W israelskej stolicy Tel Avivje su so wčera wječor znowa přiwuzni israelskich zastajencow zhromadźili, kotrychž běchu wojowarjo islamistiskeje Hamas 7. oktobra do Gazaskeho pasma zawlekli. Pod hesłom „Wodajće, zo su nas zawlekli“ protestowachu přećiwo wuprajenju prawicarskeho ekstremistiskeho financneho ministra Bezalela Smotricha, kiž bě nowinarjam rjekł, zo njeje wuswobodźenje zastajencow „to najwažniše“, dołhož njejsu wšitcy terorisća morjeni. Foto: pa/REUTERS/Dylan Martinez

Rozšěrjenje Tesle wotpokazali

srjeda, 21. februara 2024 spisane wot:
Grünheide (dpa/SN). Wobydlerjo gmejny Grünheide juhowuchodnje Berlina su plany twarca elektroawtow Tesla z USA nastupajo rozšěrjenje twornje z wjetšinu wotpokazali. Po wuličenju wšěch hłosow wčera wječor bě jasne, zo stej dwě třećinje přećiwo twarskim planam. Tesla chcyše zawod wo 170 hektarow rozšěrić a na nowej płoninje skład materiala, dwórnišćo a zawodnu pěstowarnju natwarić. Za to bychu znowa lěs pušćić dyrbjeli. Přećiwnicy planow kritizowachu dalše ničenje přirody a nowe strachi za wodoškitne pasmo, na kotrymž zawod steji. Gmejnska rada njeje na rozsud wobydlerjow wjazana. Wjesnjanosta Arne Christiani wobžaruje, zo njeje so poradźiło, ludźom lěpšiny wujasnić, kotrež plany Tesle gmejnje wunjesu. Braniborski hospodarski minister Jörg Steinbach (SPD) chcył nětko hišće intensiwnišo wo planach Tesle informować.

Schwesigza dojednanje

srjeda, 21. februara 2024 spisane wot:
Berlin (dpa/SN). Ministerska prezidentka Mecklenburgsko-Předpomorskeje Manuela Schwesig (SPD) je posrědkowanski wuběrk Zwjazkoweje rady namołwjała, so nastupajo zakoń k polěpšenju šansow hospodarskeho rozmacha spěšnje dojednać. „Trjebamy w tutych časach signal, zo móžemy so njehladajo stronske mjezy tež raz na něšto dojednać“, rjekny politikarka dźensa w rozhłosu. „Runje hospodarstwo čaka na tutón signal.“ Posrědkowanski wuběrk mjez zwjazkowym sejmom a Zwjazkowej radu chcyše dźensa wječor wo tym wuradźować. CDU/CSU žada sej změny na dobro ratarjow.

Wagenknecht warnuje před wójnu

srjeda, 21. februara 2024 spisane wot:

Berlin (dpa/SN). Załožerka swójskeje strony Sahra Wagenknecht warnuje před strachom wójny za Němsku, dyrbjało-li zwjazkowe knježerstwo Ukrainje daloko sahace brónje přewostajić. Zapósłanča zwjazkoweho sejma je so wčera z raznymi słowami přećiwo planowanej próstwje frakcijow amploweje koalicije SPD, Zelenych a FDP wobroćiła. Frakcije zwjazkowe knježerstwo namołwjeja, Ukrainu z tajkimi brónjemi podpěrować, zo ­móh­ła wona zaměrnje strategisce wažne objekty daloko za ruskej frontu nadběhować. „Tuta wot wójny pjana ­próstwa je nowy schodźenk eskalacije a woprawdźity strach za naš kraj“, Wagenknecht rjekny. Amplowa frakcija SPD, Zelenych a FDP chce wójnu do Ruskeje njesć. „To njepřinjese Ukrainje žadyn měr, ale ćehnje Němsku do wójny.“ Wagenknecht zasadźuje so za přiměr a hnydomne chutne jednanja wo měr.

Politikarka FDP Agnes Strack-Zimmermann bě sej žadała, z němskimi rake­tami Taurus rusku stolicu Moskwu nadběhować. Roderich Kiesewetter (CDU) w njedawnej rozmołwje z nowinarjemi namjetowaše, „wójnu do Ruskeje njesć“.

Wotum wobydlerjow

srjeda, 21. februara 2024 spisane wot:
Wuslědk wobydlerskeho naprašowanja nastupajo rozšěrjenje twornje twarca elektroawtow Tesla w Grünheidźe wuchodnje Berlina je jasny: Dwě třećinje wobdźělenych wopokazatej dalše płoniny, mjez nimi wulki areal lěsa a škitane łuki, zamórskemu industrijnemu hobrej přewostajić. Jich wotum je konsekwentny, dokelž su problemy twornje Tesla dla. Woda a dźěłowe mocy stej dwaj z nich. Nic pak za Teslu sam, ale za wokolinu – komuny a wobydlerjow –, za małe a srjedźne přede­wzaća w regionje a hač do Delnjeje Łužicy. Nimo toho spjećuje so předewzaće wo tarifowych mzdach jednać. Wuslědk wotuma zawjazowacy njeje. Gmejna Grünheide jón ignorować njemóže, hdyž dyrbi wo trěbnym wobtwarjenskim planje rozsudźić. Tajki gmejnskim radźićelam dotal njepředleži. Njezabyć měli na psychologiske skutkowanje wuslědka. Wšako dźe tež wo akceptancu wulkoprojektow, to braniborske knježerstwo jima. Po wotumje je dalši dialog mjez Teslu a gmejnu trěbny. Axel Arlt

Prezident: Mjenje běrokratije!

