Policija (23.10.19)

srjeda, 23. oktobera 2019 spisane wot:

Paduši w lawbje

Wojerecy. W běhu minjeneho kónca tydźenja běchu so njeznaći we Wojerecach do lawby zadobyli a z njeje telewizor a njebozowu mašinu spakosćili. Hakle póndźelu připołdnju je 67lětny wobsedźer to pytnył a njeskutk přizjewił. Wěcna škoda na lawbje wučinja z 500 eurami wjac hač hódnota rubizny z 350 eurami.

Katalyzator pokradnyli

Budyšin. Chětro njehańbićiwi a přede­wšěm njebojazni paduši běchu tele dny w Budyšinje po puću. Kaž policija zdźěla, su z Mitsubishija, kotryž běše na Drježdźanskej hasy wotstajeny, w nocy na póndźelu cyle woměrje katalyzator wurězali a sobu wzali. Wěcna škoda na awće wučinja něhdźe 300 eurow. Rubizna ma hódnotu 500 eurow. Kriminalna policija so z padom nětko zaběra.

Policija (22.10.19)

wutora, 22. oktobera 2019 spisane wot:

Dźěćo lochko zranjene

Nowoslicy. Při njezbožu w Nowoslicach je so njedźelu připołdnju mały hólc zranił. Kaž policija zdźěla, bě wón ze swojim kolesom ze statoka na hłownu dróhu wujěł a chcyše do směra na Jurasec młyn dale jěć. 68lětny wodźer wosoboweho awta, kiž bě na statnej dróze S 101 do směra na Chrósćicy po puću pak njemóžeše zražce zadźěwać, byrnjež spěšnje a sylnje borzdźił. Kaž w zdźělence policije rěka, je so hólčk na zbožo jenož lochko zranił. Wěcna škoda na awće 68lětneho muža wučinja po trochowanjach zastojnikow něhdźe 400 eurow.

Policija (21.10.19)

póndźela, 21. oktobera 2019 spisane wot:

Dróha dospołnje zawrjena była

Miłoćicy. Na statnej dróze S 94 z Kamjenca do Porchowa je dźensa rano krótko do napoł sedmich k njezbožu dóšło­. Na wotbóčce pola Miłoćic njebě šofer transportera při wotbočenju na statnu dró­hu předjězbu z Porchowa přijědu­ceho Chevroleta wobkedźbował, na čož dóńdźe k zražce. Wobeju šoferow dyrbjachu zranjeneju do chorownje dowjezć. Cyłkownje pjatnaće wohnjowych wobornikow ze Smječkec a Njebjelčic je městno nje­zboža zawěsćiło a zrumowało. Wša­ko běch­u z jězdźidłow wšelake maćizny wuběželi. Dróha bě za to cyłu hodźinu zawrjena, štož so zdobom na powołanski wobchad wuskutkowa.

Policija (18.10.19)

pjatk, 18. oktobera 2019 spisane wot:

Katastrofa na kolesach

Słona Boršć. We woprawdźitym zmysle włosy na hłowje stali su zastojnikam awto­dróhoweje policije předwčerawšim, jako kontrolowachu nakładne awto, kotrež bě na A 4 do směra na Zhorjelc po puću. Lisćina njedostatkow bě tak dołha, zo móhło katastrofje dóńć, policija wčera zdźěli. Nimo někotrych wottorhnjenych a njefungowacych borzdźidłow zwěsćichu zdobom, zo z motora, kolesynow (Getriebe) a diferenciala chětro wolij kapa. Nimo toho běchu wjacore wobruče hač na tkaniny wotjězdźene a hrožachu kóždy wokomik prasnyć. Samo fachowc DEKRA dyrbješe přiznać, zo tajki „jězdźacy wrak“ dotal hišće ženje widźał nje­bě. Policisća zakazachu šoferej dale jěć. Zdobom změje so tón tohorunja před sudnistwom wusprawnić.

