Fotografija we Łužicy
Zhorjelc. Wot 8. do 10. měrca wotměje so w Zhorjelcu fachowe zeńdźenje „We wokomiku“. Wuměłcy a wědomostnicy chcedźa tam aktualny staw slědźenja k fotografiji we Łužicy a Sakskej rozjimać. Serbsku perspektiwu zastupujetaj dr. Robert Lorenc a Jürgen Maćij. Zajimcy móža so hišće hač do štwórtka, 1. měrca, přizjewić.
Minister Piwarz přijědźe
Wojerecy. Sakski statny minister za kultus Christian Piwarz přepoda jutře Wojerowskemu wyšemu měšćanosće Stefanej Skorje (wobaj CDU) spěchowanske srědki za nowu Wojerowsku wyšu šulu. Za to chcedźa dwě pod pomnikoškitom stejacej twarjeni modernizować a nowotwar přidać. Tež wonkowne připrawy nastanu. Cyłkowna suma, kotruž nałoža, wučinja 11,7 milionow eurow.
Šula ponowjena
Za Łužicu wabili
Hamburg. Na wčerawšich wikach Němskeho kolesowarskeho kluba ADFC je tohorunja turistiski zwjazk Łužiska jězorina w Hamburgu wo turistow wabił. Kaž rozprawja Serbski rozhłós, je so łužiski zwjazk z dalšimi turistiskimi zwjazkami našeho regiona předstajił. Mjez druhim předstajichu tam sydom kolesowarskich šćežkow srjedźneje a Delnjeje Łužicy.
Přidatne parkowanišća
Wojerecy. Hišće lětsa maja we Wojerecach nowe parkowanišća nastać. Kaž z wupisanja wuchadźa, chcedźa naprawu srjedź meje zwoprawdźeć započeć. Nastać maja přidatne zjawne městna mjez šulu za zbrašenych a policajskim rewěrom na Frenclowej. Hižo loni bě měšćanska rada wobzamknyła parkowanski koncept za stare město, po kotrymž ma tam cyłkownje 40 nowych městnow nastać.
Jenička šulerska skupina
Wotewru kofejownju
Wojerecy. Čitać a čitacym připosłuchać maja we Wojerecach za wažne. Hród a měšćanski muzej zarjadujetej nětko tuž tak mjenowanu „Čitansku kofejownju“. Nošerstwo za projekt přewzała je Towaršnosć za domiznowědu Wojerec – muzejowe towarstwo. Jako prěni čitać a powědać budźe we wobłuku swjedźenja k 750ćinam města wjelelětny nawoda muzeja a załožer zwěrjenca Günter Peters.
Powjetša zwjazkarstwo
Żagań/Mužakow. Němsko-pólske parkowe zwjazkarstwo w hraničnych kónčinach so jasnje powjetši. Kaž w zdźělence załožby Mužakowskeho Parka wjercha Pücklera rěka, přistupi lěta 2010 wutworjenemu zwjazkej jutře pjeć dalšich zelenišćow w Pólskej, Sakskej a Braniborskej, mjez nimi tež Njeswačanski park. Z rozšěrjenjom zwjazkarstwa chcedźa hišće wjac turistow přiwabić.
Wustajeńca NDRskeho designa
Szabó čestny prezident
Berlin. We wobłuku zarjadowanja East European Brunch předstaji na 68. berlinali Choćebuski filmnowy festiwal swój lětuši program. Něhdźe 200 přinoškow chcedźa w nowembru pokazać. Ćežišći budźetej Šleska a Georgiska. Jako čestneho prezidenta zdobychu sej madźarskeho režisera Istvána Szaba, kotremuž tež wosebitu retrospektiwu wěnuja.
Wo stawiznach Łužicy
Kamjenc. Łužiski almanach zaběra so ze stawiznami regiona. Wčera bu w Kamjencu 11. zešiwk rjadu wudaty. Mjez přinoškami su tež tajke ze serbskimi temami. Tak wopisuje Mathias Hüsni dźěło rěčespytnika, ludowědnika a organizatora serbskeho narodneho kulturneho žiwjenja Arnošta Muki. Dieter Reichelt wěnuje so prócowarjej dźěłaćerskeho hibanja Korli Janakej.
Pječat za kwalitu
Mjezynarodny dźeń maćeršćiny
Paris. Dźensa je Mjezynarodny dźeń maćeršćiny. Lěta 1999 bě UNESCO 21. februar na wopomjatny dźeń pozběhnyła. Zaměr bě rěčnu mnohotnosć a nałožowanje maćeršćiny spěchować. Wosebje chce organizacija na mjeńšinowe rěče skedźbnjeć, kotrež 10 000 abo mjenje ludźi wužiwa. Namjet zapodał bě Bangladesh, zo by tak na załoženje kraja tež rěčnych přičin dla pokazał.
Přepytowanja traja
Drježdźany/Budyšin. Dwě lěće po wohenju w bywšim hotelu „Husarenhof“ njejsu dotal njeskutka podhladnych wuslědźić móhli, zdźěli wčera krajny kriminalny zarjad (LKA) Sakskeje. Twarjenje bě jako decentralny azylowy kwartěr w Budyšinje předwidźane. Přepytowanja hišće traja. Specialisća su profil skućićela zdźěłali, z kotrehož nadźijeja so w LKA noweho wuchadźišća za dalše zwěsćenja.
Pytaja probandow
Podpěruja koncerny
Drježdźany. Sakska podpěruje skóržbu energijowych koncernow před sudnistwom Europskeje unije přećiwo krućišim hraničnym hódnotam za brunicowe milinarnje. Kaž statna kenclija w Drježdźanach wčera zdźěli, wobzamknjenje EU wo nowych hódnotach, kotrež maja wot lěta 2021 płaćić, po měnjenju skóržbnikow standardy techniki daloko přesahuje. Koncerny njemóža je dodźeržeć.
Mužojo so skerje tłóča
Budyšin. Žony su nastupajo profylaksu zubow mnohim z přikładom. Mužojo so před tym časćišo tłóča. To zwěsći Budyska wotnožka překupskeje chorobneje kasy KKH. Přiwšěm ličba tych, kotřiž so lětnje na profylaksy wobdźěleja, přiběra. W lěće 2016 je 61 procentow zawěsćenych KKH poskitk zubneje kontrole wužiwało. To je dźesać procentow wjac hač lěto do toho.
Nowy šeflěkar maltezow
Na srjedźiznu so wusměrić
Köln/Berlin. Wjetšina ludźi w Němskej měni z widom na zwadu wusměrjenja CDU dla, zo měła so strona wo politisku srjedźiznu starać. To wuchadźa z naprašowanja instituta Forsa w nadawku sćelakow RTL a n-tv. Po tym přihłosujetej dwě třećinje woprašanych (66 procentow) kursej srjedźizny. Mjez přiwisnikami unije je jich samo 75 procentow.
Škit před wulkej wodu polěpšić
Wojerecy. Łužiske jězory maja wulku wodu Čorneho Halštrowa wotpopadnyć. Wotpowědny projekt stej Sakska a Braniborska do programa za škit před wulkej wodu zapřijałoj. Jězory móhli hač do 60 milionow kubiknych metrow wody wotpopadnyć. Tuchwilu fachowcy pruwuja, hač su brjohi wěste dosć. Planowane maja, při- a wottoki Čorneho Halštrowa při wjacorych wodźiznach powjetšić.
Mjenje dźěći ma ćeže z chribjetom
Nowonakład bajow wušoł
Budyšin. Zběrka łužiskich bajow w němskej rěči „Sagen aus Heide und Spreewald“ je dźensa w Ludowym nakładnistwje Domowina w 9. nakładźe wušła. Za nowonakład bě Erich Schneider baje wuzwolił, je wobdźěłał a dosłowo spisał. Ilustrował bě knihu Rolf Kuhrt. Wona wobsahuje wjac hač sto powěsćow z łužiskeho regiona, předewšěm wo lutkach, připołdnicy a wódnym mužu.
Deniz Yücel z jastwa pušćeny
Berlin. Němsko-turkowski žurnalist Deniz Yücel je z turkowskeho jastwa pušćeny. To zdźěli jeho dźěłodawar, informuje nowina Welt dźensa na swojej internetnej stronje. Zwjazkowe knježerstwo je powěsće wo pušćenju mjeztym wobkrućiło. Yücel bě dlěje hač lěto bjez wobskóržby a sudniskeho jednanja w turkowskim jastwje sedźał. Wumjetowachu jemu propagandu terora.
Rozšěrja archeologisku přehladku
Wobskorža krajneho radu
Hamburg/Zhorjelc. Zwěrinoškitna strona Ethia je zhromadnje ze zajimowym zhromadźenstwom „Wjelk, haj prošu“ a Zelenej ligu Sakskeje skóržbu přećiwo Zhorjelskemu krajnemu radźe Berndej Lanzy (CDU) zapodała. Přičina je njedawno zatřěleny problemowy wjelk. Po słowach skóržbnikow bě Lange z dowolnosću, zwěrjo wottřělić, wjacore zakonje ranił. Njejsu žane dopokazane nadpady, kotrež wottřěl wjelka wusprawnjeja.
Widźi šansu za Łužicu
Grodk. Łužiski zapósłanc zwjazkoweho sejma dr. Klaus-Peter Schulze (CDU) ma předwidźanu zamołwitosć swojeje strony za hospodarski ressort w móžnym nowym zwjazkowym knježerstwje za spomóžnu. To „skići wulku šansu runje hladajo na přichod łužiskeho energijoweho regiona a z nim zwjazanu strukturnu změnu. Tak móhli při temje brunica skónčnje zas prawe ćežišća sadźeć.“
Wabja za aktiwny dowol
Předstaja digitalnu wučbnicu
Drježdźany. Rěčny centrum WITAJ chce 29. měrca w Drježdźanskej statnej kencliji prěnju serbsku digitalnu wučbnicu předstajić. Za prezentaciju programa „Serbšćinu DIGITALNJE krok po kroku wuknyć – prawopis a gramatiku“ staj so mjez druhim sakskaj statnaj ministraj za wědomosć a wuměłstwo kaž tež kultus dr. Eva-Maria Stange (SPD) a Christian Piwarz (CDU) přizjewiłoj.
Wupisaja stipendij
Biskopicy. Zhromadna załožba města Biskopic wupisa stipendij za wobdarjenych młodych muzeologow a wuměłskich wědomostnikow. Po zakónčenju studija ma so stipendiatej na šěsć měsacow swobodne dźěło bjez wjetšich financnych starosćow zmóžnić. Požadanja pod hesłom „stipendij“ přijimuje Biskopičanske měšćanske zarjadnistwo.
Hładźina morja spěšnišo stupa