Ničo rozsudźene
Budyšin pola pućowaceje wulki zaćišć zawostajił
Budyšin (CS/SN). Wo Serbach njeje Daniela Trauthwein dotal hišće ničo słyšała. 50lětna z južneje Pfalcy je wot lěta 2014 jako pućowaca bloggerka po puću, předewšěm w němskich srjedźohórskich kónčinach. Marketingowej towaršnosći Hornja Łužica-Delnjošleska bě bloggerka přez jeje internetne pućowanske rozprawy napadnyła. Tuž su ju a dwě dalšej bloggerce do Hornjeje Łužicy přeprosyli. Minjeny štwórtk je Daniela Trauthwein do Budyšina dojěła, zo by sej město najprjedy raz wobhladała. Swoju jězbu po Łužicy je zawčerawšim, póndźelu, w Zhorjelcu skónčiła.
Na programje wodźenja po Budyšinje steješe wopyt Tachantskeje pokładnje. Daniela Trauthwein bu hnuta hladajo na relikwije a druhe cyrkwinske drohoćinki. Bohužel bě jeje časowy plan chětro wuski, tak zo njemóžeše Budyski Serbski muzej wopytać. Za to pak zhoni tójšto wo serbskich nałožkach a wo bohatym serbskim kulturnym žiwjenju.
„Cyganska juška“ bórze z blida
Dissen/Budyšin (dpa/SN). Po firmje Knorr chcedźa nětko tež dalši poskićowarjo „Cygansku jušku“ přemjenować. Kaž poskićowarjej žiwidłow Homann a Bautz‘ner powěsćerni dpa zdźělitej, maja wotpowědne juški k polěpšenju słoda bórze hinak rěkać. „Změnu mjena hižo dlěje planujemy. Dokładny čas wotwisuje jenož hišće wot produkciskich wuměnjenjow, zdźěla rěčnica w Małym Wjelkowje produkowaceho předewzaća, hdźež zhotowja tež Budyski žonop.
Tež w delnjosakskej firmje Homann z hłownym sydłom w Dissenje hižo dlěši čas wo tutej temje diskutuja, rěčnik předewzaćelskeje skupiny Theo Müller zdźěli. Wuraz maja tam dale za ryze pomjenowanje družiny, přiwšěm chcedźa tule družinu w zwisku z přichodnej změnu etiketa přemjenować. Wo nowym pomjenowanju nochcyše firma ničo přeradźić. Tež pola Edeka chcedźa přemjenowanje swójskich juškow pruwować.
Minjenu njedźelu bu znate, zo chce Knorr swoju „Cygansku jušku“ na „Paprikowu jušku madźarskeho razu“ přemjenować, dokelž móhli wuraz „Cyganska juška“ negatiwnje interpretować.
To a tamne (19.08.20)
Něčeho so wzdać móže w Hamburgu samo stipendij wunjesć. Tamniša Wysoka šula za tworjace wuměłstwo je stipendij za ničočinjenje wupisała. Stajnje 1 600 eurow dóstanu třo požadarjo, kotřiž móža ze swojimi planami jury přeswědčić. Při tym dyrbja rozłožić, što nochcedźa přichodnje činić a kak dołho nic. Móže to manager być, kiž nochce na zhromadźiznach ničo wjace rjec abo něchtó, kiž nochce měsac dołho z awtom na dźěło jěć.
Po wowcynym parfimje pomjenowali su fyzikarjo w Kölnje nowu hwězdu, kiž su w systemje planetow wuhladali. Ta rěka wotnětka S4711. Wjeselo nad hwězdu chcychu z mjenom podšmórnyć. 4711 Echt Kölnisch Wasser bě po wójnje požadny parfim. „Naša wowka je jón wužiwała. Tuž mam pozitiwne dopomnjeće na to“, jedyn ze slědźerjow rjekny.
