Policija (29.10.18)
Wodu kradnyli
Běła Woda. Nic alkohol abo druhe hódnotne wěcy, ale zawěrno njewšědnu rubiznu běchu njeznaći minjene dny w Běłej Wodźe pokradnyli. Po wšěm zdaću běchu woni přelěni sami nakupować hić. Tak spakosćichu woni 87lětnej žonje z jeje pincy we wjaceswójbnym domje na Humboldtowej nimale 40 blešow mineralneje wody. Byrnjež hódnota rubizny poměrnje snadna była, kaž Zhorjelska policajska direkcija zdźěli, dyrbi so staruška nětko znowa dračować, zo by sej z kupnicy ćežke bleše wody zaso domoj znosyła.
Policija (26.10.18)
E-bike pokradnyli
Wojerecy. Přiběrajcy měrja so paduši kolesow na tajke z elektriskim motorom. Tak pokradnychu njeznaći tele dny na Wojerowskej Schweitzerowej běły e-bike marki Bulls Green Mover. Z kolesom zhubištej so tež nahłownik a dešćowy płašć 65lětneho wobsedźerja. Koleso ze zeleno-běłym pismom a z nalěpkom předawarja z Rottweila na ramiku ma hódnotu něhdźe 750 eurow. Nahłownik a płašć stej 150 eurow hódnej.
Policija (25.10.18)
Wopak přesćahnył
Zhorjelc. W awtodróhowym tunlu pod Limasom bě zawčerawšim do směra na Zhorjelc twarskich dźěłow dla lěwa jězdnja zawrjena a spěšnosć na 60 km/h wobmjezowana. Wodźerjej Forda pak bě to wšojedne. Na lěwej jězdni wón tójšto druhich awtow přesćahny – mjez druhim tež ciwilne jězdźidło awtodróhoweje policije. Jeho wobsadka 41lětneho wodźerja zadźerža a předpołoži jemu zličbowanku za wopačne zadźerženje: dypk w Flensburgu a 90 eurow pokuty.
Policija (24.10.18)
Cigaretowy awtomat pokradnyli
Šešow. Cyły cigaretowy awtomat su paduši w nocy na póndźelu ze Šešowskeje korčmy sobu wzali. Hódnota rubizny, wobstejaca z pjenjez a cigaretow, wučinja wjacore tysacy eurow.
Policija (23.10.18)
Paduch awta pěši ćeknył
Porchow. Hišće prjedy hač wobsedźer pytny, zo je něchtó jeho BMW pokradnył, su jón policisća wčera rano na awtodróze A 4 zwěsćili. Dźewjeć lět stare jězdźidło bu do toho w bayerskim Hofje pokradnjene. Zhromadna wobsadka zwjazkoweje a sakskeje policije chcyše jězdźidło při Ohornskej wotbóčce zadźeržeć a kontrolować. Šofer pak přikaz ignorowaše a smaleše do směra na Zhorjelc. Při Porchowskej wotbóčce wón awtodróhu wopušći, jězdźidło wotstaji a pěši ćekny. Wjacori policisća za njeznatym tež z pomocu helikoptera pytachu, njemějachu pak žadyn wuspěch. W awće zwěsćichu, zo bě zamk skóncowany. Po kriminalnotechniskim přepytowanju smě sej wobsedźer swój BMW zaso wotewzać.
Policija (22.10.18)
Tójšto škody při parkowanju
Budyšin. Wodźerka Škody Fabia chcyše zawčerawšim popołdnju na parkowanišću Budyskeho Centera na Žitnych wikach poprawom jenož wróćo zajěć a wuparkować. To pak so jej scyła poradźiło njeje, kaž Zhorjelska policajska direkcija zdźěli. 66lětna zhubi kontrolu nad jězdźidłom a so wo 180 stopnjow zwjertny. Při tym zrazy do dalšeje Škody a skónčnje do Renaulta. Njesławna bilanca tohole wuparkowanskeho pospyta: skóncowany Renault a dohromady 11 000 eurow škody.
Policija (19.10.18)
Mać wupomhać dyrbjała
Budyšin. Dokelž bě ze swojim kolesom bjez swěcy po puću, napadny 35lětny muž zawčerawšim wječor w Budyskej Strowotnej studni wobsadce policajskeho awta. Při kontroli zwěsćichu, zo so za nim hižo z přikazom zajeća pyta, dokelž pjenježne chłostanje 1 125 eurow dotal zapłaćił njeje. Nětko hrožachu jemu połtřeća měsaca jastwa. Dokelž telko pjenjez njeměješe, jeho mać za njeho zaskoči, sumu policiji přepoda a swojeho syna tak před jastwom zachowa.
Policija (18.10.18)
Pokradnjeny Mercedes namakali
Bórkhamor. Kedźbliwy wobydler je zawčerawšim w Bórkhamorje policiju alarmował. Blisko pohrjebnišća steješe slěbrobarbny Mercedes ze Stuttgartskim čisłom, wot šofera pak ničo widźeć njebě. Wobsadka Wojerowskeho policajskeho rewěra na to zwěsći, zo jedna so dokładnje wo te awto, kotrež bě něchtó w nocy na minjenu póndźelu w hessenskim Usingenje pokradnył. Ciwilni slědźerjo kriminalneje a zwjazkoweje policije běchu wjace hač 100 000 eurow drohe jězdźidło póndźelu dopołdnja na zwjazkowej dróze B 156 pola Hamora přesćěhowali. Njeznaty wodźer pak so z wjacore stow PS sylnym awtom do směra na Běłu Wodu zminy. Čehodla je njeznaty paduch Mercedes nětko njedaloko braniborskeje hranicy stejo wostajił, njeje znate. K jeho wosobje tež žane informacije njepředleža.
Policija je Mercedes GLC AMG zawěsćiła a wotwjezła. Kriminalni technikarjo w jězdźidle za kmanymi slědami pytachu. Po zakónčenju přepytowanjow móže sej wobsedźer swój wóz w Hornjej Łužicy zaso wotewzać.
Policija (17.10.18)
Nawijej pokradnyć chcył
Budyšin. Sobudźěłaćer wobchoda na Budyskich Žitnych wikach je so zawčerawšim paduchej do puća stupił, jako tón wobchod wopušći. 26lětny chcyše nawijej w hódnoće 460 eurow pokradnyć. Nastrojej bě wón w tobole schował, kotraž bě tak preparowana, zo njeby detektor při durjach alarm zahibała.
Policija (16.10.18)
Za paduchom podarmo spěchał
Wojerecy. Wosrjedź wobjedoweho časa je cuzy zawčerawšim we Wojerecach koleso pokradnył. Na Tešenskej skóncowa wón zamk kolesa a so z 900 eurow drohim jězdźidłom wotsali. Wobsedźer drje hišće za nim spěchaše, paduch pak so mjez bydlenskimi domami zhubi.
