To a tamne (07.05.20)
Swójsku listowu znamku ma wotnětka znata šlagrowa dwójka Die Amigos. Składnostnje 50. jewišćoweho jubileja su jimaj zastupnicy pósta dźensa cyłkownje 1 000 znamkow w jednotliwej hódnoće 80 centow w hessenskim Hungenje přepodali. Bratraj Bernd a Karl-Heinz Ulrich staj składnostnje jubileja lětsa album z najwuspěšnišimi šlagrami swojeje 50lětneje karjery wudałoj.
Dobru a špatnu powěsć su fanam Wopičeje hory w Salemje nad Bodamskim jězorom posrědkowali: Woblubowany park je wot 25. meje zaso přistupny, wopički z popcornom picować pak wjace móžno njebudźe. Tak chcedźa tomu zadźěwać, zo so wopytowarjo a sobudźěłaćerjo z koronawirusom natyknu, hdyž so ludźo při picowanju zhromadźa. Wopicy móža so po parku swobodnje hibać.
Wjele mjenje nadawkow
Wiesbaden (dpa/SN). Wobjim nowych nadawkow w němskej industriji je koronakrizy dla tak słaby kaž minjene 30 lět nic. W měru měješe předźěłace přemysło 15,6 procentow mjenje nadawkow hač w februaru. To je najrazniši spad po lěće 1991, zdźěli Zwjazkowy statistiski zarjad we Wiesbadenje. Naprawy přećiwo pandemiji su hospodarstwo w mnohich wobłukach zlemili. Mjezynarodne dodawanje tworow je přetorhnjene. Na eksport orientowane wobłuki, kaž mašinotwar, su wosebje potrjechene.
Spahn za jasne zakroki
Berlin (dpa/SN). Zwjazkowy minister za strowotnistwo Jens Spahn (CDU) sej žada, při znowazahajenju hrow zwjazkoweje koparskeje ligi konsekwentnje přećiwo tym zakročić, kotřiž předpisy koronapandemije dla njedodźerža. „Smy minjene dny widźeli, zo tón abo tamny žane zrozumjenje za naprawy nima“, rjekny Spahn w rańšim magacinje ZDF. Jasne zakroki su tuž „jara, jara wažne“. Spahn poćahowaše so na widejo, w kotrymž kopar Herthy BSG Salomon Kalou naprawy přećiwo koronje wusměšuje.
Němska łódź sćazana
„Preč wot zasadneho zakaza“
Drježdźany/Berlin (dpa/SN). Sakski ministerski prezident Michael Kretschmer (CDU) wupraja so za „nowe wobchadźenje“ z koronapandemiju. „Preč wot zasadneho zakaza a na puć k zasadnemu haj“, rjekny Kretschmer dźensa w rańšim magacinje sćelaka ZDF. „Dyrbimy nětko telko kaž móžno dopušćić, stajnje pod dokładnym wotwažowanjom a z wotpowědnymi hygieniskimi konceptami. Mamy so dołhodobnje na žiwjenje z wirusom zwučić, při čimž pak dyrbjało tak wjele kaž móžno normalnje fungować.“ Zdobom sakski premier na to pokaza, rozdźělne rozpřestrěće wirusa w jednotliwych regionach bóle wobkedźbować.
Zwjazkowa kanclerka Angela Merkel (CDU) je dźensa na widejowej konferency z ministerskimi prezidentami zwjazkowych krajow wo koronapandemiji wuradźowała. Hižo do konferency bu znate, zo by wona dalše postupowanje přećiwo wirusej jednotliwym krajam přewostajić chcyła. Tak chcyli w někotrych krajach hižo kónc tydźenja prěnje piwowe zahrody zaso wotewrěć.
Najprjedy zwučować
To a tamne (06.05.20)
Pjećlětneho za wodźidłom awta lepiła je policija na awtodróze w zwjazkowym staće USA Utah. Policistam pachoł rjekny, zo je po puću do Kaliforniskeje, zo by sej Lamborghini kupił. Měješe pak runje tři dolary při sebi. Zastojnikam bě napadnyło, zo awto jara njewěsće jědźeše. Kaž staršej měnještaj, njebě hólc hišće ženje sam jěł.
Mysteriozne to zadobywanje na zakładnej šuli w sewjerorynsko-westfalskim Kerpenje. Tam běchu skućićeljo wšelake sportowe nastroje ze składa wzali a je wužiwali, mjez druhim trampolin. Prawdźepodobnje běchu dołhi mejski kónc tydźenja wužili, zo bychu so přez třěšne wokno zadobyli a zaso raz porjadnje sportowali. Pokradnyli ničo njejsu.
Šiman znowa wuzwoleny
Drježdźany (SN/bn). Zapósłanc Sakskeho krajneho sejma Marko Šiman (CDU) wostanje předsyda parlamentariskeje přirady Załožby za serbski lud. Wčera su jeho we wobłuku posedźenja rady w Berlinje w zastojnstwje wobkrućili.
Ćežišćo zeńdźenja bě nimo toho nowe financne zrěčenje, wo kotrymž załožba na nowy tydźeń wuradźuje. Přezjedni sej běchu, zo měli srědki aktualnemu połoženju přiměrić a přiražki Zwjazka kaž tež Sakskeje a Braniborskeje powjetšić.
