Mnichow (dpa/SN). Bayerski ministerski prezident Markus Söder (CSU) a čěski ministerski prezident Andrej Babiš chcetaj mjezu tež při dale přiběracej ličbje natyknjenjow z koronawirusom wotewrjenu wostajić. „Mjezu zawrěć njeby w boju přećiwo pandemiji wjele wunjesło, by pak razne negatiwne wuskutki měło“, rjekny Söder w Mnichowje po widejowej konferency z Babišom. Podłu wobeju bokow statneje hranicy płaća mjeztym samsne škitne prawidła kaž nahubnik wužiwać a wotstawk dodźeržeć. Tak by zawrjena mjeza předewšěm hospodarstwo, posłužby a transport tworow haćiła. Tež medicinske zastaranje by potrjechene było, kaž Markus Söder argumentowaše. W bayerskich hladarnjach dźěła wosebje wjele čěskich dojězdźowarjow.
Söder potwjerdźi Babišej swój dotalny poskitk, sto łožow za čěskich pacientow rezerwować. Tež Babiš wuznam mjezsobneje pomocy wuzběhny: „Hdyž němske hospodarstwo zwrěšći, tež naše hospodarstwo njepřežiwi.“ Wobaj rěčeštaj tuž runje tak wo mjezu přesahowacych projektach, kaž wo mobilnej telefonowej syći 5G a wo wutwarje železniskich zwiskow.
Grünheide (dpa/SN). Šef předewzaća Tesla Elon Musk je zaso w Němskej. Dwaj měsacaj po swojim prěnim wopyće je wón wčera na nowym lětanišću BER přizemił. Po informacijach powěsćernje dpa chce Musk na twarnišću prěnjeje europskeje twornje ameriskeho twarca elektroawtow w Grünheidźe pola Berlina rozmołwy wjesć. Wčera wječor je so wón nimo toho z hospodarskim ministrom Braniborskeje Jörgom Steinbachom (SPD) zetkał.
Přistajić nowych fachowcow je Muskej wočiwidnje šefowa naležnosć: Předewzaćel bě w interneće připowědźił, zo chce prěnjorjadnych inženjerow nawabić a z požadarjemi wosobinsce na twarnišću rěčeć. Zawostajił bě tež adresu, dokal móža zajimcy swoje požadanje pósłać. Wopyt Muska bě spontany a překwapjacy, byrnjež wón stajnje zaso připowědźił, zo chcył nětko časćišo do Němskeje přińć. W septembru bě twarnišćo noweje twornje prěni króć wopytał. Do toho bě so ze zwjazkowym hospodarskim ministrom Peterom Altmaierom (CDU) a z braniborskim ministerskim prezidentom Dietmarom Woidku (SPD) rozmołwjał.
Třilětneho hólca na zastanišću wuhladał je busowy šofer w badensko-württembergskim Ludwigsburgu. Jenož nócny woblek zdrasćeny bě hólčk z bydlenja maćerje ćeknył. Šofer sadźi jeho do busa a zawoła policiju. Bórze na to přizjewi so tam starosćiwa mać, kotraž rjekny, zo drje bě jeje synk prjedy hač hewak wotućił a so skradźu zminył. Krótko na to móžeše wona jeho na straži wotewzać. Tak dołho běchu zastojnicy třilětneho z čajom a šokolodu zastarali.
Kuriozny kónc to pytanskeje akcije policije w Kölnje za zhubjenym awtom: Pytali su swědkow, kotřiž bychu něšto k „pokradnjenemu Citroënej 2CV“ rjec móhli. Rozrisanje přińdźe spěšnišo hač myslene: Susod bě parkowace awto „z ciwilnoprawniskich přičin“ wot priwatneje słužby wotwlec dał. Kak staj so susodaj skónčnje dojednałoj, njeje znate.
Washington (dpa/SN). Z wólbnym dobyćom we wažnymaj statomaj Michigan a Wisconsin je so demokratiski prezidentski kandidat USA Joe Biden swojemu zaměrej bližił, stać so z přichodnym prezidentom kraja. Dźensa rano pobrachowaše jemu jenož hišće jenički zwjazkowy stat. W staće Nevada chcedźa wječor němskeho časa wo stawje wuličenja informować. Mjeztym su wólbni wobkedźbowarjo Europskeje unije prezidenta Donalda Trumpa kritizowali, dokelž bě so wón dočasnje za dobyćerja deklarował.
Policiju lěpje planować
Drježdźany (dpa/SN). Sakski krajny sejm je dźensa wo personalnym planowanju policije kraja wuradźował. Na tym polu chcedźa přichodnje efektiwnišo postupować. Po předstawje knježaceje koalicije ma wotpowědna fachowa komisija prawidłowne rozprawy předpołožić a wobstejace struktury přepruwować. Sakska ma tuchwilu 14 000 policistow. Rěčeli su tež wo wotewrjenskich časach wobchodow 31. decembra.
Parlament so schadźował
Washington (dpa/SN). Prezident USA Donald Trump wužiwa w boju wo wuličenje wolerskich hłosow w zwjazkowym staće Pennsylvania dalše prawniske srědki. Po tym puću chce wuličenje hłosow přetorhnyć, doniž nimaja republikanscy wólbni wobkedźbowarjo přistup do wólbnych lokalow, hdźež pomocnicy hłosowanske lisćiki liča. Koronapandemije dla běchu wobkedźbowarjow ze žurlow pósłali. Z dalšimi skóržbami chce Trump tomu zadźěwać, zo z póštu pósłane hłosy wolerjow wuličeja, kotrež hišće hač do pjatka pola wólbneje komisije dochadźeja.
Trump po dotalnym wuličenju w Pennsylvaniji nawjeduje, jeho předskok pak woteběra, ćim wjace hłosow je wuličene. Z 20 wólbnymi mužemi móhł Pennsylvania rozsudny stat w boju wo zastojnstwo prezidenta być. Wólbnobojowy šef Trumpa Bill Stepien bě wčera w telefoniskej konferency rjekł, zo je Trump w Pennsylvaniji dobył, jako hłosowanske lisćiki hišće ličachu. Do toho bě so Trump jako dobyćer cyłych prezidentskich wólbow deklarował, byrnjež toho demokratiski kontrahent Joe Biden dobre wuhlady na dobyće měł.
Berlin (dpa/SN). Dźeń a wjace laborow w Němskej ma problemy ze spěšnym wuhódnoćenjom koronatestow. Po informacijach Roberta Kochoweho instituta měješe 69 laborow kraja cyłkownje 98 931 hišće njewobdźěłanych testow nakopjenych. Dwaj tydźenjej do toho bě to hišće 52 laborow z 20 799 probami, kotrež njeběchu hišće wuhódnoćene. „Z přiběracej ličbu testow, kaž to tuchwilu wobkedźbujemy, so přerězny čas wobdźěłanja tohorunja podlěši. To ma konsekwency nastupajo spěšnu informaciju potrjechenym wosobam a zamołwitym strowotniskim zarjadam“, piše institut.
Minjeny čas bě dźeń a wjace laborow zdźěliło, zo dźěłaja na hranicy swojeje kapacity. Kwota pozitiwnych testow w Němskej je mjeztym dźesać króć tak wulka kaž nalěto. Tehdy bě 0,7 procentow wšěch testow na koronawirus pozitiwny, mjeztym namakaja pola 7,3 procentow testowanych koronawirus. Ličba tydźensce přewjedźenych testow je so mjeztym wo 400 000 na nětko 1,6 milionow powjetšiła, štož je rekord w Němskej.
Rom (dpa/SN). Terorowej nadpadaj we Wienje a Nizzy njesmětej po słowach bamža Franciskusa zhromadne dźěło nabožinow wohrozyć. Na generalnej awdiency wčera we Vatikanje rjekny hłowa katolskeje cyrkwje, zo spomina na „bjezmócne wopory terorizma, kotrehož eskalacija a surowosć so po wšej Europje rozpřestrěwa“. Nadpady maja tež zaměr, „bratrowsku zhromadnosć mjez nabožinami přez namóc a hidu kazyć“, swjaty wótc warnowaše. W Awstriskej a Francoskej běchu pozdatni islamistiscy skućićeljo w běhu něšto dnjow wjacorych ludźi morili abo zranili.
Awdiencu, kotraž wotmě so druheje žołmy koronapandemije dla po dlěšim času bjez putnikow w knihowni japoštołskeho palasta, wusyłachu w interneće. Franciskus rjekny, zo trěbne wěstotne naprawy wobžaruje. 83lětny słuša hižo swojeje wysokeje staroby k skupinje ludźi, kotraž je wot wirusoweje chorosće wosebje wohrožena. Při awdiency, na kotrejž so tež druzy zastupnicy cyrkwje wobdźělichu, njewužiwaše bamž žadyn nahubnik. Minjeny čas běchu we Vatikanje wjacore pady korony zwěsćili.