Policija (13.05.16)

pjatk, 13. meje 2016 spisane wot:

Tři měsacy nóžkować

Zdźěr. Na zwjazkowej dróze B 156 w Zdźěri je policija zawčerawšim pjeć hodźin spěšnosć měriła. Z něhdźe tysac kontrolowanych jědźidłow bě kóžde štwórte spěšniše hač dowolenych 50 km/h. Njesławny rekord docpě wodźer motorskeho, kiž tam ze swojej Kawasaki ze 132 km/h po puću smaleše. Za to dyrbi wón nětko tři měsacy nóžkować, změje­ 680 eurow pokuty płaćić a dóstanje nimo toho dwaj dypkaj w Flens­burgu. Dopokazaja-li jemu wotpohladne smalenje, budźe naležnosć hišće dróša.

Policija (12.05.16)

štwórtk, 12. meje 2016 spisane wot:

Alarm w biopłunowej připrawje

Krěpjecy. Wohnjowych wobornikow z Halštrowa, Kamjenca a wokolnych wsow su dźensa dopołdnja do Krěpjec wołali. Tam bě krótko do 9 hodź. woheń w biopłunowej připrawje ratarskeho přede­wzaća wudyrił. Kak je so to stać móhło a hač maja tuchwilne twarske dźěła na terenje připrawy něšto z tym činić, hač do kónca redakciskeho časa jasne njebě. Z ćežkej techniku a z dychanskimi při­prawami wobornicy spytachu woheń w jednym z wulkich kotołow hašeć. Dokelž bě syrikowy płun wustupił, běchu wjacore wuchowanske awta a nuzowy lěkar­ zasadźene. Hakle po hašenju móže policija slědźić započeć, čehodla bě woheń wudyrił a kelko škody je načinił.

Policija (11.05.16)

srjeda, 11. meje 2016 spisane wot:

Paduch sej lochko měł

Lěskej. Wobydler w Lěskej pola Hućiny drje přichodnje bóle na to kedźbuje, hač su durje jeho domu zamknjene, hdyž wón na zahrodźe trawu syče. Póndźelu wón to mjenujcy činił njebě, a to je dotal njeznaty paduch šamale wužił. W času wot 10 do 12.30 hodź. dósta so cuzy přez ­wočinjene zadnje durje do jednoswójbneho domu. W jednotliwych stwach wón po wšěm zdaću cyle zaměrnje za pje­njezami pytaše a wjacore ­kamory zwočina a přeborka. Z namakanych móšnjow pokradny­ dohromady něhdźe 300 eurow, kaž Zhorjelska ­policajska direkcija zdźěli. Na to so paduch přez chěžne durje zhubi. Jako wobsedźer domu po zdo­konjanym dźěle w domje načinjenu wobradu­ wuhlada, informowaše wón policiju.­ Zastojnicy spytachu slědy zawěsćić a nětko za nje­znatym skućićelom pytaja.

Policija (10.05.16)

wutora, 10. meje 2016 spisane wot:

Wobydlerjow wurubili

Jenkecy. Pjećcyfrowu sumu pjenjez su njeznaći wčera w Jenkecach rubili. Ně­hdźe w 4 hodź. zadobychu so třo mužojo do bydlenskeho domu, wubudźichu 62lětneho muža a 55lětnu žonu a zamknychu jeju do jedneje stwy. Na to dom přepytachu a so z pjenjezami zhubichu.

Policija (09.05.16)

póndźela, 09. meje 2016 spisane wot:

Na awtodróze prasnyło

Połčnica. Wjele wutrajnosće trjebachu šoferojo dźensa rano na awtodróze A 4 mjez wotbóčkami Porchow, Ohorn a Połčnica. Krótko do 7.30 hodź. běchu mjez Ohornom a Połčnicu wjacore wosobowe jězdźidła do so zrazyli, zo bě awtodróha do směra na Drježdźany na wjace hač dźesać kilometrach dospołnje zatykana. K poćežowanjam dóńdźe na to tohorunja na zwjazkowej dróze B 6.

Tankownju nadpadnyli

Wulka Dubrawa. Po padustwach zašły čas w Malešecach, Komorowje, Kamjenej a Hućinje su sej njeznaći w nocy na njedźelu Wulku Dubrawu jako cil wupytali, a to tankownju wosrjedź wsy. Tu wočinichu namócnje durje a pokradnychu cigarety. Namakane slědy kriminalisća wčera zawěsćichu, nadźijejo so tak pokiwow na skućićelow. Tankownja wosta wčera tuž zawrjena. Što su paduši nimo cigaretow hišće spakosćili, njeje dotal hišće dospołnje zwěsćene.

Policija (06.05.16)

pjatk, 06. meje 2016 spisane wot:

Šofer zatłusnjeny był

Kamjenej. Na dróze mjez Budyšinom a Minakałom je srjedu popołdnju wodźer Forda Opelej předjězdbu wzał. Jako chcyše do Kamjeneje wotbočić, wón napřećo přijěduce awto přewidźa. Při zražce bu šofer w Opelu zatłusnjeny. Zawołani wohnjowi wobornicy jeho ze specialnym gratom z jězdźidła wurězachu.

Po skłoninje so dele sunył

Budyšin. Wčera rano je wodźer Forda Van na awtodróze A 4 mjez Budyšinom-zapad a -wuchod kontrolu nad awtom zhubił a so po skłoninje dele sunył. Jedna sobujěduca so lochko zrani.

Policija (04.05.16)

srjeda, 04. meje 2016 spisane wot:

Z płujadłom smjertnje znjezbožiła

Klukš. Na mjezynarodnym wubědźowanju płujadłow w Klukšu pola Wulkeje Dubrawy je so wčera tragiske njezbožo stało. 21lětna pilotka jednosydłoweho płujadła chcyše runje přizemić, jako jeje lětanski nastroj wosrjedź lětanišća z dotal njeznateje přičiny na zemju zrazy. Ćežko zranjenu młodu žonu dowjezechu do chorownje, hdźež wona pozdźišo na sćěhi swojich zranjenjow zemrě. Zwjazkowy zarjad za lětadłowe njezboža hromadźe z kriminalnej policiju přepytuje, kak je k njezbožu dóńć móhło. Wubědźowanje płujadłow w Klukšu su najprjedy raz přetorhnyli.

Policija (03.05.16)

wutora, 03. meje 2016 spisane wot:

Před dwórnišćom prasnyło

Budyšin. Runje před Budyskim dwórnišćom je so dźensa rano ćežke wobchadne njezbožo stało. Krótko po 6 hodź. wodźerka Forda z parkowanišća před dwórnišćom wujědźe a chcyše do směra na centrum wotjěć. Njewobkedźbowaše pak wulke, wotpadki wotwožowace nakładne awto a zrazy do njeho. Žona so ćežko zrani, tak zo dyrbjachu ju do chorownje dowjezć. Wodźerjej nakładneho a dalšeho wobdźěleneho wosoboweho awta so njezraništaj. Jordanowa bě wjacore hodźiny dospołnje zawrjena.

Policija (02.05.16)

póndźela, 02. meje 2016 spisane wot:

Njezbožo z křesłom

Wojerecy. Wobchadne njezbožo trochu hinašeho razu sta so sobotu připołdnju na zwjazkowej dróze B 97 pola Wojerec. Tam bě so křesło z připowěšaka pušćiło a na puć padnyło. Dwě wosobowej awće njemóžeštej so hižo wuwinyć a zrazyštej do mebla. Na zbožo so při tym nichtó zranił njeje.

Policija (29.04.16)

pjatk, 29. apryla 2016 spisane wot:

Audi pokradnjeny był

Wóspork. Na awtodróze A 4 pola Wósporka je policija zawčerawšim wosobowe awto typa Audi A 6 zadźeržała, za kotrymž hižo mjezynarodnje pytachu. Kaž so při kontroli wukopa, běchu jězdźidło w januaru 2014 w Magdeburgu pokradnyli. Pozdźišo bu wone w Pólskej z falšowanymi podłožkami znowa přizjewjene. 27lětny wodźer awta so njemało dźiwaše, jako wot zastojnikow tele wobstejnosće zhoni. Kaž wón rjekny, bě jeho bratr jězdźidło w Pólskej trjebane kupił a předawarjej dowěrił, zo je wšitko w porjadku. Ale wšitko skorženje nětko ničo njepomhaše, policija awto sćaza.

Hětu skóncowali

Komorow. Při haće blisko Komorowa pola Klukša su njeznaći minjeny čas hońtwjersku hětu skóncowali. Skućićeljo wočinichu namócnje durje a rozbichu wokno. Dale woni tyzu barby po wšěm zdaću z pyrotechniku rozbuchnychu, tak zo pryskaše barba na wjerch, sćěny a špundowanje a je zanjerodźi.

nawěšk

nowostki LND