Policija (17.10.19)

štwórtk, 17. oktobera 2019 spisane wot:

Motorski ćežko zranjeny

Smječkecy. 24lětny motorski je so předwčerawšim wječor při njezbožu na dróze mjez Róžantom a Smječkecami ćežko zranił. Kaž policija zdźěli, je wón ze swojej KTM w křiwicy z puća zajěł a padnył. Hač bě dalše jězdźidło wobdźělene abo dźiwina na njezbožu wina, zastojnicy pruwuja. Ćežkozranjeneho dyrbjachu z helikopterom do chorownje dowjezć.

Policija (16.10.19)

srjeda, 16. oktobera 2019 spisane wot:

NDRske mopedy požadane

Eckartsberg/Rózbork. Chětro požadane su mjez paduchami tuchwilu zaso raz NDRske mopedy typa Simson. Tón zaćišć znajmjeńša zbudźa wčerawša nowinarska zdźělenka policije. Tam mjenujcy rěka, zo su njeznaći hnydom dwaj tajkej mopedaj spakosćili. W Eckartsbergu w gmejnje Mittelherwigsdorf pola Žitawy su so paduši w nocy na póndźelu do garaže zadobyli a S 50 sobu wzali. Moped měješe hódnotu něhdźe 1 500 eurow.

Tohorunja w Rózborku (Rothenburg) su njeznaći Simson typa S 51 w nocy na póndźelu z garaže pokradnyli. Tež tón měješe hódnotu něhdźe 1 500 eurow. Na woběmaj městnomaj su policisća wjacore slědy zawěsćić móhli. Dalše slědźenja za pokradnjenymaj Simsonomaj je mjeztym kriminalna policija přewzała.

Policija (15.10.19)

wutora, 15. oktobera 2019 spisane wot:

Ćežko zranjeni po njezbožach

Čorny Chołmc/Nowa Łuka. Hnydom dwě njezboži z chětro wulkej wěcnej škodu zregistrowa policija njedźelu w Čornym Chołmcu a mjez Nowej Łuku a Horami pola Wojerec. 69lětny wodźer VWja chcyše so pola Čorneho Chołmca zawróćić a přewidźa so bližacy Audi. 55lětny šofer njemóžeše zražce hižo zadźěwać. Wěcnu škodu na woběmaj awtomaj trochuje policija na něhdźe 40 000 eurow.

Njewobkedźbowanje předjězby je přičina njezboža w Nowej Łuce. 64lětna šoferka Renaulta přewidźa na křižowanišću z Wojerowskeho směra přijěducy Golf a zrazy do njeho. Jeho 39lětny wodźer so ćežko zrani. Tež tu wučinja wěcna škoda něhdźe 40 000 eurow.

Policija (14.10.19)

póndźela, 14. oktobera 2019 spisane wot:

Mopedist ćežko znjezbožił

Worklecy. Při wobchadnym njezbožu je so pjatk wječor we Worklecach wodźer Łastojčki ćežko zranił. Šoferka Toyoty njebě při wotbočenju wobkedźbowała, zo měješe muž předjězbu, a do njeho zrazy. Zo móhli mopedista do chorownje dowjezć, dyrbješe helikopter na sportnišću přizemić.

Policija (11.10.19)

pjatk, 11. oktobera 2019 spisane wot:

Žonje tobołku pokradnył

Brětnja-Michałki. Njeznaty muž je 81lětnej kolesowarce předwčerawšim w Brětni-Michałkach tobołku pokradnył, jako ju naprawo přesćahny. Nimo handyja a dalšich wosobinskich wěcow bě w tobołce móšnja ze sto eurami.

Policija (10.10.19)

štwórtk, 10. oktobera 2019 spisane wot:

W bydlenju pjenjezy kradnyła

Budyšin. Njeznata žona chcyše předwčerawšim, wutoru, na Budyskej Lotzowej hasy 90lětnej rentnarce při chěžnych durjach pulower předać. Bjez napominanja zastupi wona do bydlenja a połoži swoje twory na blido. Jako rentnarka do spanskeje stwy po pjenjezy dźěše, ju cuza do rozmołwy zapleće. Jako bě njeznata wosoba bydlenje zaso wopušćiła, 90lětna zwěsći, zo bě so jeje móšnja z 200 eurami a EC-kartku zhubiła.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND