Hajnikej třělbu wotewzał je jeleń w Čěskej. Skupina hajnikow bě w lěsu po puću, jako so jeleń psa nastróži. Na to so zwěrjo na jednoho z hajnikow měrješe. Z rohami šmórny so jeleń kabata muža a roztorha jemu rukawu. Při tym wosta třělba na rohach zwěrja wisajo. Hišće dwaj kilometraj dale wobrónjeneho jelenja wobkedźbowachu. Ludźo su namołwjeni, třělbu policiji wotedać, dyrbjał-li jón něchtó namakać.
Telewizijny wobraz kaminoweho wohenja je w sewjerorynsko-westfalskim Schwelmje wulkozasadźenje wohnjoweje wobory zawinował. Žona bě wobornikow wołała, po tym zo bě w bydlenju susoda woheń widźała. Jako wjace hač 40 wobornikow k městnu wohenja dojědźe, so wěc spěšnje jako wopačny alarm wukopa. Wobydler telewizor hasny a wobornicy zaso wotjědźechu.
Statne zrěčenje wo financowanju Załožby za serbski lud, zakoń wo sylnjenju struktury we Łužicy a kubłanske naležnosć we Łužicy běchu ćežišća wčerawšeho wuradźowanje parlamentariskeje přirady załožby.
Budyšin (JaW/SN). Nowe statne zrěčenje wo financowanje Załožby za serbski lud měli Zwjazk a krajej Sakska a Braniborska tak spěšnje kaž móžno podpisać. To žadaja sej čłonojo parlamentariskeje přirady Załožby za serbski lud, kotřiž su wčera wo naležnosći online wuradźowali. Kaž zdźěli předsyda přirady Marko Šiman (CDU) na naprašowanje, je zrěčenje „zakład za dźěło załožby a tak tež za zachowanje a dalewuwiwanje rěče a kultury serbskeho ludu, nimo dalšich nadawkow, kotrež mamy sami spjelnić“. Swoje žadanje „zrěčenje hišće lětsa podpisać“ su čłonojo gremija na „tak spěšnje kaž móžno podpisać“ změnili. „Wšako buchu mnohe naležnosće koronakrizy dla přestorčene abo su so změnili. Dyrbimy dale ćišć wukonjeć, ale njepřehnawać“, zapósłanc Sakskeho krajneho sejma rozłoži.
Washington (dpa/SN). Amtěrowacy prezident USA Donald Trump je zwjazkowym zarjadam přikazał, z mustwom wokoło Joewa Bidena hromadźe dźěłać a tak přepodaće mocy přihotować. Přičina je drje zwěsćenje zamołwiteho zarjadnistwa za powšitkowne słužby GSA, kotraž wobhladuje Bidena jako „prawdźepodobneho dobyćerja wólbow“. Přiwšem so Trump dale spjećuje swoju poražku přiznać, kaž na platformje Twitter zdźěli.
Maas za mjezynarodnu pomoc
Berlin (dpa/SN). Zwjazkowy wonkowny minister Heiko Maas (SPD) namołwja z financnej podpěru Afghanistanej pokročować. „Miliony wobydlerjow su dale wot humanitarneje pomocy wotwisni. Mjezynarodne zhromadźenstwo njesmě so wotwobroćić“, rjekny Maas krótko do zahajenja UN-konferency darićelow w Genfje. Zaměr měł być, zo Afghanistan w běhu štyrjoch lět zaso na swójskimaj nohomaj steji.
Hospodarski rozmach
Waršawa (dpa/SN). Pólska chce w adwentnym času wobmjezowanja koronawirusa dla we wikowanju zběhnyć. Wobkedźbujo krute hygienowe naprawy smědźa wobchody w nakupowanskich centrumach wot 28. nowembra zaso wotewrjene měć, kaž je ministerski prezident Mateusz Morawiecki we Waršawje připowědźił. Njedźelu, 6. a 13. decembra, smědźa wobchody tohorunja předawać. Při tym dźe knježerstwu wo to, miliony dźěłowych městnow w drobnowikowanju zachować.
Spočatk nowembra bě pólske knježerstwo wukazało, wšitke wobchody we wulkich nakupowanišćach zawrěć. Wuwzaća płaća za wobchody žiwidłow, apoteki a drogerije. Hosćency, bary, fitnesowe studija a kulturne zarjadnišća wostanu hač do časa po hodźoch zawrjene. Po cyłym kraju płaćiwa internetna šulska wučba je hač do hód podlěšena. Zymske prózdniny, kotrež běchu podobnje kaž w Němskej dotal regionalnje wšelako rozdźělene, budu tam klětu jednotnje w času wot 4. do 17. januara.
Berlin (dpa/SN). K dalšemu redukowanju koronainfekcijow chcedźa tuchwilne wobmjezowanja zjawneho žiwjenja hač do hód podlěšić. Ministerscy prezidenća zwjazkowych krajow su so wčera wječor na to dojednali, hač do kónc nowembra wobstejace naprawy najprjedy raz hač do 20. decembra podlěšić. Doskónčnje rozsudźić chcedźa na jutřišim wuradźowanju ze zwjazkowej kanclerku Angelu Merkel (CDU).
By-li k podlěšenju wobmjezowanjow dóšło, bychu hosćency kaž tež wólnočasne a kulturne institucije, kotrež njesmědźa wot spočatka nowembra wjace dźěłać, dale zawrjene wostać dyrbjeli.
Ministerscy prezidenća ludźi namołwjeja, so do hodownych swjatych dnjow do wjace dnjow trajaceje izolacije podać. Silwesterski wohnjostroj měli na naměstach zakazać, zo njebychu so wjetše skupiny ludźi wutworili. Na šuli, předewšěm w rizikowych kónčinach, měli šulerjo tež we wučbje nahubnik nosyć. Dźěłodawarjo měli hodowne prózdniny podlěšić a ludźom dźěło doma zmóžnić.
Podstupim/Berlin (dpa/SN). Třeći pad ptačeje gripy su w Braniborskej wobkrućili. Kaž ministerstwo za škit přetrjebarjow wčera zdźěli, su we wokrjesu Prignitz zahinjene pólne huso pozitiwnje na wirus H5N8 testowali. Friedricha Löfflerowy institut je podhlad po informacijach ministerstwa mjeztym wobkrućił. Huso běchu spočatnje při haće widźeli a wobkedźbowali, zo so chětro spodźiwnje zadźerži, krajnoradny zarjad informowaše. Něšto po tym běchu je zahinjene na kromje hata namakali. Mějićeljo wokolnych kormjernjow pjerizny su namołwjeni, swój wobstatk wobkedźbować a kóždužkuli njenormalnosć zamołwitym zarjadam hnydom přizjewić.
New York (dpa/SN). W boju přećiwo koronapandemiji chce UNICEF, dźěćacy pomocny skutk organizacije UNO, dwě miliardźe dozow šćěpjenskeho seruma do cyłkownje 92 chudych krajow pósłać. Logistiske přihoty su hižo zahajene, kaž UNICEF wčera zdźěli. Tež miliardu sykawow chcedźa tam pósłać.
„Samsny čas, w kotrymž dale na tym dźěłaja šćěpiwo přećiwo koronawirusej wuwiwać, zesylnja UNICEF swoje napinanja, zhromadnje z lětanskimi předewzaćemi, transportnymi firmami, łódźnistwowymi linijemi a dalšimi logistiskimi zjednoćenstwami tutón žiwjenje wuchowacy srědk tak spěšnje kaž móžno dodawać, rjekny direktorka zastaranskeje wotnožki UNICEF Etleva Kadilli. Tak chcedźa sej dosć transportnych móžnosćow za „historiski mamutowy nadawk“ zawěsćić. „Wobstarać, dodawać a rozdźělić serum přećiwo koronawirusej drje budźe najwjetša hdy zahajena operacija.“
Wot januara je UNICEF w boju přećiwo pandemiji po wšěm swěće srědki kaž škitne nahubniki, kitle, dychanske nastroje a srědki za testy w hódnoće 160 milionow eurow rozesłała.
Noze za konopejom stej pytaneho skućićela w hornjofrankskim Kulmbachu přeradźiłoj. Policiju běchu rozestajenja dla do bydlenja wołali. Zwada wukopa so jako łahodna. Při tym pak wuhladachu policisća noze. 32lětny, kotrehož z wukazom zajeća pytachu, bě na wopyće w bydlenju a bě sej pjany za konopejom wusnył. Zastojnicy jeho spóznachu a jemu ruce sputachu. Potom jeho hakle wubudźichu.
Swojorazny foto transportera, kiž dalši transporter transportowaše, na kotrymž steješe wosobowe awto, je Krefeldska policija w interneće wozjewiła. Policija bě awto wažiła a zwěsćiła, zo je wozydło wo 30 procentow přećežke. Bychu-li zamołwići za awto předpisanu maksimalnu wahu dodźerželi, bychu z nim tež w tutej kurioznej formje dale jěć móhli, policija na naprašowanje zajimcow zdźěli.
Dohlady do sceny tak mjenowanych reichsbürgerow zmóžni minjenu wutoru webinar Sakskeje krajneje centrale za politiske kubłanje. Drježdźanski politologa Sebastian Trept je tam jara nazornje referował a wuwabi mjez něhdźe 40 wobdźělnikami tójšto prašenjow.
Drježdźany (SN/at). Politiske kubłanje w cyber-rumje je Sakska krajna centrala za politiske kubłanje z druhej žołmu koronapandemije zaso do srjedźišća swojeho skutkowanja stajiła. Zazběhowa tema, zarjadowanje bě poprawom w Annabergu-Buchholzu planowane, bě na hibanje wusměrjena, wo kotrymž drje přeco zaso słyšiš, mnohim ludźom pak dokładniše informacije pobrachuja. Tu nawjazachu wuwjedźenja Sebastiana Trepta, kiž po swójskich słowach „wot lěta 2016 na reichsbürgerach lěpi“. Wot toho lěta wustawowy škit jich wobkedźbuje.