Budyšin (SN/MG). „Chcemy póndźelu, na kotruž so wjeselić móžemy.“ Tole praji wčera, póndźelu, Manja Gruhn, zamołwita za nowy projekt „Happy monday – wjesoła póndźela“. Wot wosmeho apryla planuje pod tutym mjenom šěroka paleta towarstwow a iniciatiwow tójšto zarjadowanjow na póndźelach na rozdźělnych městnosćach. Zarjadowanja maja napřećiwny pol k pochodowacym prawicarjam w měsće tworić.
Nimo Němsko-Serbskeho ludoweho dźiwadła, Kamjentneho domu a ewangelskeje wosady Budyšin je tež tójšto serbskich institucijow na projekće wobdźělenych. Tak naliči Heiner Schröder wot TVbunt, najwjetšeho třěšneho zwjazka čestnohamtskeho dźěła w Budyskim wokrjesu, nimo Domowiny a rěčneho centruma Witaj tež Serbski institut a Serbski ludowy ansambl. Z tutym miksom tematisce tak rozdźělnych partnerow chcedźa pokazać, „zo je Budyšin pisany“, tak Schröder dale.
Berlin (dpa/SN). Předsyda dźěłarnistwa zwjazkoweje wobory Andre Wüstner žada sej hladajo na wulke njedostatki w zwjazkowej woborje wobšěrne inwesticije we wójsku. Wón widźi wulke problemy we wójsku, w marinje a lětarstwje „hladajo na nadawk a na połoženje“. Wüstner wočakowaše dźensa rano wotpowědnje kritisku rozprawu społnomócnjeneje zwjazkoweho sejma Evy Högl. Politikarka SPD chcyše w běhu dnja swoju rozprawu wo połoženju armeje předpołožić.
Ukrainske truty do Ruskeje
Moskwa (dpa/SN). Z wjacorymi bojowymi trutami je Ukraina po informacijach Moskwy minjenu nóc objekty w Ruskej nadběhowała. Zakitowanske ministerstwo w Moskwje zdźěla, zo su 26 ukrainskich trutow wottřělili. Jedna z nich pak je přiwšěm wot Ukrainy 800 kilometrow zdaleny Nišnij Nowgorod docpěła a w tamnišej rafineriji woheń zawinowała. Ukraina je minjeny čas wospjet objekty w Ruskej nadběhowała a při tym tež stajnje zaso daloko lećace truty zasadźiła.
Huthi znowa łódź nadběhowali
Rom/Drježdźany (dpa/SN). Sakski ministerski prezident Michael Kretschmer (CDU) je wjele diskutowane wuprajenja bamža Franciskusa zakitował. „Jeho namołwu, zmužitosć k jednanjam, podpěruju“, rjekny Kretschmer nowinarjam. Jasne je, zo trjeba Ukraina podpěru a zo je Ruska agresor w tutej wójnje, wón rjekny. „Najebać to dyrbimy so bóle napinać, mrěće w tutej wójnje skónčić“, rjekny sakski politikar. Bamža Franciskusa mjenowaše Kretschmer „mudreho a wobhladniweho muža“. Sakski ministerski prezident namołwja w tym zwisku europsku zhromadnosć, so wo přiměr prócować. Tole měło so hišće do prezidentskich wólbow w USA stać. „Logiku namocy a mrěća dyrbimy přewinyć.“
Bamž Franciskus bě w rozmołwje ze šwicarskimi nowinarjemi rjekł, zo pokazuje tón sylnosć, „kiž situaciju spóznawa, kiž mysli na swój lud a kiž ma zmužitosć, běłu chorhoj wupowěsnyć a jednać“. Tole měrješe so wočiwidnje na Ukrainu. Wuprajenja bamža běchu w Němskej njezrozumjenje a sylny protest zbudźili.
Münster (dpa/SN). Na sewjerorynsko-westfalskim wyšim zarjadniskim sudnistwje (OVG) su dźensa sudniske jednanje w druhej instancy wo zastopnjowanju AfD přez wustawoškit zahajili. Zwjazkowy zarjad (BfV) z hłownym sydłom w Kölnje bě stronu a jeje młodźinsku organizaciju Młodu alternatiwu (JA) jako prawicarsko-ekstremistiski podhladny pad zastopnjował. Zarjadniske sudnistwo w Kölnje bě lěta 2022 tute nastajenje wobkrućiło. Wotpowědujo tomu ma wustawoškit prawo, stronu a jeje młodźinsku organizaciju ze srědkami tajneje słužby wobkedźbować. Přećiwo wusudej w Kölnje bě AfD znapřećiwjenje zapodała. Sudnicy najwyšeho zarjadniskeho sudnistwa dyrbja nětko rozsudźić, hač je posudk zwjazkoweho zarjada za wustawoškit prawnisce w porjadku.
Zo přińdźetaj předsydaj strony Alice Weidel a Tino Chrupalla na jednanje, njewočakowachu. Připowědźił bě so bywši zapósłanc zwjazkoweho sejma Roman Reusch jako zastupnik AfD ze Sewjerorynsko-Westfalskeje.
Dokładnje 15 637 městnow za komu ličby Pi je Frankfurtska policistka Susanne Hippauf loni naličić móhła a je tak nowy němski rekord nastajiła. Kónc tydźenja chce 42lětna swój titul zakitować a gigantiski rjad ličbow znowa z hłowy přednjesć. Wot januara wona intensiwnje zwučuje. Předewzała sej je, 18 000 ličbow za smužku bjez zmylka pruwowarjam naličić. To traje dlěje hač tři hodźiny.
Na wšěch 107 893 króć su šoferojo awtow loni w Sakskej pomocnu słužbu ADAC wołali. Bě to 3 593 króć wjace hač 2022. Najčasćišo wołachu pomocnikow defektnych baterijow dla (44,1 procent). Tola tež skóncowane motory, defektne generatory a startowaki běchu přičina nuzowych telefonatow. Najhusćišo trjebachu šoferojo pomoc wot awgusta hač do decembra 2023. Rekordny dźeń bě 4. december ze 18 378 zasadźenjemi.
Vatikan (B/SN). Bamžowska teologiska akademija je podšmórnyła, štož je 1738 bamž Clemens XII. (1730–1740) hižo wobzamknył, zo njehodźi so swobodnomurjerstwo na zakładźe předstawow wo Bohu z katolskej cyrkwju zjednoćić. Tež rozdźělne koncepty wo přećelstwje, lubosći k blišemu a ezoteriske praktiki přisłušnosć katolikow k swobodnomurjerstwu znjemóžnjeja, kotrež ma po cyłym swěće tři do pjeć milionow čłonow.
Tři křižiki
Hamburg (B/SN). Tradicija, so do čitanja ewangelija trójce pokřižować, bu w 11. lětstotku spočatnje jenož za měšnikow zawjedźena. Wosada z pokřižowanjom signalizuje, zo chce ewangelij z rozumom zapřimnyć, z ertom wozjewjeć, we wutrobje nosyć a po nim žiwa być.
Proces zahajeny
Kijew (B/SN). Nimale sydom lět po smjerći woblubowaneho grjeksko-katolskeho kardinala Lubomyra Huzara je nětko jeho naslědnik, wulkoarcybiskop Swjatosław Šewčuk, proces zbóžnoprajenja zahajił. Ukrainska grjeksko-katolska cyrkej je najwjetša na wuchodźe z něhdźe 4,5 do 5,5 milionami křesćanow.
Škódna propaganda