Moskwa (dpa/SN). Ruska z tym liči, zo rozmołwy z USA wo wuchowanju poslednjeho wulkeho zrěčenja wo wotbrónjenju mjez woběmaj krajomaj zwrěšća. „Wuchadźam z toho, zo su USA hižo rozsudźili, zo zrěčenje njepodlěša“, rjekny wonkowny minister Sergej Lawrow minjeny pjatk w Moskwje powěsćerni Interfax. Lawrowej je wosebje kedźbyhódne, kak zaměrnje USA spytaja Chinu do jednanjow zapřijeć.

Zrěčenje „New Start“ k wobmjezowanju nuklearneho potenciala USA a Ruskeje za sydom měsacow wuběži. Mo­skwa a Washington stej drje so hižo k jednanjam zetkałoj, te pak wostachu dotal bjez wuslědkow. USA chcedźa zrěčenje wo kontroli brónjenja na Chinu rozpřestrěć. Peking pak so dotal spjećuje, wo swojim spochi přiběracym arsenalu atomowych bróni jednać.

Zwickau (dpa/SN). Wulki rozmach w Sakskej: Ze 4. sakskej krajnej wustajeńcu podawa so swobodny stat na multimedialne časowe pućowanje po pjeć lětstotkach krajnych stawiznow. Po oficialnym wotewrjenju minjeny pjatk w Zwickau­wje je přehladka „Rozmach – 500 lět industrijneje kultury w Sakskej“ wopytowarjam nětko přistupna. Pola industrijneje kultury njeńdźe wo ničo druhe hač wo identitu našeho kraja“, rjekny Klaus Vogel, direktor Drježdźanskeho Hygienoweho muzeja, kiž je krajnu wustajeńcu we hłownym planował.

Po wobćežnym pytanju za prawym městnom a po přestorčenjach koronapandemije dla wěnuje so centralna wustajeńca w Zwickauwje prašenju, što su wšitke łamki a změny wot spočatka hórnistwa z ludźimi činili. „Saksojo móža sej swój kraj znowa wotkryć. Zdobom je to wizitka“, rjekny ministerka za kulturu Barbara Klepsch (CDU). Zamołwići wočakuja hač do 100 000 wopytowarjow.

Berlin (dpa/SN). Najebać njeplanowany wohnjowy alarm a z nim zwjazane přetorhnjenje zwučowanja komparsow na Berlinskim nowym lětanišću BER su zamołwići z dotalnymi wotběhami spokojom. „Proby z komparsami dotal derje běža“, zdźěli rěčnica lětanišća. Wokomiknje njeje tam žanych problemow. Minjeny tydźeń běchu započeli wotběhi na lětanišću z 9 000 dobrowólnikami zwučować, štož ma přez cyłe lěćo trać.

Minjeny štwórtk popołdnju bě wo­hnjowy alarm probowe wotběhi dočasnje skónčił. „Njebě pak žanoho wohenja a žanych płomjenjow“, rěčnica potwjerdźi. Wšitko je fungowało, kaž předpisane. „Připrawy k wotwodźenju kura so zapinychu, durje so zawrěchu a wohnjowa wobora bě po třoch mjeńšinach na městnje.“ Najwjace komparsow bě w tym času swoje nadawki hižo spjelniło. Woni mějachu wotběhi a puće wupruwować, wot přizjewjenja přez wotedaće wačokow hač k wěstotnemu checkej. Čehodla bě alarm wudyrił, dotal njewědźa. Pjatk je dohladowanska rada lětanišća wuradźowała. Planowany termin wotewrjenja lětanišća kónc oktobra chcedźa dodźeržeć.

Hra billarda je so kónc tydźenja w braniborskim Finsterwaldźe bolostnje skónčiła, dokelž dyrbjachu jednoho z hrajerjow krawjaceje rany na hłowje dla w chorowni lěkować. Spočatnje běštaj so mužej wadźiłoj a sej mjez sobu nadawałoj, doniž skónčnje jedyn tamnemu z kijom na hłowu njebiješe. Skućićel je so na to sam pola policije přizjewił.

Internetnje a z tójšto małymi demonstracijemi su w Mnichowje lětuši Christopher Street Day (CSD) woswjećili. Pod hesłom „Přećiwo hidźe – Pisani, zhromadnje sylni“ su homoseksualni, biseksualni a transgenderojo na swoje prawa skedźbnjeli. CSD je so lětsa koronakrizy dla k žru politiskeho protesta wróćił, kaž rěčnik hibanja zdźěli: Město wulkeje party su ćicho přećiwo diskriminaciji protestowali. Za to běchu livestream zarjadowali a so w měsće po małych skupinkach zhromadźili.