Dalšej wažnej temje běštej strukturna změna w brunicowym regionje a koronapandemija. „Kriza so na serbske towarstwa – kulturne kaž tež sportowe – wuskutkuje, a to nic jenož krótkodobnje. Wosebje hladajo na sponsoring z toho wuchadźamy, zo wón dale woteběracych dochodow wotpowědnych firmow wjace tak wobšěrny njebudźe kaž dotal. Namołwjamy tuž załožbu, so z problematiku rozestajeć“, Šiman rozłoži.
Nastupajo strukturnu změnu sej přirada po słowach stareho a noweho předsydy „po dosć wobšěrnej diskusiji wot Zwjazka žada, Serbow tež na zakonskej runinje do konceptow zapřijeć“.
Čěska kontrole podlěši
Praha (dpa/SN). Čěska podlěši swoje kontrole na mjezy k Němskej a Awstriskej znajmjeńša hač do 13. junija. To je knježerstwo ministerskeho prezidenta Andreja Babiša wčera wječor wobzamknyło. Hłowna přičina je bój přećiwo koronawirusej. Za čas hač do 17. meje podlěšeneho wuwzaćneho stawa njesmědźa žani wukrajnicy do kraja. Češa smědźa republiku wopušćić, dyrbja pak po nawróće do dwutydźenskeje karanteny abo negatiwny test korony předpołožić.
Zwjazk wučerjow spokojom
Berlin (dpa/SN). Zwjazk wučerjow Němskeje je spokojom na wčerawše wotewrjenje šulow za statysacy dźěći a młodostnych reagował. „Na najwjace zakładnych šulach je to derje fungowało, štož pokazuje, zo su tež dźesaćlětni kmani předpisy dodźeržeć, hdyž su wo trěbnosći přeswědčeni“, rjekny wiceprezident zwjazka wučerjow Hans-Peter Meidinger nowinarjam. W někotrych zwjazkowych krajach móžachu po zakónčacych rjadownjach wčera tež wšitke tamne zaso do šule.
Mjeza wostanje zawrjena
Hosćency bórze zaso wotewrěć
Podstupim (dpa/SN). Nastupajo zběhnjenje wobmjezowanjow w gastronomiji a hotelach koronawirusa dla měłoj so Berlin a Braniborska wusko wothłosować, kaž sej frakciji CDU wobeju krajow žadatej. Berlinski senat měł so zhromadnje z braniborskim knježerstwom za to zasadźić, zo hosćency a hotele bórze zaso wotewru“, rjekny frakciski šef Berlinskeje CDU Burkhard Dregger.
Braniborski frakciski šef CDU Jan Redmann je za wolóženja wotsrjedź meje. Předsyda Berlinskeje frakcije FDP Sebastian Czaja pak so za to wupraja, hosćency hižo přichodny kónc tydźenja wopytowarjam zaso spřistupnić.
Herbst: Trjebamy perspektiwu
Zapósłanc FDP za jasny jězbny plan nastupajo normalitu žiwjenja
Drježdźany (dpa/SN). Zapósłanc FDP w zwjazkowym sejmje Torsten Herbst z Drježdźan kritizuje najnowše wolóženja krajneho knježerstwa nastupajo koronapandemiju jako njedosahace. „Po přesłapjacym wobzamknjenju kabineta minjeny tydźeń trjebamy skónčnje jasny jězbny plan poněčimneho wotewrjenja hosćencow a hotelow w Sakskej“, Herbst wuswětla. Přiwšěm měli pruwować, hač móža ludźo krute hygieniske předpisy dodźeržeć. „Runje pod hołym njebjom je to poměrnje jednore. Smy w Němskej z wótrymi naprawami a dobrowólnym wobmjezowanjom tomu zadźěwali, zo so koronawirus raznje rozpřestrěwa. Nětko pak trjebaja ludźo jasnu perspektiwu, w kotrych kročelach ma zaso normalita do hospodarskeho žiwjenja zaćahnyć. To płaći wosebje za wobłuki, kotrež su wot krizy najbóle potrjechene, kaž stej to turizm a gastronomija.“ Zapósłanc FDP je přeswědčeny, zo towaršnosć šok pandemije na dlěši čas njepřewinje, hdyž zamołwići šansu njewužija zaso normalne žiwjenje zmóžnić.
To a tamne (05.05.20)
Zelenina město telewizora: Zhromadnje z dźěćimi w bydlenju kórki a tomaty plahować je w Japanskej w času koronapandemije dźeń a woblubowaniše. Wikowarjo symjenja w stolicy Tokiju maja widźomnje wjace kupcow, kotřiž chcyli w milionowej metropoli z dźěćimi doma w sadźenskich kašćikach zeleninu plahować. Wuwzaćny staw płaći hač do kónca meje, tuž maja hišće trochu chwile.
Po měsacy trajacym čakanju na morju su namórnicy 59lětneho płachtakowarja ze Singapura wuchowali a na kraj dowjezli. Wong Tetchoong bě so spočatk februara na tři lěta trajacy dyrdomdej po oceanu nastajił. Po wudyrjenju koronakrizy pak su wšitke přistawy zawrěli. Na Fidźiskich kupach su muža nětko přiwzali: Do karanteny wón njetrjeba, wšako njeje jeho na morju nichtó natyknyć móhł.
