Chcedźa hromadźe dźěłać
Budyšin. Załožba za serbski lud, Domowina kaž tež Radźe za serbske naležnosće Sakskeje a Braniborskeje chcedźa zhromadnje přidatne pjenjezy z fondsa za strukturnu změnu koordinować. Na to su so wčera w Budyšinje dorozumili. Pozadk dojednanja je rozsud zwjazkoweho knježerstwa zańdźeny pjatk, kotrež chce naprawy dalewuwiwanja a zachowanja rěče, kultury a tradicijow serbskeho ludu spěchować.
Žadyn festiwal při skale
Nuknica. Za kónc awgusta planowany Nukstock-openair wupadnje. To wobzamknychu čłonojo hudźbny festiwal zarjadowaceho towarstwa barakka minjenu sobotu na swojim nimorjadnym posedźenju. Přičina je njewěste połoženje w zwisku z tuchwilnej pandemiju. Wo dalšich lětušich koncertach rozsudźić chce towarstwo přichodny měsac.
Ennio Morricone njeboh
Poskićeja podpěru
Drježdźany. Na mjezynarodnym dnju drustwow su tež přenajerjo bydlenjow we Wojerecach, Kamjencu, Budyšinje a druhdźe sobotu swoje domy plakatěrowali. Pod hesłom „Towaršnosć trjeba drustwa“ přewozmu bydlenjotwarske towaršnosće socialnu zamołwitosć koronakrizy dla a poskićeja swojim čłonam pjenježnu podpěru. Za potrěbnych wobstaruja žiwidła.
Diwidenda lětsa pozdźišo
Drježdźany/Budyšin. Ludowa banka Drježdźany-Budyšin rozsudźi wo wužiwanju lońšeho lětneho nadbytka na wosebitej zhromadźiznje zastupjerjow. Wona ma so snano lětsa w 4. kwartalu wotměć. Kaž nowinski rěčnik drustwoweho kreditneho instituta Thomas Lohse zdźěli, je wot toho tež wupłaćenje diwidendy štyrjoch procentow wjace hač 45 000 drustwownikam potrjechene.
Pjenjezy za medicinsku fakultu
Třicećo hišće w karantenje
Budyšin/Zhorjelc. Tuchwilu njeje w Budyskim wokrjesu nichtó wjace z koronawirusom inficěrowany. Wot měrca 2020 je strowotniski zarjad cyłkownje 501 natyknjenje zwěsćił. 2 948 wosobow dyrbješe do karanteny, aktualnje je jich hišće 30. W Zhorjelskim wokrjesu registruja hišće jeničku infekciju, wot přikazaneje karanteny tam wokomiknje nichtó potrjecheny njeje.
Pomniki lětsa njepřistupne
Budyšin. Zarjadnistwo města Budyšina je zdźěliło, zo 13. septembra planowany dźeń wotewrjeneho pomnika lětsa wupadnje. Twarska měšćanostka Juliane Naumann (njestronjanka) „ćežki rozsud“ wobžaruje, kotryž pak je hladajo „na wěstotu a strowotu wobdźělnikow“ trěbny. „Přiwšěm smy optimistiscy, zo móžemy zarjadowanje klětu zaso wuhotować.“
Bjezdomni móža wostać
Korony dla zemrěła
Budyšin. W Budyskim wokrjesu žane nowe infekcije z koronawirusom njejsu. Ličba mortwych pak je na 20 rozrostła, rěka z krajnoradneho zarjada. 29. junija zemrěta 93lětna bě spočatk meje na koronu schorjeła a bu hač do kónca junija pozitiwnje na wirus testowana. Jako schorjena njebě wjace registrowana, sakski krajny wustaw pak je poručił ju do statistiki mortwych korony dla přiwzać.
Wo namrěwstwje rukowaćelnje
Kamjenica. Druha wuměłska bienala POCHEN wěnuje so składnostnje 30. róčnicy zjednoćenja Němskeje pod hesłom „Płaćizna přichoda“ towaršnostnemu namrěwstwu rukowaćelnje. Wot 22. oktobra do 1. nowembra předstaja w Kamjenicy 50 wuměłskich pozicijow, kotrež so awdiowizuelnje a scenisce z temu „změna – transformacija – přewrót“ rozestajeja. Kulturna załožba Zwjazka spěchuje projekt ze 70 000 eurami.
Spěchuje wažne projekty
Statnika za předsydu wuzwolili
Lipsk. Zhromadźizna Sakskeho krajneho medijoweho wustawa (SLM) je předsydu Domowiny Dawida Statnika wčera z přemóžacej wjetšinu za noweho nawodu swojeho předsydstwa wuzwoliła. Statnik naslěduje Brunhildu Fischer, kotraž bě w aprylu wotstupiła. Wón přisłuša zhromadźiznje wot lěta 2013 jako čłon, wot 2016 je městopředsyda nawodneho gremija SLM.
Kriza hišće njepřetrata
Budyšin. Po zběhnjenju krutych wobmjezowanjow koronapandemije dla je so wuwiće na regionalnych dźěłowych wikach polěpšiło. We wuchodnej Sakskej bě w juniju 18 506 bjezdźěłnych, 474 mjenje hač w meji (-2,5 proc.). Kaž Budyska wotnožka agentury za dźěło zdźěli, pokazuje wulke wužiwanje pjenjeza za krótkodźěło, zo njeje koronapandemija na dźěłowych wikach hišće přetrata. Kwota bjezdźěłnosće je 6,7 procentow.
