Přećiwo žlokanju w zjawnosći chcedźa zamołwići na dowolowej kupje Mallorca wotnětka raznišo postupować. Dowolnicy smědźa jenož hišće w hosćencach a nic kaž dotal tež na chódniku před nimi jěsć a pić. Za to su mjez turistami woblubowanu partyjowu milu „Ballermann“ a dróhi wokoło njeje na „pasmo wosebiteho turistiskeho zajima“ deklarowali. Štóž nowe postajenje rani, tomu hrozy pokuta hač do 3 000 eurow.
Dwaj metraj dołheho hada je muž w mecklenburgsko-předpomorskim Friedlandźe wčera wječor při hromadźe komposta našoł. Boa so hižo njehibaše. Přiwołany skótny lěkar zwěsći, zo je zwěrjo mortwe. Zwotkal had pochadźa a hač słuša k jědojtym družinam, ma nětko weterinarny zarjad přepytować.
Washington (dpa/SN). Bywši prawiznik Donalda Trumpa Michael Cohen je prezidenta USA w zjawnym słyšenju raznje nadběhował. Při swojich wuprajenjach před kontrolnym wuběrkom Domu reprezentantow we Washingtonje mjenowaše Cohen Trumpa jebaka a rasista. Při tym naliči cyły rjad přeńdźenjow – zdźěla moraliskeho zdźěla prawniskeho razu – kotrež móhli ameriskeho prezidenta do wuskosćow přinjesć. Cohen bě dlěje hač dźesać lět za Trumpa dźěłał.
May zapósłancow přeswědčiła
London (dpa/SN). W boju wo wustup Wulkeje Britaniskeje z EU je premierministerka Theresa May zapósłancow britiskeho parlamenta wo swojim nowym kursu přeswědčić móhła. Tak je so wona na wčerawšim wothłosowanju móžnemu zběžkej přećiwnikow njerjadowaneho wustupa wuwinyć móhła. May móžeše połoženje do toho ze wšelakimi přilubjenjemi změrować: Dyrbjała-li ze swojimi planami znowa zwrěšćić, móhł parlament brexit přestorčić. Tomu je wjetšina přihłosowała.
Napjatosće přiwótřene
Bremen/Berlin (dpa/SN). Do rozsudneho koła tarifowych jednanjow za zjawnu słužbu su dźěłarnistwa zadźerženje dźěłodawarjow raznje kritizowali. „Štož je dotal ze stron dźěłodawarjow přišło, zasłuža sej znamku njedosahace“, rjekny šef dźěłarnistwa ver.di Frank Bsirske wčera na zarjadowanju w Bremenje tysacam wobdźělnikow. Kraje nadźěłuja wot lěta 2015 wulke nadbytki, w lěće 2017 bě to 10,5 miliardow eurow a loni 15,7 miliardow. „Financne połoženje krajow je tak dobre kaž hišće nihdy. Hdy, hdyž nic nětko, je načasu zjawnu słužbnu atraktiwnišu sčinić“, Bsirske podšmórny.
Dźensa je so w Podstupimje třeće a prawdźepodobnje rozsudne koło tarifowych jednanjow mjez dźěłarnistwami a tarifowym zjednoćenstwom němskich zwjazkowych krajow zahajiło. Dźěłarnistwa žadaja sej za něhdźe milion tarifowych přistajenych krajow šěsć procentow wjace mzdy, znajmjeńša pak 200 eurow wjace wob měsac. Tarifowe wotzamknjenje ma tež za zastojnikow płaćić.
Hanoi (dpa/SN). Wjerškowe zetkanje prezidenta USA Donalda Trumpa a sewjerokorejskeho mócnarja Kima Jong Una su dočasnje a bjez planowaneje zhromadneje deklaracije skónčili. Trump a Kim běštaj wo wšelakich móžnosćach rěčałoj, zo móhłoj atomarne wotbrónjenje a wot Trumpa přilubjene zběhnjenje sankcijow zwopradźić. Měnjenja wo tym pak běchu přerozdźělne, prezident USA po skónčenju jednanjow w rozmołwje z nowinarjemi zwurazni. Sewjerna Koreja bě na tym wobstała, zo USA wšitke sankcije přećiwo krajej zběhnu. „To tola njejsmy činić móhli“, Donald Trump rjekny.
Jednanja wobeju delegacijow buchu njewočakowano abruptnje přetorhnjene. Poprawom běštej hišće podpisanje zhromadneje deklaracije a zhromadny wobjed wobeju politikarjow planowanej. Wšitko to pak krótkodobnje wotprajichu. Dalše rozmołwne terminy mjez krajomaj njejsu najprjedy raz postajene.
Trump, kotremuž je njejapke skónčenje wjerška ćežka politiska poražka, chcyše so hišće dźensa do USA wróćić.
Braniborske knježerstwo přicpěwa Choćebuzej klučowy wuznam za strukturnu změnu we Łužicy a chce město tohodla w njej podpěrać.
Choćebuz (SN/at). Delnjołužiska metropola ma za poradźenje strukturneje změny po kóncu wudobywanja brunicy we Łužicy wulki wuznam. Toho je sej braniborske knježerstwo wědome, jako wuradźowaše zawčerawšim zhromadnje z čołom města w Choćebuzu.
Komuna „je wutroba a motor strukturneje změny, zahajeneje hižo před dołhim časom, kotraž so pak nětko z financnej podpěru dźeń a spěšnišo wotměwa“, kaž ministerski prezident Dietmar Woidke (SPD) rjekny. Jeho kabinetej je wažne, zo je Choćebuz na tónle proces „derje přihotowany a strukturnu změnu aktiwnje wuhotuje“. Z wuwića Łužicy na modelowy region za strukturnu změnu a škit klimy wurostu za Choćebuz tež nowe šansy, stej sej braniborske knježerstwo a čoło města přezjednej.