Nowe hudźbne wideja

Budyšin/Berlin. Poskitk serbskich hudźbnych widejow dale rozrostuje. Tele dny spřistupništej na Youtube-kanalu „Serbska hudźba“ skupina Astronawt nowostku „Impresije“ – ryzy instrumentalny to přinošk (režija: Philipp Herfort) – a kapała Brankatschki spěw „My dźemy dźensa“, inscenowany wot Ezekiela Mishki a Mateja Dźisławka.

Na samsnej platformje wozjewi njedawno Berlinske duwo Hara Crash widejo k dub-štučce „Bali“, kotruž fanojo hižo z tačele „Halfway reveries“ znaja. Clip staj hudźbnikaj z kamerownikom Clemensom Jurkom pod režiju Roberta Ecksteina zwoprawdźiłoj. Najjednorišo jón zajimcy nańdu, zapodadźa-li mjeno duwa do wotpowědneho pytanskeho pola.

njedźelu hornjoserbsce

11:00 Łužica tutón tydźeń

11:15 Přinoški a hudźba k Mjezynarodnemu dnjej žony

12:00  Nabožne wusyłanje

(Krystof Rummel)

po tym zbožopřeća

delnjoserbsce

12:30  Aktualny magacin z powěsćemi a přinoškomaj „Što skići Pratyja 2022“ a „Nowa šula wokrjesa Sprjewja-Nysa bjez serbskeje wučby?“

13:00 Tematiske wusyłanje: Portret serbskeje žónskeje

13:40 Nabožne wusyłanje

(Cyril Pjech)

po tym zbožopřeća

Telewizijny magacin Wuhladko zaběra so jutře, 6. měrca w 11.45 hodź. mjez druhim z prašenjom, kak móhli serbske jutry lětsa wupadać, po tym zo křižerjo loni prěni raz docyła jěchać njemóžachu. Dalše ćežišća budu reformowe plany ewangelskeje cyrkwje nastupajo změny struktury w hornjoserbskich wosadach, jubilej Budyskeho klankodźiwadła a „rekordna girlanda“, kotruž su Kulowscy karnewalisća składnostnje póstnic zhotowili. Nimo toho wěnuja wuwiwarjej serbskeho braille-pisma portret. Telewizija MDR wospjetuje wusyłanje pón­dźelu, 3. měrca, w 6.45 hodź., sćelak RBB 13. měrca w 13.40 hodź.

Ze spodobnym akwarelom „Nalěćo pola Sušowa“ Błótowčana Wylema Šybarja (1887–1974) zahaja so měrcowske wu­daće Rozhlada. Na dalšich stronach dźe wosebje wo digitalizaciju w najšěršim zmysle. W zawodnym teksće rysuje Domenico Gruhn, kak je so pólska wikowanska platforma Allegro přećiwo eBay přesa­dźiła, kotre serbske poskitki na tym polu faluja a kak móhli serbski digitalny swět tworić, z kotrymž móže so kóždy identi­fikować. W rozmołwje dawa samostatny poradźowar za IT-procesy a zamołwity za nadźěłanje digitalneho koncepta za Załožbu za serbski lud Měrko Šenk dohlad do tuchwilneho stawa digitalizacije pola Serbow. Tak wón rozkładuje, kotre serbske poskitki na tym polu su k dispoziciji, kak jednotliwe institucije z nimi dźěłaja a hač je móžno wliw na wulke firmy wukonjeć, zo bychu serbske aspekty při digitalizaciji wobkedźbowali. Šenk zdobom měni, zo je digitalizacija wulka šansa za serbski lud a jeho rěč.