Jako zastupichu přihladowarjo w minjenej hrajnej dobje k domjacym hram muži-wolejbulistow Viktorije Worklecy do tamnišeje sportoweje hale, widźachu jako prěnje pisany plakat. Dźěsći hrajerjow běštej jón wuhotowałoj. Wobraz měješe napis: „Zběramy pjenjezy za chore dźěći“. Připołožene łopjeno rozłoži, zo jednaše so při tym konkretnje wo darowansku akciju za dźěćace hospicne dźěło. Ideja mustwa běše, zo měli w hrajnej dobje nimo sportowych ambicijow na kóždy pad něšto za socialny projekt činić. Z wjacorych namjetow bu nimale jednohłósnje dźěćace hospicne dźěło faworizowane. Tak bě akcija wobzamknjena wěc.

Darowanska boksa bě spěšnje zhotowjena a wotnětka buchu ke kóždemu domjacemu hrajnemu dnjej přihladowarjo a aktiwni namołwjeni, mały obolus za dobry skutk darić. Wukónc hrow njeměješe wočiwidnje žadyn wosebity wliw na šćedriwosć přihladowarjow, wšako přińdźe na wuspěšnych hrajnych dnjach kaž tež po poražkach stajnje něhdźe 50 eurow do darowanskeje boksy. Tak mějachu na kóncu sezony spokojacy wuslědk 200 eurow.