Hnujacy to wokomik w nocy na sobotu na němsko-pólskej mjezy w ...
Altmaier: Dolinu krizy wopušćić
Wočakuja impuls
Berlin (dpa/SN). Němski zwjazk Industrijnych a wikowanskich komorow (DIHK) wočakuje po wotewrjenju nutřkoeuropskich mjezow Europskeje unije pozitiwny efekt na globalne hospodarstwo. „Wot wotewrjenych mjezow móhli po wšej Europje impulsy wuchadźeć, zo by so mjezynarodne wikowanje wožiwiło a derjeměće kaž tež dźěłowe městna zaručene byli“, rjekny prezident DIHK Eric Schweitzer nowinarjam. Wosebje wažne jemu je, zo su němske wudźěłki a posłužby po wšěm swěće zaso prašane. „Dźensa wotewrjene mjezy móhli na němske hospodarstwa kaž dalši konjunkturny program skutkować, kotryž stat ničo njepłaći“, měni prezident DIHK.
Starosće Schweitzerej wobradźa, zo dale před jězbami do 160 krajow warnuja, mjez druhim do USA, Chiny a Ruskeje, wažnym hospodarskim wikam Němskeje.
Woidke: Z pólskim susodom rěčeć
Podstupim (dpa/SN). Braniborski ministerski prezident Dietmar Woidke (SPD) ma po nimale tři měsacy trajacym zawrjenju mjezy k Pólskej wuše wothłosowanje ze susodom za trěbne. Społnomócnjeny němskeho zwjazkoweho knježerstwa za styki k Pólskej rjekny rozhłosownikam hladajo na dołhe rynki čakacych nakładnych awtow po zawrjenju mjezy: „Tajkim problemam bychmy zadźěwać móhli, bychmy-li do toho ze sobu rěčeli. To njeje so w turbulentnych časach na spočatku koronakrizy bohužel stało.“ Najebać to je jemu sobotne wotewrjenje mjezy „wulke wjeselo“.
Narodnokonserwatiwne Waršawske knježerstwo bě srjedź měrca swoje mjezy k tamnym krajam Europskeje unije zawrěło, zo by dalšemu rozpřestrěću koronawirusa zadźěwało. To je powołanskich dojězdźowarjow, kotřiž běchu mjezu wšědnje přeprěčili, wosebje trjechiło.
Braniborski ministerski prezident rjekny, zo je tydźensce z koordinatorom na pólskim boku Bartoszom Grodeckim telefonował, a styki su mjeztym „jara dobre“.
Nowy prezident sudnistwa woleny
Visegrádske kraje žadaja sej změny
Lednice/Brüssel (dpa/SN). Čěska, Pólska, Madźarska a Słowakska žadaja sej změny při rozdźělenju srědkow z planowaneho fondsa Europskeje unije za nowonatwar hospodarstwa po koronakrizy. „Njesmě być, zo dyrbja chude kraje za bohate kraje płaćić“, rjekny čěski ministerski prezident Andrej Babiš po zetkanju tak mjenowaneje Visegrádskeje štyrki na hrodźe Lednice sćelakej ČT. Jara wažna je wulke fleksibilita w prašenju kriterijow rozdźělowanja, wudospołni pólski ministerski prezident Mateusz Morawiecki. Za srjedźoeuropski region su inwesticije do infrastruktury, kaž awtodróhow abo železniskich čarow, wosebje wažne.
Madźarski knježerstwowy šef Viktor Orbán njewočakuje, zo so kraje EU bórze dojednaja. Na naćisku komisije EU je „hišće wjele dźěła“, wón rjekny. „Chcemy signal wusyłać, zo njeje wobstejacy kompromis fairny“, potwjerdźi słowakski ministerski prezident Igor Matovič. Z kreditami financowany fonds 750 miliardow eurow ma čłonskim statam EU pomhać, wot pandemije zawinowanu hospodarsku krizu přewinyć. Najwjace pjenjez matej Italska a Španiska dóstać.
Premier Conte přesłyšowany
Rom (dpa/SN). W Italskej su započeli koronapandemiju juristisce předźěłać. Wona je sej po cyłym kraju 34 000 smjertnych woporow žadała. Statne rěčnistwo wosebje potrjecheneho města Bergamo je minjeny pjatk w Romje italskeho ministerskeho prezidenta Giuseppu Conteho w naležnosći přesłyšowało. Tež strowotniski minister Roberto Speranza a nutřkowna ministerka Luciana Lamorgese běštaj jako swědkaj wotběhow po wudyrjenju wirusa skazanaj, kaž medije kraja rozprawjeja.
Italska přeco hišće njewě, čehodla je so chorosć na hospodarsce sylnym sewjeru kraja tak spěšnje rozšěrić móhła a što je tomu polěkowało. Při tym dźe tež wo prašenje, čehodla njejsu zamołwići gmejnje Alzano Lombardo a Nembro w prowincy Bergamo hnydom zawrěli. Kónčina bě w měrcu wot pandemije sobu najbóle potrjechena. Wobrazy wojerskich nakładnych awto z ćěłami zemrětych běchu swój čas ludźi po cyłym swěće zludali. Přiwuzni zemrětych su mjeztym něhdźe połsta skóržbow zapodali, dokelž na zaprajenje zarjadow tukaja. Premier Conte njeje sej žaneje winy wědomy.
To a tamne (15.06.20)
Wuswědčenja na jewišću awtokina dóstali su absolwenća Mjezynarodneje šule Hannover. W kinje pod hołym njebjom na kromje města přepodachu kónčne wuswědčenja něhdźe 50 šulerkam a šulerjam, kotřiž stejachu tam w swojich čerwjenych płašćach z wotpowědnym wotstawkom, na dostojnej, byrnjež jara njewšědnej ceremoniji graduacije. Hosćo sedźachu w 120 awtach před jewišćom a zahoriće trubjachu. Na Hannoverskej šuli wuwučuja 600 chowancow ze 60 krajow wot pěstowarnje hač do 12. lětnika.
Za wobsedźerjom nimale štyrjoch kilogramow złota w hódnoće 170 000 eurow w Šwicarskej přeco hišće pytaja. Tón ma pjeć lět chwile so přizjewić. Paket złota běchu w oktobru 2019 we wagonje šwicarskeje statneje železnicy namakali. Najebać intensiwne pytanje njeje so dotal poradźiło wobsedźerja zwěsćić.
Wuprajenje złahodniła
Nienburg (dpa/SN). Předsydka SPD Saskia Esken je po swojich wuprajenjach wo latentnym rasizmje mjez wěstotnymi mocami wobkrućiła, zo nochcyše policiji rasizm zasadnje wumjetować. Na wopyće Delnjosakskeje policajskeje akademije w Nienburgu wona potwjerdźi, zo njeje rasizm strukturny problem, ale zo jedna so wo jednotliwe pady. Esken je ze swojimi wuprajenjemi tež w swójskich rjadach kritiku žnjała, dokelž bě policiji „latentny rasizm“ wumjetowała.
Wirus so w Africe rozpřestrěwa
Brazzaville (dpa/SN). W Africe su po informacijach Swětoweje strowotniskeje organizacije mjeztym 200 000 dopokazanych padow koronawirusa registrowali. Dotal je tam wjace hač 5 600 ludźi na njón wumrěło. Južna Afrika je z 25 procentami wšěch padow najbóle potrjechena. Fachowcy starosća so wosebje spěšnosće rozpřestrěća dla. W běhu 98 dnjow je so 100 000 ludźi natyknyło, po runje 18 dalšich dnjach pak hižo 200 000.
Pomjeńša ličbu wojakow
