Berlin (dpa/SN). Hladajo na planowany klimowy stawk přichodny pjatk wočakuje dźěłarnistwo wučerjow VBE wot politikarjow jasne wuprajenja, kak měli šule z hodźinami wobchadźeć, kotrež dźěći na šulach pobrachuja. Předsyda dźěłarnistwa Udo Beckmann wčera k tomu rjekny: „Dyrbi kónc być z falšnosću, na jednym boku zasadźenje šulerkow a šulerjow podpěrować a jich indirektnje k wobdźělenju na demonstracijach namołwjeć, ale na druhim boku šulam zamołwitosć nabrěmjenić, rozsudźić, kak a hač na ranjenja zakonsce jasnje rjadowaneje šulskeje winowatosće reaguja.“

Hibanje Fridays for future je do globalneho tydźeń trajaceho stawka za lěpši škit klimy namołwjało, kotryž ma so pjatk započeć. Protesty planuja we wjace hač 2 000 městach w 129 krajach. Wot šwedskeje aktiwistki Grety Thunberg nastorčene protestne hibanje ma podpěru šulerkow a šulerjow w mnohich krajach. Woni protestuja hižo měsacy dołho kóždy pjatk, tež w šulskim času. Beckmann politice wumjetuje, zo šulam njepomha.

Wobćežne pytanje za móžnymi koaliciskimi partnerami w Podstupimje

Podstupim (dpa/SN). Za něšto dnjow ma jasne być, z kim chce braniborska SPD koaliciske jednanja zahajić. Tuchwilu sonděrowanske rozmołwy hišće traja: Njedźelu popołdnju zetkachu so třo móžni partnerojo zhromadneho knježerstwa SPD, Lěwica a Zeleni. Wčera rěčachu SPD, CDU a Zeleni ze sobu. Mjez wšitkimi stronami běchu so dojednali, zo njesmě so ničo wo rozmołwach do zjawnosće předrěć.

Mjeztym jewja so w SPD přiběrajcy hłosy, kotrež wuprajeja so za zwjazk z CDU a Zelenymi. Po informacijach nowin je prezident zwjazka wokrjesow Braniborskeje, Wolfgang Blasig (SPD), wotpowědne stejišćo zabrał. Po jeho słowach hodźa so zajimy komunow w koaliciji SPD, CDU a Zelenych lěpje přesadźić hač z knježerstwom SPD, Lěwicy a Zelenych. Blasig je krajny rada we wokrjesu Podstupim-Srjedźna marka. Do toho bě so hižo pokładnik SPD Harald Sempf jako prěni čłon krajneho předsydstwa SPD za čerwjeno-čorno-zelenu koaliciju wuprajił, zo móhli na wólbny wuslědk wotpowědnje reagować.

Berlin (dpa/SN). Zwjazkowy prezident Frank-Walter Steinmeier je „surowosće přewróta“ wuzběhnył, z kotrymiž su so ludźo na wuchodźe Němskeje po powalenju murje bědźić dyrbjeli. „Tójšto wuchodnych Němcow nima so hač do dźensnišeho za słyšanych, njerěčo wo tym, za zrozumjenych“, rjekny Steinmeier wčera w Berlinje. Jich stawizny njejsu so ze samozrozumliwym wobstatkom našeje zhromadnosće stali. 30 lět po přewróće je najwjetši čas, zo so tole změni, Steinmeier potwjerdźi.

Zwjazkowy prezident rěčeše wo „nowych hłubokich łamkach“, kotrež so tež we wólbnych wuslědkach wotbłyšćuja. Wón pokaza zrozumjenje za njespokojnosć w kónčinach z wysokej bjezdźěłnosću, kotrež młodźi ludźo wopušćeja. Je wažne, zo su politikarjo w tutych kónčinach po puću a so z ludźimi rozmołwjeja. Njespokojnosć njeje pak woprawnjenje, wšitko činić směć. W demokratiskim rozestajenju je mjezow. Štóž hidu a šćuwańcu rozšěrja a so z neonacistiskimi syćemi­ zwjazuje, tute mjezy rani, rjekny Steinmeier we wobłuku přednoška „Wočakowanja­ a přesłapjenja“.

Časowy skok do zašłosće je sej sobudźěłaćer železnicy na Lipšćanskim hłownym dwórnišću dowolił: Wón změni taflu z časami wotjězdow a informowaše pućowacych, zo njejědźe přichodny ćah do Kamjenicy, ale do Karl-Marx-Stadta. Wón chcyše na to dopominać, zo nošeše město nimale 40 lět mjeno Karla Marxa. Wotpowědujo tomu bě regionalna železnica, kotraž čaru wobhospodarja, staru parnu lokomotiwu před ćah powěsnyła.

Zwada wo pokład Wikingow w Šotiskej zaběra nětko tamniše sudnistwo. Cyrkej je namakarja pokłada Dereka McLennana wobskoržiła. Muž bě před pjeć lětami z pomocu metaloweho detektora pokład na polu našoł, kotryž cyrkwi słuša. Za wjace hač dwaj milionaj eurow muž pokład pozdźišo Šotiskemu narodnemu muzejej předa. Cyrkej njedósta ničo. Pokład wopřija wjace hač sto eksponatow, kotrež běchu Wikingojo swój čas rubili.