Žadaja sej jasne směrnicy
Berlin (dpa/SN). Lěkarska organizacija Marburgski zwjazk žada sej po wšej Němskej płaćiwe předpisy za swjedźenje a swjatočnosće. „Zo bychu natyknjenjam w nazymje a zymje zadźěwali, dyrbjeli so kraje bórze na jednotne směrnicy za priwatne a zjawne swjedźenje dorozumić“, rjekny předsydka Susanne Johna nowinarjam. Wažne su hornje mjezy ličby hosći a koncepty za přewětrjenje. „Hdyž ličby infekcijow zaso přiběraja, je 150 ludźi na swójbnym swjedźenju přewjele.“
Warnuja před Trumpom
Washington (dpa/SN). Z raznym warnowanjom před zahubnymi sćěhami dalšeje doby zastojnstwa prezidenta USA Donalda Trumpa su Demokraća USA dźensa ze swojim nominowanskim zjězdom pokročowali. „Hdyž sej mysliće, zo njemóža so wěcy dale pohóršić, wěrće mi, wone móža. A to wone tež budu, hdyž při tutych wólbach ničo njezměnimy“, rjekny bywša first lady Michelle Obama w swojej narěči. Na zjězdźe nominuja Demokraća Joe Bidena za swojeho kandidata k wólbam prezidenta 3. nowembra.
Maas jedna w Abu Dhabiju
Inženjerka Iman Behabi steji ze sylzami we wočomaj w swojim ...
Wurjadny wjeršk EU wuradźuje wo Běłoruskej
Minsk (dpa/SN). Opozicija w Běłoruskej chce hladajo na dny trajace masowe protesty stawki w bywšej sowjetskej republice rozšěrić. Po tutym puću chcedźa mócnarski aparat wosłabić a prezidenta Aleksandera Lukašenka nuzować wotstupić, zdźěli Maria Moros, nawodnica wólbnobojoweho mustwa opozicije Swetlany Tichanowskeje. „Wujasnimy knježacym, zo njeje žanoho puća wróćo k starym poměram.“ Po wšěm kraju ludźo hižo dlěje hač tydźeń demonstruja, žadajo sej wotstup Lukašenka.
Tón je wčera spytał, ze stawkowacymi dźěłaćerjemi traktoroweje twornje w Minsku do rozmołwy přińć. Dźěłaćerjo pak jeho wuhwizdachu a namołwjachu, so zminyć. Wopyt bě spěšnje skónčeny.
W Čěskej trjebaja zaso nahubniki
Praha (dpa/SN). Čěska zawjedźe po wšěm kraju zaso winowatosć, nahubniki wužiwać, po tym zo běchu ju před měsacomaj zběhnyli. Wot 1. septembra dyrbja ludźo znutřka wobchodowych rumnosćow, institucijow a w zjawnych wobchadnych srědkach škit před hubu a nosom nosyć. Hłowna přičina je kónc lětnich prózdnin a započatk noweho šulskeho lěta, rjekny minister za strowotnistwo Adam Vojtěch w Praze. Budźe wo wjele wjace kontaktow mjez ludźimi a na to dyrbimy reagować.“
Poprawom bě Praske knježerstwo regionalnje rozdźělnu tak mjenowanu korona-amplu zawjedło, zo móhło fleksibelnje w potrjechenych kónčinach reagować, bjez toho zo wobmjezowanja za wšón kraj wukaza. Mjeztym pak maja wot spočatka koronapandemije wjace hač 20 000 infekcijow, strowotniske ministerstwo zdźěla.
Nětkole bu znate, zo je so na kwasnej hosćinje njedaloko města Uherské Hradiště na juhowuchodźe kraja dźesatki ludźi z koronawirusom natyknyło.
CDU na terminje wobstawa
Křesćanscy demokraća přihotuja najebać koronu zjězd w decembrje
Berlin (dpa/SN). Prezidij CDU chce najebać přiběrace ličby z koronawirusom natyknjenych ludźi spočatk decembra planowany stronski zjězd k wuzwolenju noweho předsydy w Stuttgarće přewjesć. Tuchwilu pandemije dla wjacore scenarije rozwažuja a planuja, wčera ze stronskich kruhow rěkaše. Zwjazkowa kanclerka Angela Merkel (CDU) mjenowaše najnowše ličby koronainfekcijow „přičinu k starosćenju, ale wobknježomne“. Tuž njeje po jeje měnjenju móžno, dalše wobmjezowanja zběhnyć. To płaći wosebje tež za koparske hry.
Ličby koronainfekcijow běchu naposledk zaso přiběrali. Kónc minjeneho tydźenja bě Roberta Kochowy institut wšědnje wjace hač 1 400 nowych infekcijow registrował.
