Žadaja sej Trumpa wotsadźić
Washington (dpa/SN). Hladajo na masiwnu kritiku prócuje so wotwoleny prezident USA Donald Trump po nadběhowanju Kapitola přez swojich přiwisnikow nastatu škodu wobmjezować. W nowym widejowym poselstwje wón namócnosće zasudźa. „Kaž wšitcy Američenjo sym namócnosćow, anarchije a chaosa dla rozhorjeny. Nětko je čas hojenja a wujednanja“, Trump rjekny a zdobom připowědźi, zo chcył zastojnstwo nowemu prezidentej Joewej Bidenej 20. januara porjadnje přepodać.
Krótko do wozjewjenja poselstwa běchu sej wodźacy demokraća kongresa wot republikana Trumpa naškaranych namócnosćow dla žadali jeho hnydom wotsadźić. Předsydka Domu reprezentantow Nancy Pelosi a najwyši demokrat w Senaće Chuck Schumer namołwištaj amtěrowaceho wiceprezidenta Mikea Pencea a čłonow knježerstwa, Trumpa na zakładźe artikla 25 wustawy USA ze zastojnstwa wotstronić. Mjenowany artikl dowola prezidenta pušćić, njeje-li wón kmany, „prawa a winowatosće zastojnstwa wukonjeć“. Tajku deklaraciju dyrbjeli wiceprezident a ministrojo zdźěłać.
DJV zasudźa nadpady na žurnalistow
Washington (dpa/SN). Zwjazk žurnalistow Němskeje (DJV) je rozhorjeny na nadpady tež na němskich žurnalistow w stolicy USA Washingtonje reagował. „Zaso raz so pokazuje, kak jara so přiwisnicy Donalda Trumpa demokratije a nowinarskeje swobody wohladaja, našćuwani wot wotwoleneho prezidenta a jeho ludźi“, rjekny zwjazkowy předsyda DJV Frank Überall nowinarjam. Předsyda dźěłarnistwa ver.di Frank Werneke rěčeše wo „njeakceptabelnym nadpadźe na swobodu nowinarstwa“.
To a tamne (08.01.21)
Hišće za čas telefonata nana do porodneje kliniki je so w bydlenju w Mnichowje dźěćko narodźiło. Muž bě při telefonje rjekł, zo je jeho žona we 38. tydźenju samodruha a zo su so hrona započeli. W tym wokomiku bě w pozadku hižo wukřik dźěsća słyšeć. Hnydom poda so nuzowy lěkar k bydlenju swójby, hdźež nańdźe mać a strowe hólčatko.
Mylnje nuzowe čisło wolił je paduch w jendźelskim měsće Stoke-on-Trent a je tak policiju alarmował. „Smy drje runje najnjezbožownišeju paduchow swěta zajeli“, pisa policija hrabinstwa Staffordshire. Mužej w starobje 49 a 42 lět běštaj so w Stoke-on-Trenće do domu zadobyłoj. Jako so jedyn z njeju na konopej sydny, zazwoni toho mobilny telefon awtomatisce nuzowe čisło policije. Ta móžeše jeju činjenju připosłuchać, doniž njepřijědźe a wobeju njezaja.
Kajku rólu hraje cyrkej w 21. lětstotku?
Smochćicy (SN/bn). „Swědčenje w času – Dynamika křesćanskeho w Drježdźansko-Mišnjanskim biskopstwje“ je hesło lětušeje zymskeje akademije, kotruž tudyša dieceza a Smochčanske kubłanišćo swj. Bena tuchwilu ryzy digitalnje wuhotujetej. Ćežišći zarjadowanja stej znowazałoženje biskopstwa před 100 lětami a prašenje za relewancu cyrkwje w 21. lětstotku.
„Chcemy so lětsa třom bytostnym kajkosćam cyrkwje, potajkim swědstwu, liturgiji a diakoniji wěnować a tele aspekty historisce, aktualnje a na přichod hladajo wuswětlić.“ Takle witaše hłowny organizator dr. Thomas Arnold z Drježdźanskeje katolskeje akademije wobdźělnikow kaž tež referentow na wčerawše zahajenje akademije. Zdobom dźakowaše so Budyskej wotnožce Sakskeho wukubłanskeho a wupruwowanskeho kanala za „technisku administraciju“.
Dobyće Bidena nětko oficialne
Washington (dpa/SN). Joe Biden je nětko tež cyle oficialnje prezidentske wólby USA dobył, kaž amtěrowacy wiceprezident kraja Mike Pence po zhromadnym posedźenju wobeju komorow kongresa zdźěli. Do toho běchu wólbny wuslědk w jednotliwych zwjazkow krajach wobkrućili, štož je po wólbnym zakonju kraja předpisane. To bě zdobom posledni krok do spřisahanja noweho prezidenta. Mnohich skóržbow amtěrowaceho prezidenta Donalda Trumpa přećiwo wuslědkej wólbow dla pak je so proces jara dlijił.
Merkel na klawsurje CSU
Berlin (dpa/SN). Z njewšědnym wustupom zwjazkoweje kanclerki Angele Merkel (CDU) je krajna skupina CSU dźensa w Berlinje ze swojej tradicionalnej zymskej klawsuru pokročowała. Nimo kanclerki běchu zapósłancy tež prezidenta Zwjazkoweje banki Jensa Weidmanna a nawodnicu klimoweje komisije UNO Patriciju Espinosu Cantellano přeprosyli. Koronakrizy dla běchu klawsuru z bayerskeho klóštra Seeon do Berlina přepołožili a jako hybridnu organizowali.
Iran ke kompromisam zwólniwy
Połoženje a nalada zdźěla katastrofalnej
Frankfurt n. M. (dpa/SN). Hospodarske zwjazki a dźěłarnistwa podlěšeny lockdown kritizuja, žadajo sej wjace pomocy stata. Nimo toho wobstawaja na wjace pjenjezach za krótkodźěłacych w gastronomiskim wobłuku. Drobnowikowanje žada sej mjeztym konkretny jězbny plan za znowawotewrjenje wobchodow. A prezident centralneho zwjazka Němskeho rjemjeslnistwa Hans Peter Wollseifer namołwja k spěšnišemu šćěpjenju, zo móhli so bórze zaso do normalneho žiwjenja wróćić. Ekonomojo pak měnja, zo njezměja přiwótřene naprawy kaž pohibowanski radius k zahaćenju dalšich koronainfekcijow žane wulke hospodarske sćěhi. Přiwšěm je połoženje w hospodarskim wobłuku chětro napjate.
Zelena swěca za dalše šćěpiwo
Amsterdam (dpa/SN). Europska agentura za posudźowanje lěkarskich srědkow (EMA) je dalše šćěpiwo dowoliła. Wo srědku farmacijoweho koncerna Moderna běchu fachowcy hižo póndźelu wuradźowali, wčera je přizwolichu. Doskónčnje ma nětko jenož hišće komisija Europskeje unije wothłosować, štož pak je formalita. Z přizwolenjom pak zwisuje tež poručenje, zo měli lěk za wosoby, kotrež su starše hač 18 lět, wužiwać, EMA zdźěli.
Hižo přichodny tydźeń móhł koncern Moderna prěnje dozy seruma Němskej dodawać, rjekny wčera zwjazkowy strowotniski minister Jens Spahn (CDU). Šćěpiwo su w USA, Kanadźe a Israelu hižo přizwolili. EU je cyłkownje 160 milionow dozow Moderna-preparata skazała. Prezidentka komisije EU Ursula von der Leyen ma poručenje EMA za jara dobru powěsć.
Fachowcy běchu so z wěstotnymi datami šćěpiwa hižo wot nowembra zaběrali a wuslědki studijow pruwowali. „Tónle lěk je nam dalši instrument w boju přećiwo tuchwilnej nuzowej situaciji“, praji direktorka agentury EMA Emer Cooke.
Zasudźeja namóc w USA
Politikarjo šokowani po nadběhach na Washingtonski parlament
Washington/Berlin (dpa/SN). Šokowani su wodźacy politikarjo Europy na namócnosće přiwisnikow prezidenta USA Donalda Trumpa we Washingtonje reagowali. „Njepřećeljo demokratije změja swoje wjeselo hladajo na tele njepředstajomne wobrazy z Washingtona“, zwjazkowy wonkowny minister Heiko Maas (SPD) wčera wječor twitterowaše. Prezidenta Rady EU Charlesa Michela su nadběhi na Kapitol w zwjazkowej stolicy USA „šokowali“. Britiski premierminister Boris Johnson je napominał, móc w USA měrniwje přepodać.
