Berlin (dpa/SN). Bjezposrědnje do noweho krizoweho zetkanja zadołženja Grjekeje dla je tamniši financny minister Giani­s Varoufakis za nowy kurs Athenskeho knježerstwa wabił. „Prošu dowolće nam reformy“, rjekny wón wčera w Ber­linje. Wot mjezynarodnych pjenjezydawarjow žadane skrótšenja mzdow a rentow Varoufakis wotpokaza, dokelž by to ludźi dale poćežowało.

Düsseldorf (dpa/SN). Dwaj a poł měsaca po znjezboženju lětadła předewzaća Germanwings w južnej Francoskej wočakuja dźensa wječor smjertne powostanki 30 pasažěrow w Němskej. Wosebita mašina Lufthansy ma kašće z Marseillea do Düsseldorfa přiwjezć. Mjez mortwymi su tež 16 šulerjow a dwě wučerce ze sewjerorynsko-westfalskeho Halterna. Lětadło ze 150 pasažěrami bě 24. měrca znjezbožiło.

Auschwitz (dpa/SN). Přežiwjeni holocausta su bamža Franciskusa přeprosyli, klětu­ we wobłuku přebytka na swětowym zetkanju młodźiny w Krakowje tež ně­hdyše němske zaničowanske lěhwo Ausch­witz-Birkenau wopytać. „Prosymy Was, tam zhromadnje z nami našich morjenych a spalenych swójbnych kaž tež stajnje zaso přez hidu na wukrajnikow a antisemitizm wonječesćeny swět w modlitwje wopominać“, rěka w lisće, kotryž je Roman Kent, prezident Mjezynarodneho Auschwitzskeho komiteja z druhimi přežiwjenymi w Oświęcimje podpisał. „Žane městno na swěće nježada sej tónle paćer, na žanym městnje njeje­ tele znamjo měra a wopominanja wótřišo słyšeć. Prošu přińdźće!“, pisaja něhdyši jeći lěhwa. Pólski bamž Jan Pawoł II. bě jako prěni nawoda katolskeje cyrkwje Auschwitz wopytał, runje tak jeho naslědnik Benedikt XVI. w lěće 2001. Auschwitz-Birkenau bě najwjetše němske zaničowanske lěhwo. Nacionalsocialisća běchu tam wjace hač milion ludźi morili, přewažnje europskich Židow.

Berlin (B/SN). W němskej zwjazkowej CDU konstituowana dźěłowa skupina „přesćěhanje křesćanow“ je dźěl fachoweho wuběrka za wonkownu, wěstotnu a wuwićowu politiku kaž tež za čłowjeske prawa strony. Gremijej z 25 ludźimi přisłušeja zastupjerjo zwjazkoweje a krajneje CDU a eksperća na polu diskriminacije. Wón ma informować wo situaciji wohroženych a přesćěhanych křesćanow.

Partnerske cyrkwje wopytali

Hannover (B/SN). Delegacija rady Ewangelskeje cyrkwje w Němskej je so w Brazilskej a Argentinskej wo partnerskich cyrkwjach informowała. Fenomen rosćaceje sekularizacije na swěće dožiwjeja tež cyrkwje Južneje Ameriki, rjekny ewan­gelska biskopka za wukraj Petra Bosse-Huber w Hannoveru. Delegaciju nawjedowaše sakski biskop Jochen Bohl.

Znamjo ekumeny