srjeda, 21. februara 2024 spisane wot:
Berlin (dpa/SN). Prezident Zwjazka dźěłodawarjow Němskeje Rainer Dulger je politiku amploweho knježerstwa SPD, Zelenych a FDP zasadnje kritizował. „Njedowěra do hospodarstwa přiběra“, rjekny Dulger wčera w Berlinje na sympoziju składnostnje swojich 60. narodnin. Stat měni, zo dyrbi hospodarstwo hač do najmjeńšeho wodźić. Po tutym puću je swoboda předewzaćelstwa dale a bóle woteběrała. Tak je firmam přiběrajcy ćežko, w mjezynarodnym wubědźowanju wobstać. Dulger žadaše sej na přikład wot­twar běrokratije. „Dyrbimy jednorišo a spěšnišo być.“ Politiski balast njesměł zawody přežadać. Zwjazkowy kancler Olaf Scholz (SPD) na zarjadowanju rjekny, zo chcyło zwjazkowe knježerstwo běrokratiju wottwarić. Wón rěčeše w tym zwisku wo „kwěćelu přećow“, kiž knježerstwo ze wšelakich kónčin docpěje. Knježerstwo dyrbi wšo naraz činić, Scholz skoržeše: Zastaranje z energiju zaručeć, płaćizny wobmjezować, digitalizowanje pohonjeć, infrastrukturu modernizować a „wšo to wězo, ze stabilnymi statnymi financami podkłasć“. Wšitko runočasnje zwoprawdźić, pak njeje móžne, Scholz rjekny.

To a tamne (21.02.24)

srjeda, 21. februara 2024 spisane wot:

Swjedźeń nahich muži – sobu najskurilniši festiwal Japanskeje, po tysac lětach hižo dlěje njepřewjeduja. Tole zdźěleja zamołwići templa Kokusekiji na sewjerowuchodźe kraja. Na sławnym swjedźenju wojuja mužojo jenož w spódnich cholowach a nohajcach wo měšk korjeninow, kotryž přinjese pječa zbožo. Wobdźělnicy pak su mjeztym přestarjeni a nimaja w swojich rjadach žadyn dorost wjace.

Katolskeho duchowneho zajeli su w španiskej prowincy Badajoz na zapadźe kraja, dokelž je wón ilegalnje z potencnym srědkom Viagra wikował. Zajeli su w tym ­zwisku dalšeho muža, žiwjenskeho a „wikowanskeho“ partnera duchowneho, policija zdźěla. Při přepytowanju bydlenjow wobeju su wulke mnóstwa Viagry našli. Potencny srědk je drje legalny, předawać pak smědźa jón jenož w apotekach.

Assange z poslednjej šansu

wutora, 20. februara 2024 spisane wot:

London (dpa/SN). Załožer wotkrywanskeje platformy Wikileaks Julian Assange nadźija so poslednjeje šansy. Na sudniskim słyšenju w Londonje chce so wón dźensa a jutře hrožacemu přepodaću do USA wobarać. Dyrbjał-li High Court prostwu Aassangea wotpokazać, by prawniski puć we Wulke Britaniske wučerpany był. Justicne ministerstwo USA chce ­Assangea spionaže dla zasudźić. Jemu hrozy jastwo 175 lět. Assange bě tajne dokumenty wozjewił, kotrež dokumentuja wójnske złóstnistwa USA.

EU žada sej přiměr w Gazy

Brüssel (dpa/SN). Němska žada sej zhromadnje z 25 dalšimi čłonskimi krajemi EU hnydomny humanitarny přiměr w Gazaskim pasmje. Tón ma dołhodobny přiměr, pušćenje wšěch zastajencow a zastaranje ciwilneje ludnosće zaručić, rjekny społnomócnjeny EU za wonkowne naležnosće Josep Borrell wčera po zetkanju wonkownych ministrow EU w Brüsselu. EU namołwja Israel, so wojerskeho zasadźenja w měsće Rafah wzdać.

Tójšto dźěći wuhłódnjenych

Wobydlerjo běhaja podłu pěskoweho nasypa, kotrež je město Long Beach w přihotach wočakowaneho zapławjenja podłu połkupy Long Beach w Kaliforniskej w USA natwarić dało. Najnowši zymski orkan w Kaliforniskej je so minjene dny dale zesylnił. Wjedrarjo warnuja před zapławjenjemi a krupami. Samo tornada su móžne. Foto: pa/AP/Damian Dovarganes

Wulkopósłanc Ruskeje skazany

wutora, 20. februara 2024 spisane wot:

Berlin (dpa/SN). Po smjerći politikarja ruskeje opozicije Alekseja Nawalnyja je sej wonkowne ministerstwo w Berlinje ruskeho wulkopósłanca skazało. „Politisce motiwowane chłostanske jednanja přećiwo Nawalnyjej a druhim kritikarjam knježerstwa kaž tež nječłowjeske wuměnjenja jatby w Ruskej pokazuja, kak brutalnje ­ruska justica w nadawku prezidenta Wladimira Putina z hinak myslacymi wobchadźa“, ministerstwo zdźěla, žadajo sej pušćenje wšěch z politiskich přičin jatych w Ruskej. Smjerć Nawalnyja měła so dokładnje wujasnić, sej Berlin žada.

Ruska je žadanje Němskeje mjeztym jako měšenje do ruskich nutřkokrajnych naležnosćow wotpokazała. Nawalny bě w ruskim chłostanskim lěhwje žiwjenje přisadźił. Politikar opozicije bě wot 2021 we wjacorych lěhwach jaty.

nowostki LND