Čěsko-pólska wójna njebudźe
Krajnu wustajeńcu podlěša
Drježdźany/Zwickau. 4. krajna wustajeńca „Boom – 500 lět industrijna kultura w Sakskej“ budźe wot 11. julija hač do kónca lěta přistupna. Wot financneho wuběrka krajneho sejma wobkrućeny pomocny paket za kulturu a turizm wobsahuje tež přidatne srědki za přehladku. Z 1,35 milionami eurow wjace je nětko dohromady 18,08 milionow za saksku krajnu wustajeńcu k dispoziciji.
Přihłosowanje a kritika
Drježdźany. Sakscy rjemjeslnicy zniženje wobrotoweho dawka, kotrež ma so tónle tydźeń wobzamknyć, witaja, ale tež kritizuja. Zniženje móhło w zawodach wjace nadawkow a wobrota po stratach w dobje wobmjezowanjow korony dla wuskutkować, rěka z foruma rjemjeslnikow w Drježdźanach. Ze zniženjom zwjazanu běrokratiju pak maja porno tomu za kapku połona.
Woheń w historiskej piwarni
Rozmołwa z Bombardierom
Drježdźany. Wot twarca kolijowych wozydłow Bombardier Transportation připowědźeny lutowanski program za němske stejnišća chcyštaj ministerski prezident Sakskeje Michael Kretschmer (CDU) a hospodarski minister Martin Dulig (SPD) dźensa z předsydu němskeho jednaćelstwa Bombardiera Michaelom Fohrerom rozjimać a z nim wo zawodomaj w Budyšinje a Zhorjelcu rěčeć.
Morgenroth nowy intendant
Zhorjelc. Nowy intendant Gerharta Hauptmannoweho dźiwadła Zhorjelc-Žitawa budźe Daniel Morgenroth. Zhorjelski wokrjesny sejmik a měšćanscy radźićeljo Zhorjelca a Žitawy su poručenje dohladowanskeje rady sćěhowali, kaž krajnoradny zarjad zdźěli. Morgenroth ma 1. awgusta 2021 Klausa Araunera naslědować, kiž zastojnstwo staroby dla złoži.
Muzej za čas korony
Tydźeń bjez nowonatyknjenych
Budyšin. Hižo sydom dnjow njesu w Budyskim wokrjesu žanych nowych infekcijow z koronawirusom zwěsćili. Wot spočatka pandemije je tu dotal dohromady 501 koronapadow, z nich je 19 ludźi zemrěło. 480 je so mjeztym wustrowiło. Hišće dwě wosobje stej aktualnje schorjenej, 32 ludźi je w karantenje. Zawčerawšim su wosom testow přewjedli.
Wuběrkam skoro runostajena
Podstupim. Rada za naležnosće Serbow při Krajnym sejmje Braniborskeje je dźeń a bóle „normalnemu“ wuběrkej parlamenta runostajena. To wuchadźa z wčera wozjewjeneho noweho jednanskeho porjada sejma. Tam je gremij w 17 paragrafach zakótwjeny. Samostatny wotrězk 12 rjaduje dźěławosć serbskeje rady we wobłuku skutkowanja parlamenta.
Jednaćel zastojnstwo złoži
Prezidentka do karanteny
Bratislava. Słowakska prezidentka Zuzana Caputova je so wčera do prewentiwneje karanteny podała. Sobudźěłaćer wot njeje bě do kontakta z pozitiwnje na koronu testowanej wosobu přišoł. Planowane zetkanje z awstriskim zwjazkowym prezidentom Alexanderom Van der Bellen chcedźa nachwatać. Bywša liberalna wobydlerska prawiznica je lěto w zastojnstwje a po naprašowanjach z wotstawkom najwoblubowaniša politikarka EU-kraja.
Třeće městno sej zdobyli
Choćebuz. W zwjazkowym wubědźowanju šulerskich firmow je sej projektowa skupina Delnjoserbskeho gymnazija w Choćebuzu ze swojej rejwanskej kofejownju „Kral“ 3. městno zdobyła. Do toho su hižo wotpowědne Braniborske wubědźowanje dobyli. Loni w awgusće je 15 jědnatkow pod nawodom wučerja Guida Kabischa ideju předewzaća wuwiło.
Pomocny paket wobkrućili
Napis budźe dwurěčny
Pančicy-Kukow. Na twarjenju zarjadniskeho zwjazka Při Klóšterskej wodźe w Pančicach-Kukowje připrawja po saněrowanju dwurěčny napis. Po wčerawšim rozsudźe zhromadźizny zwjazka budźe serbski napis horjeka, němski pod nim. Wobaj změjetej samsnu wulkosć. Dokelž wčerawše wothłosowanje z dnjowym porjadom připowědźene njebě, je móžno, zo je wospjetuja.
Rößler dale prezident kuratorija
Aue-Bad Schlema. Prezident Sakskeho krajneho sejma dr. Matthias Rößler je dale tež prezident kuratorija Dnja Saksow. Čłonojo kuratorija su jeho wčera na dobu hač do lěta 2025 w zastojnstwje wobkrućili. Wiceprezident je Freibergski wyši měšćanosta Sven Krüger. Koronakrizy dla, su lětuši Dźeń Saksow w Aue-Bad Schlemje wotprajili, nachwataja pak jón tam 2023. Klětu budźe swjatk w Freitalu.
Nowa CD Budyskeje wosady