Tango pod hołym njebjom

wutora, 28. meje 2019
artikl hódnoćić
(0 )

Hesło lětušeho Hudźbneho swjedźenja Smochćicy pod hołym njebjom rěka „Argentinske nocy“. Bosćan Nawka je so z předsydku zarjadowanje organizowaceho towarstwa Via regia – hudźbne eventy Margittu Luttner rozmołwjał.

Knjeni Luttner, čehodla rěka lětuši swjedźeń „Argentinske nocy“?

M. Luttner: Zaměr festiwala bě a je, našemu publikumej wěstu hudźbnu kulturu we wobsahowje wopřijimacym wobłuku předstajić. Loni wěnowachmy so róli měsačka we wuměłskich stawiznach, lětsa zaso jednotliwy kraj w srjedźišću steji. Nastork, za Južnu Ameriku so rozsudźić, je nam Budyska skupina Tango Misterio dała. Wona bě před lětomaj w Argentinskej, hdźež chcyše tamniši swětosławny tango dodnić. Cyle wozboženi domoj přišedši so čłonojo na mnje wobroćichu, hač njehodźał so tutón žanr raz w Smochćicach prezentować. Wažne bě a je nam zdobom serbski aspekt. Lětsa słyšimy tuž tež hudźbu, kotraž je wot do Argentinskeje wupućowanych a zdźěla nawróćenych Serbow wobwliwowana.

Kotre programowe dypki su planowane?

M. Luttner: Wosebity hósć je ćěleso Orquesta Municipal de Tango Ciudad de la Plata. Argentinscy hudźbnicy běchu łužiskich kolegow Tango Misterio, kotřiž tohorunja wustupja, tehdy jara zahorili. Wobě skupinje podpěra Serbski ludowy ansambl, z kotrymž za festiwal hižo wjacore lěta kooperujemy. Orchester a chór SLA zesylnja wuměłcy mjez druhim z Libereca a Jelenjeje Góry. Balet wězo k tomu słuša: Cyłkownje dźesać rejwarkow a rejwarjow na jewišću agěruje, šěsć z Budyšina a štyrjo z Argentinskeje. Woni rejuja tež we formaciji, čehoždla dojědu sej južnoameriscy rejwarjo ze swojej choreografku trochu zašo do Łužicy hač hudźbnicy, kotřiž přileća hakle tydźeń do festiwala na zhromadne proby.

Kak dołho sće za přihot trjebali?

M. Luttner: Konkretne přihoty smy před lětom zahajili. Naše towarstwo dźě ryzy čestnohamtsce dźěła, to dyrbiš dołhodobnje planować – wosebje we wokomiknej situaciji: Na dobrych idejach njeklaca, často pak na trěbnych pjenjezach. Nětko so wjeselu a sym dobreje nadźije, zo so nam wospjet poradźi pokazać, zo móžemy Łužicu takrjec tež wotnutřka rozkćěwać dać. Wutrobny dźak!

wozjewjene w: Rozmołwa
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND