„Cyłu Łužicu wobkedźbować“

póndźela, 22. oktobera 2018
artikl hódnoćić
(0 )

Połojca lětušich nazymskich koncertow je nimo. Bosćan Nawka je so z organi­zatorku rjada Mariju Swierczekowej rozmołwjał.

Knjeni Swierczekowa, kajki maće wosobinski zaćišć wo dotalnych koncertach?

M. Swierczekowa: Sym jara spokojom, hladajo na wopytowarstwo runje tak kaž na wothłós a wuměłsku kwalitu. Kóždy dotalny koncert je znajmjeńša 50 za­jimcow wopytało, žurle běchu stajnje derje­ wućežene. Wosebje wjeseliła sym so nad wu­stupom chóra Łužyca njedawno w Chrósćicach – ćělesa z Delnjeje Łužicy njejsu dźě přehusto pola nas z hosćom –, a nad přinoškom ze srjedźneje Łužicy we Worcynje z Rowniskimi glo­sami. Spytam přeco na to dźiwać, cyłu Łužicu wobkedźbować – nastupajo hrajnišća kaž tež wobdźělene wuměłcy.

Wjacore wulke chóry so lětsa rozdźělnych přičin dla na rjedźe njewobdźěleja. Je so to na někajkežkuli wašnje wuskutkowało?

M. Swierczekowa: Ně, docyła nic. Wědźach zahe dosć, zo na přikład chór Lipa lětsa chwile njezměje, wšako nazwučuje zhromadnje z dalšimi spěwarkami a spěwarjemi tuchwilu Korle Awgusta Kocorowy oratorij „Israelowa zrudoba a tróšt“. Widźu swój hłowny nadawk w tym, wuwa­ženy program wuhotować. To tež rěka,­ zo kóžde ćěleso po móžnosći jenož jónu wob lěto we wobłuku nalětnich resp. nazymskich koncertow wustupi, znajmjeńša měł wěsty geografiski wotstawk mjez hrajnišćemi być. Měnju, zo njeměło zajimcam na přikład z Haslowa ćežko być sej do Chrósćic dojěć a nawopak. Jedna-li so pak wo Wojerecy abo Cho­ćebuz, to wězo trochu hinak wupada.

Što lětsa hišće na publikum čaka?

M. Swierczekowa: Kóždy koncert je wjeršk. Skedźbnjam pak na někotre změny:­ 1. serb­ska kulturna brigada wustupi w Slepom sobotu, 10. nowembra w 17 hodź. Dźeń pozdźišo spěwaja gymnaziasća w Bukecach. Kaž je to na­ nje­dźel­nišich terminach mjeztym z tradiciju, přeprošujemy do koncerta na kofej – poskitk to, kotryž publikum jara rady přiji­muje. Chór Budyšin předstaji swój program popołdnju do Ro­mantici takrjec doma a chór Bratrowstwa 20. nowembra wječor w Pančicach-Kukowje. Planowany koncert w Hórkach kermuški dla wupadnje. Wutrobny dźak!

wozjewjene w: Rozmołwa
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND