Najebać mnohe móžnosće jenož njerozsudny wuslědk docpěli

wutora, 10. decembera 2019
artikl hódnoćić
(0 )
Dawid Šołta (naprawo, Pančicy) bě so njedźelu přećiwo koparskemu cyłkej Sportoweho towarstwa Porchow wosebje na křidłomaj wo wjele njeměra starał. Wrota pak so Konječanej žane poradźili njejsu.  Foto: Konstantin Hrjehor Dawid Šołta (naprawo, Pančicy) bě so njedźelu přećiwo koparskemu cyłkej Sportoweho towarstwa Porchow wosebje na křidłomaj wo wjele njeměra starał. Wrota pak so Konječanej žane poradźili njejsu. Foto: Konstantin Hrjehor

ST Marijina hwězda

– ST Porchow 2:2 (1:0)

Zestawa domjacych: Matik – Wróbl, Rab, Bělk, R. Cyž, Pjetaš, Ch. Cyž, Jurš, Hawš, Šołta, Pakoßnick

Posledni hrajny dźeń wokrjesneje wy­še­je ligi do zymskeje přestawki woča­kowachu koparjo ST Marijineje hwězdy zastupnistwo z Porchowa. Wot wšeho spočatka bě hra chětro jednostronska, dokelž domjacy partiju jasnje dominowachu. Hosćo pak jich najprjedy raz agresiwnje atakowachu, tak zo njebě hrajna nitka nachwilnje prawje data. Tak spytachu domjacy ze standardami k wuspěchej dóńć. Po róžku Feliksa Pjetaša zhłójčkowa Richard Hawš bul w 10. min. snadnje nimo wrotow, a wólny kop Pje­taša ze zdalenosće 25 metrow móžeše přećiwniski wrotar wotwobarać (14.). Jeno sekundy po tym skoči znowa Hawš po róžku Maćija Wróbla najwyše, bul pak klětku wo někotre centimetry misny. Prěnju šansu mějachu Porchowčenjo w 21. min. z třělwu z distancy. Wrotar Dawid Matik pak běše na městnje. W 23. min. padny skónčnje 1:0 za Marijinu hwězdu. Dołhu třělwu do šěsnatki hosćo jenož njedosahajcy wotwobarachu. Tak dosćahny Tomaš Jurš kulowatu kožu a smo­kny ju z wuběrnej třělwu ze zdalenosće 17 metrow njedźeržomnje do syće. Po zmylku w škiće hosći měješe Jakob Pakoßnick w 31. min. wulku składnosć na 2:0 zwyšić, ale samlutki před wro­tarjom zwrěšći. W 34. min. wudoby sej Dawid Šołta z intensiwnym běhom w srjedźnym polu bul a předrě so z mócnej zasadźitosću do směra na přećiwnisku klětku. Znowa pak móžeše wusahowacy wrotar Dominik Anders wjetšemu zastatkej zadźěwać.

Prěnje 15 mjeńšin w druhim połčasu so na woběmaj bokomaj wjele njesta. W 63. min. pak móhli domjacy hnydom dwójce wuslědk zwyšić. Najprjedy zwrěšći Šołta po dokładnej přihrawce Pa­koßnicka na wrotarju, a sekundy po tym steješe Pakoßnick po wuběrnym pasu Jeffreyja Raba cyle sam před Andersom, kiž pak dwubój znowa doby. Tajke hoberske móžnosće dyrbja konsekwentnišo wužiwane być. Znajmjeńša jedna měła k wrotam wjesć. A kaž to w kopańcy hustodosć je, hosćo w 76. min. wurunachu. Wólny kop ze swójskeje połojcy lećeše wysoko do šěsnatki. Nichtó w domja­cym škiće njekedźbowaše na Erica Okuna, kiž z pjeć metrow k 1:1 zhłójčkowa. Nadobo knježeše w rjadach klóšterskich ko­parjow njewěstosć. To wuži přećiwnik a zwyši w 84. min. samo na 1:2. Spěšny Okun bě so do šěsnatki předrěł a z niskej třělwu swoje druhe wrota dnja docpěł. Na zbo­žo so hosćićeljo njepodachu a w 87. min. hišće wurunachu. Christoph Cyž, na kromje šěsnatki stejacy, trjechi z rjanym kopom do lěweho delnjeho kuta­ ke kónčnemu stawej 2:2.

Facit: Je ćežko rjec, hač bě to před­­wčerawšim dobyty abo přěhraty dypk za Pančičanske mustwo. Dźiwajo na mno­he stoprocentne móžnosće wězo přěhraty, wurunanja krótko do kónca hry dla pak dobyty. Z njespokojacymi 15 dypkami přezy­muje mustwo ST Ma­rijineje hwězdy na 13. městnje tabulki wokrjesneje wyšeje ligi. Tobias Nowak

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND