Budyšin (SN/HaJ). Ukrainski wulkomišter Sergij Owsejewič je 2. mjezynarodny šachowy turněr „Bautzene Türme open“ dobył. Wurisanje skónči so z mytowanjom najlěpšich hrajerjow předwčerawšim w Budyskej „Krónje“. Ličba wobdźělnikow na turněrje je so porno lońšemu podwojiła.
Sergij Owsejewič je kóždy čas swojej róli faworita jako jenički wulkomišter wotpowědował. Sydom partijow je dobył, dwójce hraješe remis w cyłkownje dźewjeć duelach. Wuspěšnaj běštaj tež Budyšanaj Alexander Herbrig z ratingowym mytom a Florentin Lübke jako najlěpši młodźinski hrajer. W B-turněru doby Drježdźanski młodźinski hrajer Gustav Rauschhardt. Wjace hač 150 zahorjenych šachownikow z jědnaće narodow, mjez nimi třinaće nošerjow šachowych titlow, běše sej na měrjenje mocow do Budyšina dojěło. W A-turněrje, wobsadźenym z dobrymi sportowcami, móžachu so sylni hobbyjowi hrajerjo z profijemi měrić. Najdlěši puć do sprjewineho města měještaj młodźinskaj šachownikaj z Južneje Afriki kaž tež z Islandskeje.
