Frankfurt n. M. (B/SN). Při naprašowanju 53 000 wosom- do dwanaćelětnych dźěći w 15 krajach podachu rumunske dźěći na skali hač do dźesać dypkow derjeměća najwyšu hódnotu 9,5, kaž rěka w studiji Frankfurtskeje uniwersity Children’s world. Na druhim a třećim městnje skale derjeměća steja dźěći Kolumbiskeje (9,3) a Israela (9,2). Němska leži w delnjej połojcy ze srjedźnej hódnotu 8,6.
Wjeršk G 7 překwapił
Garmisch-Partenkirchen (B/SN). Předsyda rady Ewangelskeje cyrkwje w Němskej Heinrich Bedford-Strohm je wot wuslědkow wješkoweho zetkanja G 7 wulce překwapjeny. „Wosebje nastupajo škit klimy su statni a knježerstwowi šefojo jasne znamjenja sadźili. Wažna kročel tež je, zo chcedźa staty G 7 hač do lěta 2030 na 500 000 ludźom pomhać, zo njebychu wjace hłód tradali“, rjekny Bedford-Strohm. Za to trěbne pak su krute připrajenja. K tomu tež słuša, zo so wuwićowa pomoc skónčnje na 0,7 procentow z nutřkokrajneho bruttoprodukta zwyši.
Žadaja sej kónc namocy
Nowe zasadźenje za stare policajske uniformy: Něhdźe 150 zelenych kombinowanych woblekow za motorskich su po naćiskach studentow modoweho designa z Hannovera na wjace hač 500 modernych tobołow předźěłali. Tak nastachu mjez druhim etwije za mobilne telefony, nachribjetniki a pućowanske toboły. Delnjosakski nutřkowny minister Boris Pistorius (SPD) wudźěłki wčera prezentowaše, mějo je za „cool“. Toboły zhotowjeja w dźěłarni zbrašenych. Wunošk je za załožbu, kotraž dźěło zbrašenych podpěruje.
Prěni króć w swojich 117lětnych stawiznach chce Hamburgski wjesłowanski klub Germania nětko tež žonam zmóžnić do kluba zastupić, pišu Hamburgske nowiny. Nastorčiło wšak bě to měšćanske zarjadnistwo. Wone wjaza spěchowanske srědki za twar noweho kluboweho domu na tele wuměnjenje.
Předstaja němsko-pólski projekt
Zhorjelc (SN/ch). Wuměłske naćiski němsko-pólskeho projekta „Görlitzer ART“ su wot dźensnišeho na Johannesa Wüstenowej žurli Barokneho domu Nysowa 30 widźeć. Na wotewrjenje witachu tež wosom wuměłcow z Pólskeje, kotřiž běchu za zjawny rum města Zhorjelca wuměłske twórby naćisnyli. Wot 1. apryla 2016 hač do 1. apryla 2017 chcedźa je potom na markantnych městnach města nad Nysu pokazować. „Görlitzer ART“ je projekt Zhorjelca a Wrócławja. Tamniši měšćanski prezident Rafał Dutkiewicz a Zhorjelski wyši měšćanosta Siegfried Deinege (njestronjan) staj dźensa wotpowědne dojednanje podpisałoj. Kooperacija je zapołožena jako satelitowy projekt za program europskeje kulturneje stolicy, kotraž Wrócław klětu budźe.
Wotstronjeja škody při rěce
Brüssel/Athen (dpa/SN/K). Dźensniša póndźela je móžny wosudny dźeń nastupajo grjeksku krizu zadołženja, wjercholacy wječor w belgiskej stolicy z wurjadnym wjerškom šefow statow a knježerstwow europasma. Do toho bě komisija EU nowe namjety Grjekskeje k přewinjenju wadźeńcy jeje zadołženosće dla witała, mějo je za „dobry zakład“. Z Athena wčera zdźělichu, zo je ministerski prezident Alexis Tsipras namjety za doskónčne rozrisanje krizy předpołožił. Rěčnik knježerstwa k tomu wuwjedźe, zo jedna so wo namjety k žadanym naprawam lutowanja. Po grjekskich medijach k tomu rěka, zo je knježerstwo nětko zwólniwe, zwyšić nadhódnotowy dawk mjez druhim za hotele. Tež wo zniženju wysokich rentow so rozwažuje.
Miliony ludźi po wšěm swěće su so składnostnje wčerawšeho joga-dnja na zjawnych ćěłozwučowanjach wobdźělili. Jeničce w indiskej stolicy New Delhiju zhromadźi so po oficialnych informacijach 37 000 ludźi, štož chcedźa samo do Guinnessoweje knihi rekordow zapisać. UNO bě loni na namjet Indiskeje 21. junij jako swětowy dźeń jogi deklarowała. 5 000 lět stara filozofiska wučba polěkuje nutřkownej harmoniji čłowjeka kaž tež runowaze z přirodu.
Najdlěšu pizzu swěta su w Italskej napjekli. 80 kucharjow bě so sobotu na swětowej wustajeńcy w Milanu zhromadźiło, zo bychu 1,59 kilometrow dołhu a pjeć tonow ćežku pizzu margheritu spřihotowali. Zastupnik Guinnessoweje knihi nowy swětowy rekord wobkrući. Titul za najdlěšu pizzu měješe dotal Španiska z 1,1 kilometrom. Za italsku pizzu trjebachu nětko 2,5 tonow muki, 1,7 tonow mozzarella a 1,5 tonow tomatow.
Za mjezu překročace nawjazanje
Zhorjelc/Drježdźany (dpa/SN/ch). Do zetkanja šefa Němskeje železnicy Rüdigera Gruby a sakskeho ministerskeho prezidenta Stanisława Tilicha (CDU) wčera w Drježdźanach je iniciatiwa „Dalokowobchad za Zhorjelc“ ćišć wukonjała. Po zastajenju železniskeje čary Drježdźany–Zhorjelc–Wrócław kónča so wšitke zbywace wuchodo-zapadne čary w Drježdźanach abo w Choćebuzu. Po koncepće Němskeje železnicy njezmějemy hižo žadyn mjezu překročacy dalokowobchad přez Zhorjelc, kritizuje politikar Zelenych a sobu- iniciator Stephan Kühn. Iniciatiwa, ke kotrejž słušataj tež Zhorjelski wyši měšćanosta Siegfried Deinege (njestronjan) a generalny sekretar CDU Michael Kretschmer, sej žada, zo so němsko-pólski železniski wobchad spěšnje polěpši a zwisk do Wrócławja znowa nawjaza.
Budu mjeńše firmy podpěrować