Choćebuz (dpa/SN). Dlěje hač tři měsacy njejsu w Choćebuzu žadyn nowy pad koronawirusa wjace měli – nětko je so hnydom štyriwosobowa swójba z nim natyknyła. Kaž město zdźěli, běštaj so mandźelskaj z dźowkomaj minjenu njedźelu z dowola na španiskej kupje Mallorca ­nawróćiłoj. Kupa njeje jako rizikowa kónčina zastopnjowana. Swójba bě njedźelu w Nürnbergu přizemiła a wottam z awtom domoj jěła. Po nawróće je jedyn z dźěłodawarjow staršeju rutinowy test přewjesć dał, kiž bě pozitiwny.

Cyła swójba je mjeztym w karantenje, runje tak dotal zwěsćene kontaktne wosoby. Swójbni nimaja dotal žane symptomy. Strowotniski zarjad slědźi za dalšimi kontaktnymi wosobami.

Ličba wobkrućenych padow korony w druhim najwjetšim měsće Braniborskeje je tak na 43 rozrostła. Tuchwilu je w Choćebuzu 33 wosobow w domjacej karantenje. Najwjetši dźěl z nich su po informacijach města studenća, kiž su so ze swojich ródnych krajow nawróćili, a ludźo, kotřiž mějachu z nimi kontakt.

Drježdźany (dpa/SN). Po puću w słužbje wědomosće: W Sakskej je dźeń a mjenje wjelkow ze sćelakom po puću, kotryž dawa daty wo jich pohibowanju w přirodźe. Kaž fachowy zarjad za wjelki w krajnym wobswětowym zarjedźe zdźěli, matej tuchwilu jenož hišće dwaj wjelkaj tajki sćelak za wjelči monitoring při sebi.

Sćelak muskeho wjelka Hansa, kotryž běchu jemu při pasku wokoło šije připrawili, běchu njedawno w ćežko přistupnej Kinsporskej holi namakali, po tym zo njebě sćelak hižo 20 dnjow wusyłał. Fachowcy wobswětoweho zarjada z toho wuchadźeja, zo běchu so šrubiki paska wokoło šije pušćili. Wjelkej pak so derje dźe, kaž wobraz fotowych paslow dokumentuje.

W aprylu běchu ze sćelakom wuhotowanu wjelčicu Lottu we Łužicy mortwu našli. Prawdźepodobnje běchu ju druhe wjelki při wojowanju wo rewěr zakusali.

Daty dóstawaja slědźerjo hišće wot młodeje wjelčicy z mjenom Juli. Wona bě w aprylu Saksku wopušćiła a je tuchwilu w Mecklenburgsko-Předpomorskej. Ze swobodneho stata wusyła jenož hišće wjelk Peter. Sćelak běchu jemu w aprylu wokoło šije připrawili.

Prěni na přirodne wašnje spłodźeny panda je so w Južnej Koreji narodźił. Žónski panda-baby je póndźelu we wólnočasnym parku Everland na swět přišoł a waži runje 197 gramow. Dorost njeje pola pandamjedwjedźow samozrozumliwy. Žónki su jeničce tři dny wob lěto płódne. Sydomlětna Ai Bao bu w měrcu nošna, po tym zo bě so spłodźenje z dwě lěće staršim pandu Le Bao radźiło.

Swětowa mišterka w płuwanju Franziska van Almsick dźensa hižo rady do wody njeńdźe. „Sym mjeztym skerje bojazliwa“, 42lětna nowinarjam wuzna. W swójbje je stajnje poslednja, kotraž do basenka dźe. Swój bywši wšědny dźeń móže sej mać dweju synow lědma hišće předstajić, jako bě rano w sedmich do wody skočiła a sydom kilometrow płuwała. Berlinjanka je 43 medaljow dobyła a šěsć swětowych rekordow nastajiła.

Washington (dpa/SN). Prezident USA Donald Trump je swojich krajanow na to nastajił, zo so koronapandemija dale přiwótřa. „Prawdźepodobnje budźe bohužel hišće hórje, prjedy hač so njepolěpši“, rjekny wón na nowinarskej konferency w Běłym domje. „Njepraju to rady, ale tomu tak je.“ Trump Američanow w tym zwisku namołwješe, „nahubniki wužiwać, hdyž njehodźi so wěstotny wotstawk dodźeržeć. Wone maja dobry efekt.“

Tež kanclerski zarjad w fokusu

Berlin (dpa/SN). W padźe insolwentneho předewzaća Wirecard a róle politiki měrja so tukanja mjeztym tež na kanclerski zarjad a na zwjazkowu kanclerku Angelu Merkel (CDU). Přičina je jězba kanclerki loni w septembru do Chiny, hdźež bě wona temu Wirecard narěčała. Tehdy hotowaše so předewzaće na to, swoje posłužby tež w Chinje poskićeć. Z wida předsydki Lěwicy Katje Kipping dyrbjała ­nětko tež Merkel na planowanym wurjadnym posedźenju financneho wuběrka zwjazkoweho sejma přichodny tydźeń na prašenja wotmołwić.

Poćahi lěkowanja potrěbne