000 eurow wulišćili
Žitawa. Njeznaći su minjeny štwórtk w Žitawje rentnarskimaj mandźelskimaj 70 000 eurow wulišćili. Při telefonje jimaj wěsty „knjez Meier“ napowěda, zo běštaj dźowka a přichodny syn wobchadne njezbožo zawiniłoj, při kotrymž je so dźěćo ćežko zraniło. Mandźelskaj měještaj wšě swoje nalutowane pjenjezy jako kawciju přewostajić, zo njebyštaj „zawinowarjej“ do jastwa dyrbjałoj. Pozdźišo přińdźe „knjez Kowalski“ k rentnarjomaj, wotewza pjenjezy a so z nimi zhubi. Wšón čas njejsu njeznaći jeju wot telefona pušćili.