Najstarši kopar rozsudne wrota spřihotował
Zeleno-běłym Hórki a zamołwitym towarstwa Serbski Sokoł je so znowa bjezporočne přewjedźenje dalšeho koparskeho turněra starych knjezow wo pokal Serbskeho Sokoła poradźił. Lětsa dyrbjachu nowu trofeju wobstarać, dokelž smědźachu sej Ralbičenjo po třoch triumfach dotalny pokal zdźeržeć.
Do turněra bě mustwo z Radworja wospjet mało hrajerjow dla wotprajiło a sydom Chróšćanskich koparjow čakaše podarmo na zbytnych štyrjoch, zo by kompletne mustwo nastupić směło. Turněrowy nawoda Jan Hrjehor a pisar Józef Šwon rozsudźištaj so z kapitanami mustwow, podlěšić hrajny čas na 15 mjeńšin. Wostachu pak při hrajnym modusu kóždy přećiwo kóždemu. Dokelž je hrajny čas chětro krótki, třěleja po kóždym njerozsudnym wuslědku jědnatki a dobyćer dóstanje přidatny dypk kaž tež wrota přetworjenych jědnatkow zapisane.