Šiman za ciwilizaciju
Wjace čornodźěła
Podstupim (dpa/SN). Zastojnicy Podstupimskeho hłowneho cłownistwa su loni cyłkownje 595 dźěłodawarjow wobkedźbowali a 6 162 dźěłopřijimarjow nastupajo přistajenje kontrolowali. Hačrunjež bě mjenje kontrolow, zwěsćichu zastojnicy wjace přeńdźenjow. Tak bě suma škodow we wobjimje 20 milionow eurow wyša hač lěto do toho z 19,3 milionow eurow, zarjad wčera zdźěli. Nimale 2 130 chłostanskich jednanjow a něhdźe 570 jednanjow přećiwo ranjenju porjada dla je zarjad zahajił. Ličba chłostanskich jednanjow je wo wjace hač 500 jednanjow přiběrała. Loni sudnistwo pjenježne chłostanja we wobjimje něhdźe 378 000 eurow skućićelam napołoži. W někotrych padach dyrbjachu zasudźeni do jastwa.
Financna kontrola za čornodźěło Podstupimskeho hłowneho cłownistwa je zamołwity za wokrjesy Prignitz, Ostprignitz-Ruppin, Oberhavel, Havelland, Podstupim-Mittelmark, Teltow-Fläming a za dźěle Dubje-Błótow kaž tež bjezwokrjesne města Podstupim a Braniborska nad Habolu. Ze swojimi kontrolemi postupuje zarjad mjez druhim přećiwo čornemu dźěłu, ilegalnemu dźěłu a wobšudnistwu nastupajo socialne wukony.
To a tamne (15.02.24)
Fan Harryja Pottera je w Jendźelskej bjez wědźenja wobšěrne zasadźenje policije wuwabił. Wjacori zastojnicy chwatachu we wsy Enderby blisko Leicestera k hotelej, po tym zo běchu tam wosoby pječa muža „z wulkim nožom“ wuhladali. Policisća móžachu pad spěšnje rozrisać. Po naprašowanjach zwěsćichu, zo jednaše so wo fana kuzłarja Harryja Pottera z kuzłarskim kijom. „Na zbožo njeje wón nikomu škodźił a tež Voldemort njebě nihdźe widźeć“, policija na Facebooku wozjewi.
Jejko z romskeho časa, kotrež bu před někotrymi lětami w jendźelskim měsće Aylesbury namakane, je hišće židke. Fachowcy wuchadźeja z toho, zo jedna so wo jejko kokoše. Wědomostnicy maja namakanku za wulku sensaciju.
Čas přihota na jutry je so započał
Zahaja kampanju
Berlin (dpa/SN). Wjacore medije a mnohe předewzaća, załožby a zwjazki zahaja kampanju přećiwo prawicarskemu ekstremizmej. Wot jutřišeho budźe kampanja „#Zhromadny kraj – wšelakorosć nas zesylnja“ na dwójnych stronach w nowinach, interneće a po cyłej Němskej na wonkownym wabjenju widźomna, rěkaše dźensa w zhromadnej zdźělence mjez druhim nowinow kaž „Die Zeit“, „Handelsblatt“, „Süddeutsche Zeitung“, „Tagesspiegel“ a „Wirtschaftswoche“.
China dale wažny partner
Wiesbaden (dpa/SN). China je dale najwažniši wikowanski partner Němskeje. Wolumen z importow a eksportow pak běše z 253,1 miliardami eurow jenož dobrych 0,7 miliardow eurow wyši hač z USA (252,3 mrd.), zdźěli dźensa Zwjazkowy statistiski zarjad ze sydłom we Wiesbadenje. Lěto do toho wučinješe diferenca hišće 50,1 miliardu. Němski import a eksport z Chinu je pak wo 15,5 procenty porno lětu do toho woteběrał.
Rekordnu sumu přizjewili
Dokładnje we 18 hodź. poda sej wčera něhdźe 13 000 ludźi w ...
Dale diskusije wo zakazu AfD
Berlin (dpa/SN). Zo AfD a jeje dorostowa organizacija, młoda Alternatiwa (JA), z lěto a radikalnišimi wuprajenjemi napadnjetej, hodźi so w posudkach, sudniskich rozsudach a protokolach plenarnych posedźenjow sćěhować. Přiwšěm je wjetšina politikarjow dotal přećiwo zakazej strony. Prawniskopolitiski rěčnik frakcije unije w zwjazkowym sejmje Günter Krings ma samo za móžne, zo přechwatna próstwa wo zakaz AfD stronje w tuchwilnym wólbnym lěće lěpšiny wobradźa. „Dyrbimy přećiwo AfD předewšěm politisce wojować“, zwurazni bywši parlamentariski statny sekretar w zwjazkowym nutřkownym ministerstwje powěsćerni dpa.
Dokelž pak wuchadźa z dorostoweje organizacije AfD po wšěm zdaću „přeco dale přiběraca radikalizacija“ je woprawnjene, zakaz tutoho towarstwa znajmjeńša swědomiće pruwować, Krings rozłoži. „Rozsudnje a njeparujomne za wuspěšny zakaz su při tym dopóznaća wustawoškita“, jurist wuzběhny.
Baerbock: „Gaza před kolapsom“
Berlin (dpa/SN). Zwjazkowa wonkowna ministerka Annalena Baerbock (Zeleni) je sej hladajo na ciwilnu ludnosć w měsće Rafah na juhu Gazaskeho pasma přestawku wojerskeje ofensiwy israelskeho wójska přećiwo islamistiskej Hamas žadała. „W Rafah je tuchwilu 1,3 milionow ludźi a tam pod najstrašnišimi wuměnjenjemi přebywa, dokelž njeje žanych móžnosćow sej wućeknyć“, Baerbock wujasni. Wot dźensa wopyta wona Israel, hdźež chce wona z wšelakimi politiskimi zastupjerjemi kraja rěčeć. „Ofensiwa israelskeho wójska w Rafah humanitarne połoženje tam tradacych ludźi hišće bóle pohubjeńša.“ Ludźo w kónčinje njemóhli so „prosće z blaka zhubić“, Baerbock podšmórny. Woni trjebaja wěste městnosće a wěste koridory. „Gaza steji krótko před kolapsom.“
